قازاقستان • 21 اقپان، 2019

سەمەيلىك وقۋشى-كاسىپكەر ءنادىر ءسابيتوۆ جيھاز شىعاراتىن تسەح اشتى

321 رەتكورسەتىلدى

سەمەيلىك ءنادىر ءسابيتوۆ «Startup Battle» بايقاۋىنىڭ گرانتىن جەڭىپ الىپ، جۇمساق  جيھاز شىعاراتىن تسەح اشقان. كاسىپكەرلىكتى ناسيحاتتايتىن شارانى اتالعان قالاداعى قازاق يننوۆاتسيالىق گۋمانيتارلىق-زاڭ ۋنيۆەرسيتەتى ۇيىمداستىرىپتى.

ءنادىر سەمەي قالاسىنداعى №30 جالپى ءبىلىم بەرەتىن ورتا مەكتەپتىڭ ون ءبىرىنشى سىنىبىندا وقيدى. سايىسقا سول قالاداعى كاسىپكەرلىكتىڭ داڭعىل جولىنا ءتۇسۋدى جوسپارلاپ جۇرگەن، سونداي-اق وعان ناقتى قادامداردى مەكتەپ قابىرعاسىندا-اق جاساپ ۇلگەرگەن جاسامپاز، جارقىن ويلى وقۋشىلار قاتىسقان. بىلىكتى ءام بىلىمدىلەر باق سىناعان بايقاۋدا باعى مەن بابى قاتار كەلىسكەن ن.ءسابيتوۆ جيھاز ءوندىرىسى بويىنشا ءوز جوباسىن قورعاپ، كوپ ىشىنەن سۋىرىلىپ گرانت يەلەنەدى. بايقاۋدىڭ ۇيىمداستىرۋشىسى دياس سماعۇلوۆ: «بۇل بايقاۋ وسىعان دەيىن ستۋدەنتتەرگە ارنالعان ەدى. مۇنداي مۇمكىندىك وقۋشىلارعا بىلتىر ءبىرىنشى رەت بەرىلدى. سونىڭ جەمىسى – جاڭا كاسىپكەردىڭ قاتارىمىزعا قوسىلۋى. بۇل شارا بىلتىر قازان ايىندا ءوتتى. ال بيىل جاستار جىلىنا وراي مۇنداي سايىستاردى توقسان سايىن ۇيىمداستىرۋدى جوسپارلاپ وتىرمىز»، دەيدى. ونىڭ ايتۋىنشا، دياس قازىردىڭ وزىندە جارىستا قورعاعان بيزنەس جوباسىنداعى بىرنەشە جىلدىق ناتيجەگە جەتىپ ءجۇر.

ون ءبىرىنشى سىنىپ وقۋشىسى ۋنيۆەرسيتەتتىڭ بيزنەس-ينكۋباتورىنا قاراستى «Fox» ورتالىعى ۇيىمداستىراتىن شەبەرلىك سىنىپتار مەن دارىستەرگە ۇدايى قاتىسىپ، ءوزىن جەتىلدىرىپ جۇرگەن. ورتالىق ساباقتارىنداعى جيعان ماركەتينگ، ساتۋ جانە ديزاين تۋرالى بىلىمدەرى ونى سەمەي نارىعىن جاۋلاپ الۋعا جاردەمدەسىپتى. «گرانتتىڭ قارجىسى كاسىبىمە العاشقى ينۆەستيتسيا، ال وزىمە موتيۆاتسيا بەردى. سىنىپتاستارىممەن بىردەي مەكتەپكە بارامىن، ساباقتان قالمايمىن. ءۇي تاپسىرمالارىنان بوساعاندا تسەحتىڭ جۇمىسىمەن اينالىسامىن»، دەيدى كاسىپكەر وقۋشى. ايتا كەتەيىك، ءنادىردىڭ اناسى تىگىنشى، ول بالاسىنىڭ جۇمىس جۇرگىزۋىنە، ءونىمنىڭ ساپالى بولۋىنا باس كوز بولىپ، العاش اشقاندا جالدايتىن ورىندى تاڭداۋعا كومەكتەسكەن.

جاس كاسىپكەر ءوزىنىڭ ونىمدەرىن «قاڭقاسىز جيھاز» دەپ تە اتايدى ەكەن. ويتكەنى ولار اعاش، تەمىر سەكىلدى ۇلكەن، اۋىر ماتەريالداردى قاجەت ەتپەيدى، ياعني بۋىنسىز بىلقىلداپ تۇراتىن جۇمساق ويىنشىقتار ىسپەتتى. الايدا ونى جۇمساق جيھازدارعا ارنالعان پەنوپوليستيرولمەن اۋىر سالماقتى كوتەرە الاتىنداي تىعىز تولتىرادى. ءارى جۇمساق، ءارى ىڭعايلى ديۆان، ورىندىق، ۇستەلدەردى ەۋروپالىق جۇمىس بولمەلەرىن جاساقتايتىن كومپانيالار مەن ەرەكشە ينتەرەردى قالايتىندار كوبىرەك ساتىپ الاتىن كورىنەدى. قازىر كاسىپكەردىڭ تسەحىندا ەكى تىگىنشى جانە ءبىر اسسيستەنت قىزمەت ەتەدى. ءنادىردىڭ شاعىن تسەحى شىعاراتىن جۇمساق، شاشاقتى جيھاز قاپتارعا جوعارى سۇرانىس بار ەكەن.

وسى كۇنى وسكەمەن مەن پاۆلودار تۇرعىندارى ونىڭ ونىمدەرىن تۇتىنادى. وزگە قالالاردان سۇرانىس تۇسكەن، جەتكىزىپ بەرۋدى دە جولعا قويىپتى. كاسىپكەر كوشباسشى قاراماعىنداعى قىزمەتكەرلەر سانى مەن تاۋارلارعا دەگەن سۇرانىستى ارتتىرۋ ءۇشىن ينۆەستورلار تارتىپ، كاسىبىنىڭ ءورىسىن كەڭەيتۋدى كوزدەيدى. كاسىپكەر-وقۋشى بۇل ماقساتقا قازاقستان نارىعىن باعىندىرىپ، تمد ەلدەرىنە شىعۋ ارقىلى قول جەتكىزۋدى جوسپارلاپ وتىر.

ايدانا شوتبايقىزى،

«Egemen Qazaqstan»

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار