– وبلىستىق بيۋدجەتتىڭ 50% الەۋمەتتىك سالاعا باعىتتالادى. مەملەكەت باسشىسىنىڭ تاپسىرماسىن ورىنداۋ اياسىندا ءبىز مەملەكەتتىك قولداۋ شارالارىنىڭ شەڭبەرىن ۇلعايتۋ جونىندە شەشىم قابىلدادىق, – دەپ اتاپ ءوتتى ول.
وسىعان وراي ول كوپبالالى جانە از قامتىلعان وتباسىلاردىڭ جاعدايىن جاقسارتۋ ءۇشىن ارنايى جاسالعان 10 قادامدى اتاپ ءوتتى. ياعني, كوپبالالى انالار قوسىمشا كومەك الاتىن بولادى. مىسالى, 1 ماۋسىمنان باستاپ ولار قالاداعى قوعامدىق كولىكتەردە تەگىن جۇرەدى. كوپبالالى وتباسىلاردىڭ تومەنگى سىنىپتاردا وقيتىن بالالارى تەگىن ىستىق تاماقپەن قامتاماسىز ەتىلەدى. سونداي-اق, بالاباقشا اقىسىنا 50% جەڭىلدىك جاسالادى.
بۇدان بولەك, كوپبالالى وتباسىلاردىڭ بالالارى مۋزىكالىق جانە كوركەمونەر مەكتەپتەرىندە, سپورت ۇيىرمەلەرىندە تەگىن جاتتىعا الادى. جازدا بالالار مەكتەپ جانىنداعى لاگەرلەرگە ورنالاستىرىلاتىن بولادى.
بۇدان بولەك,ءوڭىر باسشىسى وبلىستىق بيۋدجەتتەن كوللەدجدەردە وقىتۋ ءۇشىن 5,5 ملرد تەڭگە بولىنەتىنىن ايتتى. مۇنىڭ ءوزى 8 مىڭ گرانت بولۋگە مۇمكىندىك بەرەدى.
سونىمەن قاتار, كوپبالالى انالارعا جەكە ءىسىن اشۋ ءۇشىن 200 گرانت بولىنەدى. ولار ءۇشىن بيزنەس-ينكۋباتور قۇرىلادى. بۇعان قوسىمشا, وتباسىن قولداۋ جونىندە ورتالىق اشۋ جوسپارلانعان. بۇل جەردە ولارعا ماماندار مەن پسيحولوگتار كومەك بەرەدى.
قايرات ءابىلدا,
«ەگەمەن قازاقستان»
قاراعاندى
