حالىقتى جۇمىسپەن قامتۋ ورتالىعىندا مالىمدەگەندەي, قازىرگى تاڭدا استانانىڭ ەڭبەك نارىعىندا سۇرانىسقا يە ماماندىقتاردىڭ قاتارىندا تاربيەشىلەر, ناۋبايشىلار, اسپازدار, تىگىنشىلەر, شاشتارازدار, ەلەكتر مەن گاز دانەكەرلەۋشىلەر, ساۋدا مەنەدجەرلەرى, باقىلاۋشىلار, كاسسيرلەر مەن داياشىلار بار.
«قازىر ءتورت مىڭنان استام بوس جۇمىس ورنى بار. الايدا, جوعارىدا اتالعان سالالاردا دايىن مامانداردىڭ تاپشىلىعى بايقالادى. جاستار ءوز ماماندىقتارى بويىنشا جۇمىسقا ورنالاسپايدى. باستى سەبەپ – ماماندىقتى دۇرىس تاڭداماۋ» دەلىنگەن ورتالىقتىڭ تاراتقان حابارلاماسىندا.
وسى رەتتە حالىقتى جۇمىسپەن قامتۋ ورتالىعى قىسقا مەرزىمدى كۋرستاردى ۇيىمداستىرۋدا. ماماندىعىن وزگەرتكىسى كەلگەن ءار ادام جاس ەرەكشەلىگىنە قاراماستان كەلىپ باسقا ماماندىققا قايتا وقي الادى. وسى جىلى ارۋجان اقپار 18 جاسقا تولدى. ول ۇبت-دەن ءتيىستى ۇپاي جيناي الماي, جوو تۇسە الماعان. وسىلايشا ارۋجان حالىقتى جۇمىسپەن قامتۋ ورتالىعىنىڭ كومەگىنە جۇگىنگەن بولاتىن. ول قىسقا مەرزىمدى كۋرستا وقىپ, ناۋبايشى ماماندىعىن يگەرىپ شىقتى.
«حالىقتى جۇمىسپەن قامتۋ ورتالىعى وقۋعا جانە جۇمىسقا ورنالاسۋعا كومەكتەسەدى دەگەندى ەستىپ, قۇجاتتارىمدى الىپ ورتالىققا كەلدىم. ۋاقىت كەتىرمەي بىردەن ناۋبايشى ءاليا سەرگەەۆانىڭ شاكىرتى اتاندىم. وقۋ پروتسەسىندە ناندى ءپىسىرۋ تەحنيكاسىن جانە ءتاتتى تاعامداردىڭ كوپتەگەن تۇرلەرىن ءپىسىرىپ ۇيرەندىم, سوندا پراكتيكادان ءوتتىم, ال كەيىن جۇمىسقا ورنالاستىم», دەيدى ورتالىق شاكىرتى.
جاس مامان ءوز ءىسىنىڭ ناعىز شەبەرى اتاندى. ارۋجانعا تاپسىرىس بەرۋشىلەر كوپ, ال ەڭ باستىسى – ول ءوز جۇمىسىن جاقسى كورەدى. قولى بوساعاندا ارۋجان ءتاتتى تاعامدارىن الەۋمەتتىك جەلى ارقىلى ساتىپ قوسىمشا تابىس تابادى.
ء«بىز جۇمىسى جوق ادامدارعا قىسقا مەرزىمدى كۋرستان ءوتۋدى ۇسىنامىز. ءبىزدىڭ كۋرستار ديپلومى, تاجىريبەسى جوق جانە ماماندىعىن اۋىستىرعىسى كەلەتىن جاندارعا ارنالعان. وقۋ ماماندىق تاڭداۋىنا بايلانىستى 1 ايدان 3 ايعا دەيىن جالعاسادى» دەدى استانا قالاسى حالىقتى جۇمىسپەن قامتۋ ورتالىعىنىڭ كاسىبي مامان ءبولىمىنىڭ باسشىسى ازامات بايتاسوۆ.
2018 جىلى استانادا 700-گە جۋىق ادام قايتا وقىتۋ كۋرستارىنان ءوتتى. ولاردىڭ 70% تۇراقتى جۇمىسقا ورنالاستى.
