وسى ماتەريالعا تاقىرىپ قويار كەزدە بەلگىلى مەملەكەت جانە قوعام قايرەتكەرى, كەزىندە قازاق كسر مينيسترلەر كەڭەسى توراعاسىنىڭ ورىنباسارى, ورتالىق كوميتەتتىڭ حاتشىسى جانە ورال وبلىسىنىڭ باسشىسى سەكىلدى جوعارى لاۋازىمدى قىزمەتتەردى ابىرويمەن اتقارىپ, حالىقتىڭ العىسىن ارقالاعان ازامات مۇستاحيم ىقسانوۆتىڭ ايتقان ءسوزى ويىمىزعا ورالعان ەدى. گاپ مىنادا. ول كىسى 1975 جىلدىڭ كوكتەمىندە ورال وبلىستىق پارتيا كوميتەتىنىڭ ءبىرىنشى حاتشىسى بولىپ تاعايىندالىپ, جايىق بويىنداعى قىزمەتىن باستايدى. وسى كەزدە وبلىستىق اتقارۋ كوميتەتى عيماراتىنىڭ توبەسىندە ء«بىزدىڭ ماقساتىمىز – كومۋنيزم» دەگەن ءىرى ارىپتەرمەن جازىلعان ايشىقتى جازۋلار كۇندىز-ءتۇنى تۇرعىنداردىڭ كوزىن ارباپ تۇرۋشى ەدى. كومۋنيستىك يدەيالاردىڭ بەلەڭ الىپ تۇرعان كەزى.
الايدا, سوعان قاراماستان, مۇسەكەڭ جانىنداعىلاردان مىنا جازۋ نە دەپ تۇر, نەنى بىلدىرەدى دەپ سۇراماي ما؟ وبلىس باسشىسىنىڭ تۇپكى ويىن ءدوپ باسىپ ايتا الماعان ولار قاپەلىمدە نە دەپ جاۋاپ قايتارارىن بىلمەي, توسىلىپ قالادى. سوندا م.ىقسانوۆ وعان ءوزى جاۋاپ قايتارىپ, بۇل تىم جالپىلاما ايتىلعان ءسوز. مۇندا ەشقانداي ناقىتىلىق جوق. بۇدان ءدا بىزدىڭ ماقساتىمىز 270 وتباسىنا ءۇي بەرۋ دەپ جازبايسىزدار ما دەيدى دە, كومۋنيزمدى كوكسەگەن ۇراندى الدىرتىپ تاستايدى. سول كەزدە بۇلاي ايتۋعا دا, بۇلاي ىستەۋگە دە بولمايتىن. الايدا, ىقسانوۆ ەشكىمنەن قايمىقپاي, تۇپ-تۋرا وسىلاي ىستەيدى.
قوعام قايراتكەرى وسى ايتقان سوزىندە تۇردى دا. 5-6 جىلدىڭ ىشىندە ورال قالاسىندا تۇرعىن ءۇي قۇرىلىسى قىزۋ قارقىن الىپ, جۇزدەگەن وتباسى دەربەس باسپاناعا يە بولدى. ءتالىم الا جۇرەرلىك وسى جايتتى ەسكە سالىپ وتىرعان سەبەبىمىز, وسىعان ۇقساس قايراتكەرلىك رۋحتاعى كورىنىس اقتوبە وبلىسىندا بولىپ وتىرعانى. اتاپ ايتقاندا, وڭىردە تاياۋداعى جىلداردا مىڭداعان دەگەن ولشەممەن ەسەپتەلەتىن وتباسىنىڭ وتە ۇلكەن شوعىرى مەن قالىپ توپتارىن باسپانامەن قامتۋ جونىندە بيىك مەجە بەلگىلەنگەن.
سوعان سايكەس 2030 جىلعا دەيىن وتباسىنداعى ءاربىر تۇرعىنعا شاققاندا كەم دەگەندە وتىز شارشى مەتر باسپانا بولۋى جونىندەگى باعدارلاما قولعا الىنعان. بۇل جونىندە وبلىستىق ءماسليحاتتىڭ قۇرىلىس, كولىك جانە تۇرعىن ءۇي كوممۋنالدىق شارۋاشىلىعى جونىندەگى تۇراقتى كوميسسيانىڭ ماجىلىسىندە وبلىس اكىمىنىڭ ورىنباسارى سەرىك تولەنبەرگەنوۆ بايانداپ بەردى.
بولاشاققا بەلگىلەنگەن بۇل جوسپارىمىز مەملەكەت باسشىسىنىڭ قازاقستان حالقىنا ارناعان جولداۋىندا قويىلعان مىندەتتەرگە سايكەس ورىستەپ وتىر. ءسوز جوق, مۇنىڭ ءوزى ورىندالماستاي كورىنەتىن اسا اۋقىمدى ءىس. دەگەنمەن, كوز قورقاق, قول باتىر دەگەندەي, وسىنداي وتكەل بەرمەس اسۋعا تاۋەكەلدىك جاساعان جايىمىز بار. تەتىكتى ورنىنان قوزعاۋ ءۇشىن ءبىرىنشى كەزەكتە جىل سايىن جۇرگىزىلەتىن قۇرىلىس كولەمىن 8-10 پايىز دەڭگەيگە دەيىن ءوسىرۋدى ۇيعارىپ وتىرمىز دەدى ول بۇدان ءارى. وسى اسقارالى جوباعا بايلانىستى ءوز وي-پىكىرلەرى مەن ۇسىنىستارىن ورتاعا تاستاعان ءماسليحات دەپۋتاتتارى ءبىرىنشى كەزەكتە باسپانانىڭ قولجەتىمدىلىك سيپاتى مەن ساپاسى تۇرۋى كەرەكتىگىن مالىمدەدى.
سونداي-اق, ولاردىڭ ويىنشا, تۇرعىزىلعان باسپانالار ەڭ الدىمەن تۇرعىنداردىڭ الەۋمەتتىك-تۇرمىستىق جاي-كۇيى كۇردەلى بولىكتەرىنە بەرىلۋگە ءتيىس. اتالعان ماسەلە وبلىستىق ءماسليحاتتىڭ الداعى وتكىزىلەتىن سەسسياسىندا قارالماق.
تەمىر قۇسايىن,
اقتوبە
