وتىرىستى اشقان ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى گلەب ششەگەلسكي وڭىردەگى گيدرورەجيمنىڭ تۇراقتىلىعىن قامتاماسىز ەتۋدىڭ جانە كىشى ارال تەڭىزىنىڭ تۇزدانۋىنا جول بەرمەۋدىڭ ماڭىزدىلىعىنا ەرەكشە توقتالدى.
ويتكەنى ارال ءوڭىرىنىڭ الەۋمەتتىك-ەكونوميكالىق دامۋىن تۇراقتاندىرۋ بويىنشا قابىلداناتىن شارالاردا ارالدىڭ ەكولوگيالىق جاعدايىن جاقسارتۋ باستى مىندەت بولىپ تابىلادى. وسى ورايدا, دەپۋتات دوڭگەلەك ۇستەل تاقىرىبىنىڭ وزەكتىلىگىن, تالقىلانىپ وتىرعان ماسەلەنىڭ اۋقىمدىلىعى مەن كۇردەلىلىگىن اتاپ ءوتتى.
دوڭگەلەك ۇستەل جۇمىسىن جۇرگىزگەن ءماجىلىس دەپۋتاتى گەننادي شيپوۆسكيح قىزىلوردا وبلىسىنىڭ اعىمداعى جاعدايىمەن جانە شەشىمىن تاپپاي وتىرعان ماسەلەلەرىمەن تانىسۋ ماقساتىندا ارالدا ارنايى ءىسساپاردا بولدى. تالقىلانعان تاقىرىپتىڭ اياسىندا ەنەرگەتيكا ۆيتسە-ءمينيسترى ءسابيت نۇرلىباي ارال پروبلەماسىنىڭ ەكولوگيالىق اسپەكتىسىنە توقتالسا, اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى قايىر رىسكەلدينوۆ ارال وڭىرىندەگى بالىق جانە ورمان شارۋاشىلىقتارىنىڭ دامۋ ماسەلەلەرىمەن تانىستىردى. سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ايىمدوس بوزجىگىتوۆ ارال پروبلەماسىنىڭ حالىقارالىق دەڭگەيدە قاراستىرىلۋى تۋرالى ءسوز قوزعادى. وتىرىس بارىسىندا قىزىلوردا وبلىستىق ءماسليحاتىنىڭ حاتشىسى ناۋرىزباي بايقاداموۆ ارال ءوڭىرى حالقىنىڭ ءومىر ءسۇرۋ ساپاسىن جاقسارتۋدىڭ بىرقاتار ماسەلەلەرى, اقتوبە وبلىسى شالقار اۋدانىنىڭ اكىمى باۋىرجان قانيەۆ ارال پروبلەماسىنىڭ اقتوبە وبلىسىنىڭ ەكولوگياسىنا اسەرى, ونىڭ ىشىندە شالقار كولىنىڭ ءتۇبىن تازارتۋ تۋرالى ءسوز سويلەدى. حالىقارالىق ارالدى قۇتقارۋ قورىنىڭ قازاقستان رەسپۋبليكاسىنداعى اتقارۋشى ديرەكتسياسىنىڭ ديرەكتورى بولات بەكنياز قوردىڭ وتكەن جىلداردا اتقارعان جۇمىسىنىڭ قورىتىندىلارى جانە ارال ءوڭىرىنىڭ ەكولوگيالىق قاۋىپسىزدىگىن ەسكەرە وتىرىپ, سۋ قاتىناستارىن رەتتەيتىن قۇقىقتىق جانە ينستيتۋتسيونالدىق تەتىكتەردى دامىتۋ بويىنشا قابىلدانۋعا ءتيىس شارالار جونىندە ايتىپ بەردى.
ورتالىق ازيانىڭ وڭىرلىك ەكولوگيالىق ورتالىعىنىڭ قازاقستان رەسپۋبليكاسىنداعى ەلدىك كەڭسەسىنىڭ وكىلى الينا ماقساتوۆا ارال تەڭىزى باسسەينىندە كليماتتىڭ وزگەرۋىنە بەيىمدەلۋ جانە ونىڭ سالدارىن جۇمسارتۋ جونىندەگى باعدارلاما تۋرالى اقپارات بەردى. اتالعان ماسەلەنى تالقىلاۋ بارىسىندا دوڭگەلەك ۇستەلگە قاتىسۋشىلار ارال ءوڭىرىنىڭ وزەكتى سۋ-شارۋاشىلىق جانە الەۋمەتتىك-ەكونوميكالىق ماسەلەلەرىنە باستى نازار اۋداردى.
ءىس-شاراعا ءماجىلىس دەپۋتاتتارى, بىرقاتار مينيسترلىكتەردىڭ, قىزىلوردا, اقتوبە وبلىستارىنىڭ اكىمدىكتەرى, حالىقارالىق ارالدى قۇتقارۋ قورىنىڭ قازاقستان رەسپۋبليكاسىنداعى اتقارۋشى ديرەكتسياسى, دۇنيەجۇزىلىك بانك, ازيا دامۋ بانكى, ورتالىق ازيانىڭ وڭىرلىك ەكولوگيالىق ورتالىعىنىڭ قازاقستان رەسپۋبليكاسىنداعى ەلدىك كەڭسەسى, بىرىككەن ۇلتتار ۇيىمىنىڭ اينالاداعى ورتا جونىندەگى باعدارلاماسىنىڭ (يۋنەپ) وكىلدەرى قاتىستى. دوڭگەلەك ۇستەل جۇمىسىنىڭ قورتىندىلارى بويىنشا ءتيىستى ۇسىنىستار قابىلداندى.
