«ەگەمەن قازاقستان» گازەتىنىڭ 100 جىلدىق مەرەيتويى اياسىندا باسىلىمدا ۇزاق جىل سەمەي ءوڭىرى بويىنشا ءتىلشى بوپ ەڭبەك ەتكەن, جازۋشى-دراماتۋرگ, جۋرناليست, ەلباسىنىڭ «التىن بارىس» ءتوس بەلگىسىنىڭ يەگەرى داۋلەت سەيسەن ۇلىنىڭ 70 جاسقا تولۋ مەرەيتويى اتالىپ ءوتىلدى. اباي اتىنداعى دراما تەاتر ساحناسىندا ەڭ الدىمەن داۋلەت سەيسەن ۇلىنىڭ «جانىبەك ءان سالادى...» اتتى دراما رەكۆيەمى قويىلدى. قويىلىمنىڭ رەجيسسەرى ەربول جۋاسبەك.
كەش بارىسىندا داۋلەت سەيسەن ۇلى سەمەي قالاسىنىڭ جانە اباي اۋدانىنىڭ قۇرمەتتى ازاماتى, قالامگەردىڭ «ەگەمەن قازاقستان» گازەتىنىڭ تۇراقتى اكتسياسىنا اينالعان « ۇلىلىققا تاعزىم» اتتى جاياۋ جورىق ەكسپەديتسياسىنىڭ مۇشەسى بولعاندىعى جانە بۇل جورىقتىڭ اتالمىش گازەتتىڭ ارداگەرى ماماديار جاقىپتىڭ باستاماسىمەن ابايدىڭ 150 جىلدىعىندا باستالعاندىعى تۋرالى دا ايتىلدى.
سەمەيلىك ايتىسكەر اقىن ماناربەك ساتىبالدين ۇستازى داۋلەت سەيسەن ۇلىنا ارناپ جىردان شاشۋ شاشتى. كەلەسى كەزەكتە سەمەي قالاسىنىڭ اكىمى ەرماك ءسالىموۆ ساحناعا كوتەرىلىپ, پرەزيدەنت اكىمشىلىگىنىڭ, وبلىس اكىمى دانيال احمەتوۆتىڭ قۇتتىقتاۋلارىن وقىپ, ارنايى سىي-سىياپات جاسادى. سونداي-اق, قر مادەنيەت جانە سپورت مينيسترلىگىنەن كەلگەن قۇتتىقتاۋلار دا وقىلدى. ساحنا تورىنە 100 جىلدىق تاريحى بار «ەگەمەن قازاقستان» رەسپۋبليكالىق گازەتى اكتسيونەرلىك قوعامىنىڭ باسقارما توراعاسى دارحان قىدىرالى شىعىپ, داۋلەت سەيسەن ۇلىنا ۇجىم اتىنان جىلى لەبىزىن ءبىلدىرىپ, قازاقى داستۇرمەن شاپان جاپتى. ارنايى ماراپاتتاپ, «ەگەمەن قازاقستان» باسىلىمى ارداگەرلەرىن وسىلاي ۇلىقتاپ, قۇرمەتتەپ وتىرۋدى ءداستۇر رەتىندە جالعاستىرا بەرەتىندىكتەرىن تىلگە تيەك ەتتى. بۇدان كەيىن جازۋشىلار وداعى توراعاسىنىڭ ورىنباسارى, اقىن باۋىرجان جاقىپ, اكادەميك-جازۋشى عاريفوللا ەسىم, مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى, جازۋشى تۇرسىن جۇرتباي, ونەرتانۋ پروفەسسورى كەنجەعالي مىرجىقباەۆ, «ەگەمەن قازاقستان» گازەتىنىڭ ارداگەر-ءجۋرناليسى وڭداسىن ەلۋبايلار دا ساحنا تورىنە شىعىپ, كەش يەسىنە يگى تىلەكتەرىن, ءىلتيپاتتارىن ءبىلدىردى.
سونداي-اق داۋلەت سەيسەن ۇلىنىڭ باسپادان جاڭا شىققان «شىڭعىستاۋدىڭ دارا دا داڭقتى پەرزەنتتەرى» اتتى كىتابىنىڭ تۇساۋكەسەرى ءوتتى. كىتاپ جايلى ەتنوگراف-جازۋشى مولدابەك جانبولات ۇلى ارنايى تانىستىردى. مولدابەك جانبولات ۇلى كىتاپ اۆتورىن 70 جاسىمەن جانە ول ەڭبەك ەتكەن «ەگەمەن قازاقستان» گازەتىن 100 جىلدىعىمەن قۇتتىقتاي كەلە بىلاي دەدى:
- داۋلەت ءىنىمىزدىڭ 50,60,70 جاستارى ىلعي «ەگەمەن قازاقستاننىڭ» مەرەيتويىمەن تۇسپا-تۇس كەلىپ, سەمەيدە اتالىپ وتىلەدى. بۇنىڭ ءبىر وزىندىك سىرى بار. سەبەبى «ەگەمەن قازاقستان» گازەتىنىڭ ەڭ العاشقى سانى وسى سەمەيدە باسىلىپ شىققان. 100 جىل ىشىندە بۇل گازەت تالاي سىندارلى ساياساتتان, تالاي سوقپاقتان ءوتتى. باسىلىمدا شەرحان مۇرتازا, ءابىش كەكىلباەۆ, ساۋىتبەك ءابدىراحمانوۆ سىندى تۇلعالار رەداكتور بولدى. بۇل گازەت ءبىر كەزدەرى الاشورداشىلاردىڭ, ودان سوڭ پارتيانىڭ, كەيىن تاۋەلسىز قازاقستاننىڭ ءتول باسىلىمى بولدى. قانداي ۋاقىت بولسا دا, بۇل گازەت حالقىنا ەتەنە جاقىن بولدى. بۇگىندە دارحان باۋىرىمىز باسقاراتىن ۇجىمنىڭ بەدەلى بيىك بولسىن دەگىمىز كەلەدى. توي تويعا ۇلاسسىن! داۋلەتتىڭ دە, ول ەڭبەك ەتكەن «ەگەمەن قازاقستاننىڭ» دا مەرەيلەرى ۇستەم بولسىن.
راۋشان نۇعمانبەك,
«ەگەمەن قازاقستان»
سەمەي
