ءبىرىنشى كەزەڭنىڭ 5-مينۋتىندا ەگور پەتۋحوۆ ەسەپ اشقانىمەن, ايدىن يەلەرى لەزدە ەسەپتى تەڭەستىرىپ كەتتى. ۇزىلىستەن كەيىن «كۋنلۋن» العا شىقتى. دەسەك تە ءۇشىنشى كەزەڭدە «بارىستىڭ» ويىنشىسى اندرە پەتەرسسون مەرگەندىك تانىتتى. نەگىزگى ۋاقىتتا جەڭىمپاز انىقتالماعاندىقتان ويىن وۆەرتايمعا ۇلاستى. بۇل رەتتە دە تەڭ ەسەپ ساقتالدى. ال بۋلليت سوعۋ بارىسىندا استانالىقتاردىڭ اسىعى الشىسانان ءتۇستى. قورىتىندى ەسەپ – 2:3.
وسىلايشا, «بارىس» قحل-دىڭ تۇراقتى بىرىنشىلىگىندەگى ءوزىنىڭ ەڭ ۇزدىك ناتيجەسىنە قول جەتكىزدى. جەرلەستەرىمىز چەرنىشەۆ ديۆيزيونىندا كوش باستاپ, شىعىس كونفەرەنتسياسىندا ەكىنشى ورىندى يەلەندى. تۇراقتى بىرىنشىلىكتى بەسىنشى ورىنمەن قورتىندىلادى. ايتۋلى جارىس بارىسىندا 62 كەزدەسۋ وتكىزگەن ەلوردالىق حوككەيشىلەر 86 ۇپايدى ەنشىلەدى.
ەندى «بارىس» گاگارين كۋبوگى ءۇشىن تالاسادى. پلەي-وففتىڭ ءبىرىنشى كەزەڭىندە تومەنگى نوۆگورودتىڭ «تورپەدوسىمەن» شەبەرلىك بايقاسامىز. العاشقى ەكى ويىن 26 جانە 28 اقپاندا استانادا وتەدى. ودان كەيىن 2 جانە 4 ناۋرىزدا سىرتتا كۇش سىناسامىز.
عالىم سۇلەيمەن,
«Egemen Qazaqstan»
