ايەل اسا قىمبات اشەكەيلى كيىم كيگەن: باسىندا شوشاق توبەلى جوعارعى جاعىندا تاۋ ەشكىسىنىڭ بەينەسى سالىنعان التىن باس كيىم, موينىنا ەكى سالپىنشاقتى تۇتاس قۇيىلعان گريۆنا (مەتالدان جاسالعان اشەكەي) تاعىلعان. ال كيىمنىڭ كەۋدە تۇسىنا ءتورتبۇرىشتى, سوپاقشا ءپىشىندى باراق يت, قويدىڭ باستارى بەينەلەنگەن التىن جاپسىرمالى اشەكەيلەر مەن دوڭگەلەك ءپىشىندى التىن مونشاقتار تىگىلىپ, جەڭدەرىنە دە التىنداعان قاسقىردىڭ ازۋ تىستەرى بەينەلەگەن سالپىنشاق تاعىلىپتى.
سونىمەن قاتار كەشەننەن تابىلعان تاڭعاجايىپ جادىگەردىڭ ءبىرى – «تاقساي تاراعى». – بۇل جادىگەردىڭ قۇندىلىعى سونشالىق, دۇنيەجۇزىلىك مادەني-تاريحي قازىنا قاتارىنا جاتاتىن بىردەن-ءبىر بۇيىم, – دەيدى باتىس قازاقستان وبلىستىق تاريح جانە ارحەولوگيا ورتالىعىنىڭ ديرەكتورى مۇرات
سىدىقوۆ. راسىندا بۇل زات الەمدىك دارگەيگە بالانىپ وتىرعان ەلىمىزدە بالاماسى جوق جالعىز جادىگەر.
تاراق ەكى جاقتى, تىكبۇرىش ءپىشىندى اعاشتان جاسالعان. ونىڭ ەنى − 11, بيىكتىگى − 17, جۋاندىعى − 0,5 سم. بۇيىمنىڭ شاش تاراۋعا ارنالعان بولىگى جوعارعى جانە تومەنگى سۇزگى تىستەردەن قۇرالعان. جوعارعى بولىگىندە قيماسى جۇمىر 13 ءىرى ءتىس بولسا, تومەنگى جاعى ءبارى بىردەي 79 ۇساق تىستەرمەن كومكەرىلگەن. تىستەردىڭ ەكى شەتىنە كونۋس پىشىندەگى دەكور ويىلىپ, ورتالىق بولىگى – تىك بۇرىشتى ورنەكتەرمەن بەزەندىرىلىپتى.
تاراقتىڭ ءدال ورتاسىندا ءبىر جاياۋ ساربازدىڭ اربادا وتىرعان قوس ساربازبەن سايىسى بەينەلەنگەن. «بۇل بەينە يراننىڭ احەمەنيدتەرى مەن دالا كوشپەندىلەرى اراسىنداعى ۇرىستىڭ كورىنىسى بولۋى مۇمكىن», دەيدى ارحەولوگ مامان يا.لۇقپانوۆا حانىم.
اربانىڭ استىڭعى جاعىندا التى شاباقتى بۇدىرلى دوڭگەلەك بەينەلەنسە, اربا جەگىلگەن جىلقىنىڭ جالى قىسقا, موينى دوعاشا يىلگەن, الدىڭعى اياقتارى بۇگىلگەن جانە جوعارى كوتەرىلگەن. ءتىپتى اتتىڭ اۋىزدىعى مەن بوجىسى انىق كورىنىپ تۇر. زەرتتەۋشىلەر تاراققا ب.د.د ءى مىڭ جىلدىقتىڭ مۇراسى دەگەن باعا بەرۋدە.
دايىنداعان بەكەن قايرات ۇلى,
«Egemen Qazaqstan»
