تاربيە جانە الەۋمەتتىك ماسەلەلەر جونىندەگى دەپارتامەنتىنىڭ ۇيىمداستىرۋىمەن قولعا الىنعان جوبا قازاق حالقىنىڭ سان عاسىرلار بويى قالىپتاسقان تاريحي ساناسىن دامىتۋ ارقىلى ۇلتتىق تۇتاستىقتى ساقتاۋ, وسكەلەڭ ۇرپاقتىڭ بويىندا ۇلتجاندىلىق قاسيەتتى قالىپتاستىرۋدى كوزدەيدى.
جوبا اياسىندا ءتۇرلى سالا ماماندارىنان جاساقتالعان ەكسپەديتسيا الماتى وبلىسىنىڭ اۋداندارىنا ارنايى ساپارمەن باردى.
– ساپار مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى باسىم باعىتتاردى جەرگىلىكتى جەردە جۇزەگە اسىرۋ ماقساتىندا ۇيىمداستىرىلىپ وتىر. جوبا اياسىندا سالا ماماندارى جەرگىلىكتى اۋىل تۇرعىندارىمەن كەزدەسۋ وتكىزىپ, مەكتەپ وقۋشىلارىنا ءتۇرلى تاقىرىپتار توڭىرەگىندە تاعىلىمدى دارىستەر وتكىزدى. قاۋزالعان ماسەلەلەر قاتارىندا جاس ۇرپاق بويىندا ەستەتيكالىق مادەنيەتتى قالىپتاستىرۋ, ادامگەرشىلىككە باۋلۋ, شەشەندىك ونەر, ءوزىن-ءوزى ۇستاي ءبىلۋ مادەنيەتى, مەكتەپ وقۋشىلارىنىڭ اتا-انا مەن مۇعالىم, قورشاعان ورتاعا دەگەن قارىم-قاتىناسىن جاقسارتۋدىڭ جولدارى مەن تاسىلدەرى بار. سونداي-اق وقۋشىلاردىڭ ءوسۋ پروتسەسىندە, ولاردىڭ جاس جانە جەكە پەداگوگيكالىق-پسيحولوگيالىق ەرەكشەلىكتەرىنە قاراي قاقتىعىستىڭ سەبەپتەرى مەن سالدارلارىن انىقتاۋ جانە ولاردى شەشۋدىڭ جولدارىنا ارنالعان ترەنينگتەر دە كوپشىلىكتىڭ قىزىعۋشىلىعىن تۋدىردى, – دەپ اتاپ ءوتتى قىزدار ۋنيۆەرسيتەتىنىڭ تاربيە جانە الەۋمەتتىك ماسەلەلەر جونىندەگى دەپارتامەنتىنىڭ ديرەكتورى جاڭاگۇل سۇلتانوۆا.
سونىمەن قاتار شارا شەڭبەرىندە سارقان جانە تالعار اۋداندارىنداعى بىرنەشە مەكتەپتە «ۇماي انا» ارنايى كابينەتتەرى اشىلدى. وندا قىزدارعا ۇلتتىق تاربيە بەرۋگە بايلانىستى تاعىلىمدى ىستەر جۇزەگە اسىرىلماق.
– ۇماي انا ۇعىمى ەرتەدەگى ۇلى دالانى مەكەندەگەن تۇركى تىلدەس حالىقتاردىڭ ۇرپاق جالعاستىرۋشى, بەرەكە-مولشىلىق ءتاڭىرىسى دەپ اسپەتتەلەدى. ءبىز بۇعان دەيىن الماتى وبلىسىنىڭ بىرنەشە مەكتەبىندە «ۇماي انا» كابينەتىن اشۋعا ۇيىتقى بولدىق. بۇل ورتالىقتار قىزدار ۋنيۆەرسيتەتى مەن ءبىلىم ۇيالارىنىڭ ءوزارا بايلانىسىن ارتتىرىپ, قىز بالالارعا ءتالىمدى تاربيە بەرۋ باعىتىندا قىزمەت اتقارادى. «قىزدى تاربيەلەگەنىڭ – ءبىر ۇرپاقتى تاربيەلەگەنىڭ» دەگەن ەكەن اتا-بابامىز. بۇل ءسوزدىڭ استارىندا ۇلكەن ءمان جاتىر. ءبىز قىز بالانى تاربيەلەۋدە ۇلتتىق تاربيە, ۇلتتىق پەداگوگيكا نەگىزدەرىنەن الشاقتاپ كەتكەنبىز. مىنە, «ۇماي انا» ورتالىقتارى وسى ولقىلىقتىڭ ورنىن تولتىرۋدى كوزدەيدى, – دەيدى ج. سۇلتانوۆا.
جاندار اسان
