دەگەنمەن ءار نارسەنىڭ دە ەكى جاعى بار دەگەن عوي. قاردىڭ شەكتەن تىس كوپتىگىن دە قادەگە جاراتىپ, كوز قۋانتاتىن ءتۇرلى ءمۇسىن جاساعان جاندار از ەمەس. ءتىپتى ءبىرى بىرىنەن اسىپ ءتۇسىپ, كورگەن جاندى تاڭعالدىرعاندار تابىلدى.
سولاردىڭ ءبىرى – ورالداعى №1 ءورت ءسوندىرۋ ءبولىمىنىڭ الدىندا پايدا بولعان ء«ورت سوندىرگىش ماشينا». تۇتاسىمەن قاردان جاسالعان بۇل ءمۇسىن «زيل-131 AT-40» اۆتوكولىگىنىڭ ءدال كوشىرمەسى. ازاماتتىق قورعاۋ لەيتەنانتى دارحان ازاماتوۆ, كىشى سەرجانت الىشەر قۇتتىعالي, بولىمشە كومانديرى ۆالەري سيدەلنيكوۆ جانە باسقالارىنىڭ قولىنان شىققان بۇل قار-ءمۇسىن بۇگىندە ورالدىقتاردىڭ توقتاي قالىپ, سۋرەتكە تۇسەتىن ورنىنا اينالعان. ءبىر ءتاۋىرى, №1 مامانداندىرىلعان ءورت ءسوندىرۋ بولىمشەسىنىڭ باسشىلىعى بۇل باستامانى قولداپ, «مۇسىنشىلەرگە» سىر-بوياۋ تاۋىپ بەرگەن. ءسويتىپ, قاردان جاسالعان كولىك «01» قىزمەتىنىڭ ءداستۇرلى قىزىل تۇسىنە ەنىپ, ءتىپتى ادەمىلەنە تۇسكەن ەدى.
- بيىلعى كوپ قاردىڭ جاقسىلىعىن دا كورەيىك دەپ ءبىز دە مەكتەپ اۋلاسىنا ءتۇرلى قار-مۇسىندەر جاسادىق. بۇل ىسكە ءبىزدىڭ شاعىن ورتالىقتىڭ تاربيەشىلەرىنەن بولەك, اتا-انالار دا قار قالاشىعىن جاساۋعا ەرەكشە قۇلشىنىسپەن اتسالىستى, - دەيدى ورال قالاسىنداعى №47 مەكتەپ ديرەكتورى ناتاليا ەرعوجيەۆا.
مەكتەپ ديرەكتورىنىڭ ايتۋىنشا, شىرشا, اياز اتا, حايۋاناتتار مەن ءتۇرلى كولىكتەردەن قۇرالعان قار قالاشىعىن جاساۋعا مەكتەپتىڭ ەڭ كىشكەنتاي شاكىرتتەرى تاربيەلەنىپ جاتقان «بالدىرعان», «ەركەم-اي», «كۇنشۋاق», «گۇلدەراي» توپتارىنىڭ تاربيەشىلەرى تۇگەل قاتىسقان. مەكتەپ اۋلاسىنداعى قىزىل-جاسىل تۇسكە بويالعان بۇل ويىنشىقتار بال داۋرەن بالالىق شاقتىڭ قىزىعىن ۇستەي تۇسكەندەي بولدى.
ايتكەنمەن تەرەكتىلىك ەرلان رىسقاليەۆتىڭ بيىكتىگى 8 مەتردەن اساتىن الىپ اققالاسى بارىنەن اسىپ تۇسكەن سىڭايلى.
- ەرلان بۇل اققالانى «Youtube» جەلىسىندەگى بالالارعا ارنالعان «المازيك تۆ» ارناسى جاريالاعان «ەڭ الىپ 100 اققالا» بايقاۋىنا قاتىسۋ ءۇشىن تۇرعىزعان ەكەن, - دەيدى ءبىزدىڭ تەرەكتىلىك ارىپتەسىمىز, الىپ اققالانى كوزىمەن كورىپ, سۋرەتكە ءتۇسىرىپ قايتقان اياگوز ايتقاليەۆا.
ەرلان رىسقاليەۆ بيىكتىگى 8,2 مەترلىك اققالانى 7 كۇننىڭ ىشىندە سوققان. بايقاۋ شارتى بويىنشا بۇل «قۇرىلىسقا» اۋىر تەحنيكانى پايدالانۋعا بولمايدى. ءبارى دە قول ەڭبەگىمەن جاسالۋى ءتيىس. ەرلانعا دوستارى ارمان سەرىكوۆ پەن جاسۇلان ونباەۆ كومەكتەسىپتى. ال جۇبايى زارينا جۇمىس بارىسىن بەينەجازباعا ءتۇسىرىپ العان. «Youtube» جەلىسىندە جاريالانعان بۇل جازبا بۇگىندە مىڭداعان كورىلىم جيناپ جاتىر.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
