11-21 اقپان ارالىعىندا جەرگىلىكتى مەملەكەتتىك ورگانداردىڭ, وبلىستىق باسقارمالاردىڭ, قۇقىق قورعاۋ ورگاندارى مەن كوممۋنالدىق قىزمەتتەردىڭ باسشىلارى مەن ماماندارى 7154 سۇراقپەن 6359 ادامدى قابىلدادى. ازاماتتاردى قابىلداۋ اقتوبە قالاسىنىڭ ءتورت جەرىندە جانە وبلىستىڭ ءار اۋدانىندا وتكىزىلدى.
نەگىزىنەن ازاماتتاردى تۇرعىن ءۇي الۋ, اتاۋلى الەۋمەتتىك كومەك تاعايىنداۋ, ءبىلىم بەرۋ, دەنساۋلىق ساقتاۋ, تۇرعىن ءۇي-كوممۋنالدىق شارۋاشىلىق, جۇمىسقا ورنالاستىرۋ جانە ت.ب. سالالارعا قاتىستى ماسەلەلەر قىزىقتىرادى.
كوپتەگەن ماسەلە كۇن تارتىبىنەن جەدەل تۇردە الىنىپ تاستالىپ جاتىر. سونىمەن, 1231 ماسەلە وڭ شەشىلىپ, 4944 تۇسىنىكتەمە مەن كەڭەس بەرىلدى, 979 وتىنىش شەشىلىپ جاتىر.
«55 ادام تۇرعىن ءۇي الۋعا كەزەككە قويىلىپ, 27 ادام تۇراقتى جۇمىس ورىندارىنا ورنالاستىرىلدى, 27 ادام بىلىكتىلىك كۋرستارىنا جىبەرىلدى, 39 بالا تەگىن سەكتسيالار مەن ۇيىرمەلەرگە جازىلدى, 15 وقۋشى تەگىن تاماقپەن قامتىلىپ, 27 بالا بالاباقشاعا تەگىن ورنالاستى, سونداي-اق, 289 وتباسىنا اتاۋلى الەۋمەتتىك كومەك كورسەتىلدى», - دەپ حابارلادى وڭىرلىك كوممۋنيكاتسيالار قىزمەتىنەن.
ايماقتا اسا مۇقتاج وتباسىلارىمەن جۇمىس ىستەۋ ءۇشىن 25 ءموبيلدى توپ جۇمىس ىستەيدى, ولاردىڭ قۇرامىنا دەپۋتاتتار, قوعامدىق بەلسەندىلەر جانە مەملەكەتتىك قۇرىلىمداردىڭ وكىلدەرى كىرەدى.
توپ وكىلدەرى ءوتىنىش بەرۋشىلەردىڭ تۇرمىس جاعدايىمەن تانىسۋ جانە وتباسىنا قانداي ناقتى كومەك بەرۋ كەرەكتىگىن باعالاۋ ءۇشىن ءاربىر مەكەنجايعا بارادى.
جالپى 147 وتباسىنا كومەك كورسەتىلدى. مىسالى, «اكتوبەسترويەكسپەرت» كومپانياسىنىڭ ديرەكتورى جاستالاپ جانباۋوۆ سادۋوۆتارعا جايلى پاتەر سىيلادى. 47 جاسار «التىن القا» يەگەرى سالتانات سادۋوۆانىڭ سەگىز بالاسى بار, ونىڭ ەكەۋىنىڭ مۇگەدەكتىگى بار, جولداسى دا 2-توپتاعى مۇگەدەك.
التى بالانىڭ اناسى گالينا نوۆيكوۆاعا جەر تەلىمىن الۋعا سەرتيفيكات بەرىلدى, ال جەرگىلىكتى كاسىپكەر ءۇي سالىپ بەرۋ مىندەتىن الدى.
30 وتباسى كومىرمەن, 79 جانۇيا كيىم-كەشەكپەن قامتاماسىز ەتىلىپ, 6 بالانىڭ جوعارى وقۋ ورنىندا وقۋ اقىسى تولەندى, 5 ادامنىڭ كوممۋنالدىق قىزمەت بويىنشا قارىزدارى تولەندى. ماتەريالدىق كومەكتىڭ جالپى سوماسى 24,5 ملن تەڭگەدەن استى.
ناقتى كومەك الاتىنداردىڭ قاتارىندا كوپ بالالى انالار عانا ەمەس. قالامقاس ونعارباەۆا 2016 جىلى گۋمانيتارلىق كوللەدجدى بىتىرگەن.
«مەن جۇمىسقا ورنالاسا الماي ءجۇردىم. ال ازاماتتارعا قابىلداۋ ءجۇرىپ جاتقانىن ەستىگەندە, جۇمىسقا ورنالاسۋ ماسەلەسىمەن ءوتىنىش ءبىلدىرىپ, تۇيىندەمەمدى قالدىرعانمىن. مەنى №29 مەكتەپ جۇمىسقا شاقىردى. ناتيجەسىندە, مەنىڭ قازاق ءتىلى مەن ادەبيەت ءپانىنىڭ مۇعالىمى بولىپ جۇمىس ىستەگىم كەلگەن ارمانىم ورىندالدى», - دەدى قۋانىشتى جاڭالىعىمەن بولىسكەن جاس مامان.
13 اقپان كۇنى قالا تۇرعىنى سۆەتا تاجىباەۆا قوعامدىق قابىلداۋعا وزىنە جۇمىس تاۋىپ بەرۋگە ءوتىنىش بىلدىرگەن. ول ءبىر كەزدەرى تاربيەشىلىكتى مەڭگەرگەن, بىراق ەشقاشان ماماندىعى بويىنشا جۇمىس ىستەپ كورمەپتى.
«مەنىڭ سۇراعىم وسىنشا قىسقا مەرزىمدە شەشىلەدى دەپ كۇتپەگەن ەدىم. قازىر مەن №28 «كوركەم» بالاباقشاسىندا جۇمىس ىستەيمىن. مەن بۇل اكتسيا اياسىندا جۇزدەگەن ادامنىڭ ناقتى كومەك العانىنا سەنىمدىمىن», - دەيدى ول.
