سىبايلاس جەمقورلىققا قارسى ءىس-قيمىل ۇلتتىق بيۋروسى توراعاسىنىڭ ورىنباسارى شىڭعىس قابدولانىڭ ايتۋىنشا, مەموراندۋم كەشە, 21 اقپاندا راسىمدەلگەن بولاتىن. الايدا جوعارعى سوتتىڭ ىشكى قاۋىپسىزدىك قىزمەتىمەن بىرلەسكەن جۇمىس ەكىجاقتى قۇجاتتى راسىمدەۋگە دەيىن باستالىپ كەتكەن.
«ماسەلەن, الماتى قالاسىندا اۋەزوۆ اۋداندىق سوتىنىڭ سۋدياسى ا.شتەينكە 10 مىڭ دوللار كولەمىندە پارا الۋ ۇستىندە ۇستالعان بولاتىن. بۇل دا بىرلەسكەن جۇمىستىڭ ناتيجەسى. جالپى, ءبىز وسىنداي مەموراندۋمداردى راسىمدەۋ ارقىلى باسقا دا مەملەكەتتىك ورگانداردىڭ ىشكى قاۋىپسىزدىك قىزمەتتەرىن كۇشەيتۋدى كوزدەيمىز. وسىلايشا, اتالعان قۇرىلىمداردىڭ مارتەبەسى دە كوتەرىلەدى», - دەدى ش.قابدولا استانادا وتكەن ءباسپاسوز ءماسليحاتىندا.
ال جوعارى سوتتىڭ ىشكى قاۋىپسىزدىك جانە جەمقورلىقتىڭ الدىن الۋ ءبولىمىنىڭ مەڭگەرۋشىسى قايرات بيجانوۆتىڭ سوزىنە قاراعاندا, بىرلەسكەن جۇمىستىڭ اياسىندا سان الۋان شارا اتقارىلادى. سونىڭ ىشىندە جەمقورلىقپەن اشىق كۇرەس پەن پروفيلاكتيكالىق جۇمىستار بار.
«بىرلەسكەن جۇمىس اياسىندا ءبىز ەڭ الدىمەن جەمقورلىققا قارسى كۇرەستى اشىق كورسەتەتىن بولامىز. سوسىن سوت سالاسىنداعى جەمقورلىققا قاتىستى بۇقارالىق اقپارات قۇرالدارىنا شىققان ماتەريالدارعا مونيتورينگ جۇرگىزەمىز. قوعامدىق پىكىردى دە قاداعالاپ وتىرامىز. ارينە, جەمقورلىق ارەكەتتەردىڭ الدىن الۋ شارالارىنا باسىمدىق بەرەتىن بولامىز», - دەپ اتاپ كورسەتتى ق.بيجانوۆ.
ايتا كەتەيىك, بۇگىنگى بريفينگتە سىبايلاس جەمقورلىققا قارسى ءىس-قيمىل ۇلتتىق بيۋروسى توراعاسىنىڭ ورىنباسارى ش.قابدولا ءتورت سۋديانىڭ جۇمىستان بوساتىلعانىن جەتكىزدى. ولاردىڭ بارلىعى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ۇسىنىسىمەن جۇمىستان بوساتىلعان.
