ايماق باسشىسىنىڭ ايتۋىنشا, شيپاجاي كاتونقاراعاي اۋىلىنداعى №2 اۋداندىق اۋرۋحانا بازاسىندا ورنالاسادى. شيپاجايدا التايدىڭ ەمدىك شوپتەرىمەن, قىمىزبەن, باتپاقپەن ەمدەۋ كابينەتتەرى اشىلىپ, كەلۋشىلەرگە قىزمەت كورسەتپەك. اۋرۋحانا عيماراتىندا حالىقتىق مەديتسينا ءبولىمىن اشۋ دا جوسپارلانىپ وتىر.
شيپاجاي اشۋ ماسەلەسى 23 اقپاندا د.احمەتوۆتىڭ كاتونقاراعاي اۋدانىنا جاساعان جۇمىس ساپارى بارىسىندا دا تالقىلاندى. وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ اكىمگە شيپاجايدىڭ جوبا-جوسپارىن تانىستىردى.
«بۇل اۋرۋحانا سالىنعان كەزدە اۋدانداعى حالىق سانى, سوعان سايكەس مەديتسينالىق مەكەمەدە توسەك ورىندارىنىڭ سانى دا كوبىرەك بولعان ەدى. حالىق جان-جاققا كوشكەن كەزدە اۋرۋحاناعا كەلەتىن كىسىلەر دە ازايىپ, عيماراتتىڭ ءبىراز بولىگى بوس تۇر. ناقتىراق ايتساق, 9 مىڭ شارشى مەتر نىساننىڭ 3 مىڭ شارشى مەترى پايدالانىلماي وتىر. ءبىز شيپاجايدى وسىندا, ياعني بوس اۋماققا ورنالاستىرماق ويىمىز بار. شيپاجاي اشۋداعى ماقساتىمىز – ەڭ اۋەلى كاتونقاراعايدىڭ تۋريستىك الەۋەتىن نىعايتۋ. قازىر بۇل اۋدانعا تۋريستەر نەگىزىنەن جاز كەزىندە عانا كەلەدى. ءارى كەتسە ەكى-ءۇش اي. زەردەلەپ قاراعانىمىزدا ولاردىڭ جەكە مەنشىك دەمالىس بازالارىنا باراتىنىنا كوز جەتكىزدىك. اتالعان دەمالىس بازالارىندا بىلىكتى مەديتسينا ماماندارى جوق. قان قىسىمىن, ساراپتامالارىن ەشكىم تەكسەرمەيدى.
ەندى شيپاجايعا كەلۋشىلەردى بىلىكتى ماماندار قاراپ, رەنتگەنگە, ۋزي-گە ءتۇسىرىپ, دەنساۋلىقتارىن ءجىتى تەكسەرەتىن بولادى. كاتونقاراعايدىڭ تۋريستىك الەۋەتى جوعارى. ماسەلەن, كاتونقاراعاي ۇلتتىق ساياباعىندا 18 تۋريستىك باعىت بار. «راحمان قاينارى» شيپاجايى ءوز الدىنا. جالپى, كاتونقاراعاي اۋدانىنىڭ تۋريستەردى جىل ون ەكى اي قابىلداۋعا مۇمكىندىگى بار.
قىستا شاڭعى تەبۋگە بولادى, جازدا تۋريستەرگە اۆستريا جولىن نەگە كورسەتپەسكە؟! شيپاجاي اۋداندا قوسىمشا جۇمىس ورىندارىن اشۋعا دا مۇمكىندىك بەرەدى. ءبىز يپپوتەراپيا, ينە تەراپياسى, قىمىز تەراپياسىن دامىتۋدى كوزدەپ وتىرمىز. كەرەك بولسا, ءوزىمىزدىڭ ماماندارىمىزدى وقىتامىز.
قىتايدىڭ التاي اۋدانىندا حالىق مەديتسيناسىن جاقسى مەڭگەرگەن مامانداردى وسىندا تارتىپ نەمەسە ءوزىمىزدىڭ مامانداردى سول جاققا جىبەرىپ, تاجىريبە الماسۋ دا ويىمىزدا بار», - دەيدى باسقارما باسشىسى.
ازامات قاسىم,
«Egemen Qazaqstan»
شىعىس قازاقستان وبلىسى
