كەزدەسۋ استانا ۋاقىتىمەن 20:00-دە باستالادى. ال 24 اقپان كۇنى رۋستام ەرعاليەۆ باستاعان كوماندا ءوز جەرىمىزدە فيليپپينگە قارسى ويناپ, كىم مىقتىنى انىقتايدى. تاپ وسى ەكى كەزدەسۋدەن سوڭ قازاقستان باسكەتبولشىلارىنىڭ قىتايداعى الەم چەمپيوناتىنا قاتىسۋ-قاتىسپاۋى ناقتى بەلگىلى بولماق.
باسكەتبولدان قازاقستان قۇراماسى بىردە-ءبىر رەت الەم چەمپيوناتىنا قاتىسىپ كورگەن جوق. ال 2019 جىلعى الەم بىرىنشىلىگىنە ازيا ايماقتىق ىرىكتەۋ كەزەڭىندە ءبىزدىڭ قۇراما 10 ويىننىڭ تورتەۋىندە جەڭىسكە جەتىپ, F توبىندا بەسىنشى ساتىدا كەلەدى.
ەگەر قازاقستان قۇراماسى ءوز جەرىندە اۆستراليا مەن فيليپپينگە قارسى وتەتىن ماتچتا ۇپاي جوعالتپاسا, F توبىندا ءتورتىنشى ورىنعا كوتەرىلگەن قۇرامانىڭ الەم چەمپيوناتىنا جولداما الۋ مۇمكىندىگى جوعارىلاماق. ول ءۇشىن كوماندا جەڭىسىنەن بولەك, ە توبىنداعى يوردانيانىڭ ءساتسىز ويىن كورسەتۋى دە ماڭىزدى بولاتىنىن ەسكەرتەمىز.
باسكەتبولدان قازاقستان كومانداسىنىڭ ازىرگە ەڭ ۇلكەن جەتىستىگى – پۋساندا وتكەن ازيا ويىندارىنداعى قولا جۇلدە. ال 2013 جىلى باسكەتبولشىلارىمىز ازيا كۋبوگىندە 8-ءشى ورىن يەلەنىپ, الەم چەمپيوناتىنا ءبىرتابان جاقىنداعان ەدى.
ساراپشى ەنتسو فلوحو قازاقستان كومانداسىنىڭ الداعى ەكى ويىنىنا بولجام جاساپ, قۇرامانىڭ الەم چەمپيوناتىنا قاتىسۋ مۇمكىندىگى قاي دەڭگەيدە ەكەنىن ايتتى.
«قازاقستان سىرت الاڭدا فيليپپينگە سەس كورسەتىپ, كەيىن جاپونيادان جەڭىلدى. الايدا, ولار ءالى جەڭىس ءۇشىن تالاسادى. ءوز جەرىندە وتەتىن ەكى ويىندا قازاقستان ساپىنا ەنتوني كلەممونس قوسىلماقشى. بۇل ويىنشى كوماندانى كۇشەيتەرى ءسوزسىز. دەگەنمەن, ەكى ويىن دا «دالا ارلاندارى» ءۇشىن وڭايعا سوقپايتىنىن ايتكى كەلەدى. اۆستراليا الەم چەمپيوناتىنا جولداما العانىنا قاراماستان, سوڭىنا دەيىن شايقاسادى. ويتكەنى, چەمپيونات بارىسىندا جاقسى توپقا ءتۇسۋ ءۇشىن بارىن سالادى. فيليپپين ءوز جەرىندە كەتكەن ەسەنى قايتارىپ, سوڭعى جولداماعا تالاسادى. قازاقستان جەڭىسكە جەتۋ ءۇشىن ولاردىڭ ەڭ ماڭىزدى ويىنشىلارى – رۇستەم ەرعالي, الەكسەي جيگۋلين جانە انتون بىكوۆتار ايانىپ قالماۋى كەرەك», - دەيدى مامان.
ەسكە سالا كەتەيىك, باسكەتبولدان الەم چەمپيوناتى 31 تامىز بەن 15 قىركۇيەك ارالىعىندا قىتايدا وتەدى.
