«بۇگىنگى كۇنى قازاق ءتىلىن ۇيرەنۋگە دەگەن ىنتا تەك قازاقستاندىقتار تاراپىنان عانا ەمەس, سونداي-اق شەتەلدىك ازاماتتار اراسىندا دا جوعارى. ونى ەلىمىزگە كەلىپ جاتقان شەتەلدىك ازاماتتاردان بايقاۋعا بولادى, ياعني قازاقستاننىڭ مەملەكەتتىك ءتىلىن الدىن الا ۇيرەنىپ كەلەدى. دايىنداعان جوبالارىمىز ارقىلى ەندى قازاق ءتىلىن وقىپ ءبىلۋ اعىلشىن ءتىلدى شەتەلدىكتەر مەن شەتەلدەگى ەتنيكالىق قازاقتارعا دا قولجەتىمدى بولماق. سونىمەن قوسا پورتال ارقىلى قازاقستاندىقتار لاتىن گرافيكاسىن دا ۇيرەنە الادى», - دەدى قازاقستان رەسپۋبليكاسى تۇڭعىش پرەزيدەنتى - ەلباسى قورىنىڭ ءباسپاسوز-حاتشىسى لوسكۋتوۆا وكسانا پاۆلوۆنا.
قازىرگى كەزدە «Soyle.kz» پورتالىندا 115 مىڭنان استام ادام ءتىل ۇيرەنۋدە, اشىلعالى 5 ميلليوننان استام قازاقستاندىق جانە شەتەلدىك قولدانعان, ال الەۋمەتتىك جەلىلەر ارقىلى كۇندەلىكتى 30 مىڭ ادام قازاق ءتىلىن ۇيرەنەدى. «Soyle» ءموبيلدى قوسىمشاسىن 50 مىڭ ادام جۇكتەگەن. ال 2016 جىلدان باستاپ «Soyle.kz» ادىستەمەسى بويىنشا Skype ارقىلى قازاق ءتىلىن وقىتۋ ساباقتارى تەگىن جۇرگىزىلۋدە.
«وسىنداي پايدالى رەسۋرستاردى اشۋ ارقىلى ءبىز رۋحاني بايلىعىمىز بەن ۇلتتىق مادەنيەتىمىزدى, سالت-ءداستۇرىمىز بەن تاريحىمىزدى ناسيحاتتاۋعا, جاساتاردىڭ ءوز ەلىنە, تۋعان جەرىنە دەگەن سۇيىسپەنشىلىگىن قالىپتاستىرۋعا جانە ولاردى ءىت-سالاسىنداعى بىلىمدەرىن جەتىلدىرۋگە ىقپال ەتەمىز دەگەن ويدامىز», - دەپ اتاپ ءوتتى وكسانا پاۆلوۆنا.
سونىمەن قاتار, «Balasoyle» ءموبيلدى قوسىمشاسى دامىتاتىن ونلاين ويىندار ارقىلى مەكتەپكە دەيىنگى جانە مەكتەپ جاسىنداعى بالالارعا قازاق ءتىلىن ۇيرەتۋدە. جوبا بالالاردىڭ دۇرىس سويلەۋىنە, گرامماتيكا ەرەجەلەرىن مەڭگەرۋگە, سوزدىك قورىن دامىتۋعا جانە قورشاعان ورتانى تانۋعا ىقپال ەتەدى. كۇندەلىكتى پورتالدى 1,5 مىڭ ادام پايدالانادى. ايتا كەتسەك بۇل جوبالار قر تۇڭعىش پرەزيدەنتى – ەلباسى قورى جانە «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن ازىرلەندى.
