مەملەكەت باسشىسى «قازمۇنايگاز» جانە «لۋكويل» كومپانيالارى اراسىنداعى سەرىكتەستىك قارىم-قاتىناستاردىڭ تيىمدىلىگىن جانە ونىڭ جاقسى دامىپ كەلە جاتقانىن اتاپ ءوتتى.
– ءبىز «لۋكويل» كومپانياسىمەن بۇرىننان بىرگە جۇمىس ىستەپ كەلەمىز. كومپانيالارىڭىز – رەسەيدەگى ءىرى كاسىپورىنداردىڭ ءبىرى. سونداي-اق, سىزدەر رەسەيدىڭ قازاقستانداعى ماڭىزدى ينۆەستورلارىنىڭ ءبىرى سانالاسىزدار. «لۋكويل» ءبىزدىڭ ەكونوميكامىزعا 9 ميلليارد اقش دوللارىنا جۋىق ينۆەستيتسيا ءبولدى, – دەدى نۇرسۇلتان نازارباەۆ.
قازاقستان پرەزيدەنتى رەسەي كومپانياسىمەن ينۆەستيتسيالىق ىنتىماقتاستىقتى ودان ءارى نىعايتۋعا نيەتتەستىك ءبىلدىردى.
اڭگىمەلەسۋ بارىسىندا مەملەكەت باسشىسىنا كاسپي تەڭىزىنىڭ قازاقستانعا تيەسىلى بولىگىندەگى كومىرسۋتەگى شيكىزاتىن بارلاۋ جانە ءوندىرۋ جونىندەگى «جەڭىس» جوباسىن بىرلەسە ىسكە اسىرۋعا قاتىستى جوسپار تۋرالى ەگجەي-تەگجەيلى باياندالدى.
«لۋكويل» مۇناي كومپانياسىنىڭ پرەزيدەنتى قازاقستان اۋماعىنداعى جاعارماي ماتەريالدارىن شىعاراتىن زاۋىتتىڭ قۇرىلىس جۇمىستارىنىڭ ناتيجەلەرى جونىندە نۇرسۇلتان نازارباەۆقا مالىمەت بەردى.
– كاسىپورىننىڭ جوسپارلانعان قۋاتى جىلىنا 100 مىڭ توننا بولادى. زاماناۋي زاۋىت جاعارماي ماتەريالدارىنىڭ بارلىق ءتۇرىن, اتاپ ايتقاندا, 700 ءونىمدى ءتۇرلى اتاۋلارمەن شىعاراتىن بولادى, – دەدى ۆ.الەكپەروۆ.
كەزدەسۋ بارىسىندا وزىق تەحنولوگيالاردى قولدانا وتىرىپ, جاڭا كومىرسۋتەگىلەردىڭ كەن ورىندارىن ىزدەۋ ءۇشىن بىرلەسكەن جۇمىستار جۇرگىزۋ, سونداي-اق قازاقستان رەسپۋبليكاسى ەنەرگەتيكا مينيسترلىگى ازىرلەپ جاتقان 2021-2025 جىلدارعا ارنالعان گەولوگيالىق بارلاۋ باعدارلاماسىن جۇزەگە اسىرۋ ىسىنە رەسەي كومپانيالارىنىڭ اتسالىسۋ ماسەلەسى تالقىلاندى.
