وت اۋىزدى, وراق ءتىلدى ورازالى ءبىر كەزدەرى وسى وقۋ ورداسىندا ءبىلىم العان ەدى. ماقامى ماڭعاز ايتىسكەر اقىننىڭ اتىمەن اتالعان شاعىن اۋديتوريانىڭ ەسىگى ولەڭ ولكەسىنە بەت العان تالىمگەرلەر ءۇشىن قاشاندا ايقارا اشىق. مۇننان اقىننىڭ ءومىر جىرى, كوڭىل سىرىنان حابار بەرىپ, شىعارماشىلىق جولىنان سىر شەرتەتىن كىتاپتار مەن ەستەلىكتەردى دە تابا الاسىز. اۋديتوريانىڭ اشىلۋ سالتاناتىنا ارنايى كەلگەن قابىرعالى قالامگەرلەر, وتىزعا تولار-تولماس شاعىندا ارامىزدان كەتكەن شايىردىڭ ەل اۋزىندا ءالى كۇنگە دەيىن ايتىلىپ كەلە جاتقان وتتى شۋماقتارىن وقىپ, جىلى ەستەلىكتەرمەن ءبولىستى.
«ورازالى كوزى تىرىسىندە رەسپۋبليكالىق جانە حالىقارالىق ايتىستاردا توپ جارىپ, اقتاڭگەر اقىن اتانۋىمەن بىرگە ايتىس ونەرىندە وزىندىك مەكتەبىن قالىپتاستىرىپ كەتكەن تالانت يەسى. ونى ماڭگى ەستە ساقتاۋ تىرىلەردىڭ پارىزى دەپ بىلەمىز. وسى ماقساتپەن ءبىز بۇگىن «مەنىڭ ءپىرىم - ءسۇيىنباي» ءىىى رەسپۋبليكالىق ستۋدەنت-اقىندار ايتىسىن ورازالى دوسبوسىنوۆ اتىنداعى جاس اقىندار ورتالىعىن اشۋدان باستاعالى وتىرمىز. بۇل ءبىزدىڭ ورازالى تۇلەگىمىزدىڭ رۋحىنا دەگەن قۇرمەت دەپ بىلىڭىزدەر. بۇل مەكتەپتەن ەلدىڭ مۇڭىن مۇڭداپ, جوعىن جوقتاعان, ويى ۇشقىر, شابىتى شالقار جاس اقىندار لەگى قانات قاعادى دەپ سەنەمىز», دەيدى ۋنيۆەرسيتەت رەكتورى تاكير بالىقباەۆ.
رەسمي شارانىڭ سوڭى رەسپۋبليكالىق ستۋدەنتتەر ايتىسىنا ۇلاستى. ەلىمىزدىڭ وتىزعا تارتا جوعارى وقۋ ورىندارىنان كەلگەن جاس ايتىسكەرلەر وتتى اقىننىڭ ەسىمىن ۇلىقتاپ, جىردان شاشۋ شاشتى.
ارمان وكتيابر,
«ەگەمەن قازاقستان»
الماتى
