كەلىسىمگە 2017 جىلعى 29 قاراشادا مينسك قالاسىندا قول قويىلعان بولاتىن. قۇجات قورعانىس ونەركاسىبى سالاسىندا قازاقستان مەن بەلارۋس كاسىپورىندارى اراسىنداعى ءوزارا ءىس-قيمىلدى رەتتەيدى.
زاڭ جوباسى اسكەري ماقساتتاعى ءونىمدى (قارۋ-جاراق, اسكەري تەحنيكا, اسكەري ماقساتتاعى جۇمىستار مەن كورسەتىلەتىن قىزمەتتەر, زياتكەرلىك قىزمەت ناتيجەلەرى جانە اسكەري سالاداعى عىلىمي-تەحنيكالىق اقپارات), سونداي-اق قوس ماقساتتا قولدانىلاتىن تاۋارلاردى (ازاماتتىق ماقساتتاردا پايدالانىلاتىن, بىراق ءوز ەرەكشەلىكتەرى مەن قاسيەتتەرىنە بايلانىستى جاپپاي قىرىپ-جويۋ قارۋىن جانە وزگە دە قارۋ تۇرلەرىن جاساۋ ماقساتتارىندا پايدالانىلۋى مۇمكىن شيكىزات, جابدىق, جۇمىستار, كورسەتىلەتىن قىزمەتتەر) ازىرلەۋ, جاساۋ, جاڭعىرتۋ جانە جوندەۋ; اسكەري-تەحنيكالىق ماقساتتاعى قىزمەتتەردى كورسەتۋ; ءوز مۇقتاجدىقتارى ءۇشىن اسكەري ماقساتتاعى ءونىمدى, سونداي-اق قوس ماقساتتا قولدانىلاتىن تاۋارلاردى جاساۋ, جاڭعىرتۋ جانە جوندەۋ ءۇشىن قاجەتتى ءونىمدى بەرۋدى جۇزەگە اسىرۋ ماسەلەلەرىن رەگلامەنتتەيدى.
كەلىسىمنىڭ اياسىندا ونەركاسىپتىڭ قورعانىس سالالارى ۇيىمدارىنىڭ ەكونوميكالىق, وندىرىستىك جانە عىلىمي-تەحنيكالىق كووپەراتسياسى ءۇشىن بەرىلەتىن ءونىمدى جانە اسكەري-تەحنيكالىق ماقساتتاعى كورسەتىلەتىن قىزمەتتەردى كۆوتالاۋدان جانە ليتسەنزيالاۋدان بوساتۋ سياقتى قولايلى جاعدايلار قامتاماسىز ەتىلەتىن بولادى.
كەلىسىمدە تاراپتاردىڭ ۋاكىلەتتى قۇزىرلى ورگاندارى ايقىندالعان, كەلىسىمنىڭ اياسىندا بەرىلگەن نەمەسە قۇرىلعان زياتكەرلىك مەنشىكتى قورعاۋدى قامتاماسىز ەتۋ جونىندەگى شارالار بەلگىلەنگەن, تاراپتار بەرەتىن ءونىمنىڭ ساپاسىن باقىلاۋ جانە ونى قابىلداپ الۋ ماسەلەلەرى رەتتەلگەن.
كوميتەتتە سونداي-اق «ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ اقپاراتتىق قاۋىپسىزدىكتى قامتاماسىز ەتۋ سالاسىنداعى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى.
كەلىسىمگە ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ باسشىلارى 2017 جىلعى 30 قاراشادا مينسك قالاسىندا قول قويدى. كەلىسىمنىڭ ماقساتى ۇقشۇ-عا مۇشە مەملەكەتتەردىڭ اقپاراتتىق قاۋىپسىزدىگىن قامتاماسىز ەتۋ مۇددەلەرىندە ءوزارا ءىس-قيمىلدى دامىتۋ بولىپ تابىلادى.
زاڭ جوباسىنداعى ەرەجەلەرگە سايكەس تاراپتار مەملەكەتارالىق ىنتىماقتاستىق جانە اقپاراتتىق قاۋىپسىزدىكتى قامتاماسىز ەتۋ سالاسىنداعى ۆەدومستۆوارالىق ءوزارا ءىس-قيمىلدى نىعايتۋ نەگىزىندە ۇقشۇ-عا مۇشە مەملەكەتتەردىڭ اقپاراتتىق قاۋىپسىزدىگى جۇيەسىن ودان ءارى دامىتۋدى قامتاماسىز ەتەدى, ىنتىماقتاستىقتىڭ قۇقىقتىق نەگىزدەرىن قالىپتاستىرۋ جانە حالىقارالىق قۇقىقتىق بازانى جەتىلدىرۋ بويىنشا بىرلەسىپ كۇش جۇمسايدى, سونداي-اق اقپاراتتىق قاۋىپسىزدىك قاتەرلەرىنە بىرلەسكەن دەن قويۋدىڭ ءىس جۇزىندەگى تەتىكتەرىن قالىپتاستىرۋعا جاردەمدەسەدى.
اقپاراتتىق قاۋىپسىزدىكتى قامتاماسىز ەتۋ سالاسىنداعى سەنىمدى نىعايتۋ شارالارىن دامىتا وتىرىپ تاراپتار عىلىمي-زەرتتەۋ جۇمىستارىنىڭ ناتيجەلەرىمەن الماسۋدى جۇزەگە اسىرادى, عىلىمي-تەحنيكالىق ازىرلەمەلەردى ىنتالاندىرادى, اقپاراتتىق قاۋىپسىزدىكتى قامتاماسىز ەتۋدىڭ تەحنولوگيالىق نەگىزدەرىن جەتىلدىرۋ بويىنشا كەلىسىلگەن شارالاردى قابىلدايدى.
سونداي-اق, وسى كەلىسىمنىڭ اياسىنداعى ىنتىماقتاستىق بارىسىندا بەرىلەتىن نەمەسە جاسالاتىن اقپاراتتىڭ قورعالۋى كوزدەلەدى, ونىڭ قولجەتىمدىلىگى مەن تاراتىلۋى تاراپتاردىڭ زاڭناماسىنا سايكەس شەكتەلگەن. قۇجاتتار سەنات قاراۋىنا بەرىلدى.
