ءباسپاسوز ماجىلىسىنە Zhuldyz TV Media قۇرىلتايشىسى سمايل جاڭىلبەكوۆ, قازاقستاننىڭ ەڭبەك سىڭىرگەن ارتىستەرى سەكەن تۇرىسبەكوۆ, رامازان ستامعازيەۆ, ايگۇل ۇلكەنباەۆا, قازاقستاننىڭ ەڭبەك سىڭىرگەن قايراتكەرى مۇقاسان شاحزاداەۆ جانە «Dombyra» تەلەارناسىنىڭ ديرەكتورى قانات ەرجىگىتوۆ قاتىستى.
قوعامدى ۇلتتىق مادەنيەت پەن بىرەگەيلىكتى ساقتاۋ جانە قايتا جاڭعىرتۋ يدەياسىنىڭ توڭىرەگىندە ودان ءارى توپتاستىرۋ ماقساتىندا ەلباسىنىڭ شەشىمىمەن شىلدە ايىنىڭ 1-جەكسەنبىسى «ۇلتتىق دومبىرا كۇنى» بولىپ جاريالانعانى بەلگىلى. وسىعان وراي, «Dombyra» تەلەارناسىنىڭ ديرەكتورى قانات ەرجىگىتوۆ «Dombyra» تەلەارناسى – قازاق حالقىنىڭ رۋحاني جان سەرىگىنە اينالعان مۋزىكالىق ءتول اسپاپتارىن, ءداستۇرلى اندەرى مەن ۇلتتىق كۇيلەرىن حالىققا بارىنشا ناسيحاتتايتىن جاڭا فورماتتاعى تەلەارنا بولۋىن كوزدەيتىنىن جەتكىزدى. «ەفيردە باعدارلامالار قازاق تىلىندە جۇرگىزىلەدى. باستى ماقساتى: دومبىرا, قوبىز, جەتىگەن, شەرتەر, سىبىزعى, سازسىرناي جانە تاعى باسقا اسپاپتاردىڭ تاريحي قالىپتاسۋى مەن نەگىزدەرىن, زاماناۋي باعىتتارىن, كۇيشىلىك ونەرى مەن كورنەكتى وكىلدەرىن كەڭىنەن ناسيحاتتاۋ. وسكەلەڭ ۇرپاققا جىر, تەرمە, كۇي, ءداستۇرلى اندەر, ءداستۇرلى مۋزىكالىق كەشتەر مەن ۇلتتىق اۋەنىمىزدى جاڭارتىلعان, ساپالى فورماتتا تاراتۋ دا وسى مۇرات اياسىنا توپتاسقان. تانىمدىق ءارى تالىمگەرلىك تۇرعىدا ارنايى باعدارلاما ارقىلى ۇلتتىق اسپاپتاردى ۇيرەنىپ مەڭگەرۋ دارىستەرى تۇراقتى جۇرگىزىلىپ تۇراتىن بولادى» دەيدى جاڭا تەلەارنانىڭ جەتەكشىسى قانات ەرجىگىتوۆ.
ءتول اسپاپتارىمىزدىڭ قادىر قاسيەتىن ساقتاپ, كەلەر ۇرپاقتىڭ رۋحاني يگىلىگىنە اينالدىرۋدا جاڭا تەلەارنانىڭ ماڭىزى زور بولماق.
«Dombyra» تەلەارناسى تەك قازاقستاندىق ءونىمدى ۇسىنىپ, ءداستۇرلى اسپاپتارىمىزدى دۇرىسىنان دارىپتەيتىن قازاقستان تاريحىنداعى تۇڭعىش تەلەارنا. ونىڭ ەفيرىندە وتاندىق ەسترادانىڭ بۇرىنعى وكىلدەرى مەن قازىرگى زامان وكىلدەرىنىڭ ۇزدىك جۇمىستارى كورسەتىلەتىن بولادى. تەلەارنانىڭ ميسسياسى قاراپايىم: جاستار اراسىندا پاتريوتتىقتى قالىپتاستىرۋ جانە مادەنيەتتى ىلگەرىلەتۋ. «Dombyra» تەلەارناسى قازىردىڭ وزىندە قازاقستاننىڭ كابەلدىك جەلىلەرى «IDتV», ينتەرنەت جەلىسىندە YOUTUBE كانالى, الەۋمەتتىك جەلىلەر ارقىلى تاراتىلۋدا.
ايگۇل احانبايقىزى,
«ەگەمەن قازاقستان»
الماتى
