«كوميسسيالىق تەكسەرىس ءار عيماراتتا جارتى ساعاتقا دەيىن سوزىلدى. جالعان اقپارات تاراعان. اتالعان عيماراتتاردان جارىلعىش زات تابىلعان جوق. الامدار وسىنداي ءىس-ارەكەتى ءۇشىن قىلمىستىق جاۋاپكەرشىلىك بار ەكەنىن ءبىلۋى كەرەك. بۇل ءىستى بالا جاساسا دا, اتا-اناسى جاۋاپكەرشىلىككە تارتىلادى. مىسالى, وسىنداي كەلەڭسىز ءىس-ارەكەتتەردى كوكتەم ايلارىندا پسيحيكاسى بۇزىلعاندار جاسايدى. كوپ جاعدايدا ماس كۇيدەگى ادامداردان دا مۇنداي قۇيتىرقىلىقتار شىعىپ جاتادى. بۇلاي ويناۋعا بولمايدى, سەبەبى قالالىق قاۋىپسىزدىك مەكەمەلەرىنىڭ كوپ كۇشى مەن رەسۋرستارى جۇمسالادى. اتالعان عيماراتتاردىڭ جۇمىسى توقتاتىلادى. قانشاما ادام زيان كورەدى», – دەيدى الماتى قالالىق ءىىد-ءنىڭ رەسمي وكىلى سالتانات ازىربەك.
2015 جىلدىڭ قاڭتارىنان باستاپ تەرروريستىك ارەكەتتەن تۇراتىن مۇنداي جالعان اقپارات ءۇشىن جاۋاپكەرشىلىك اۋىرلاعان بولاتىن. بۇعان دەيىن وسىنداي زاڭ بۇزۋشىلىق ءۇشىن ءبىر جىلعا دەيىن باس بوستاندىعىنان ايىرۋ جازاسى بەرىلسە, قازىر مۇنداي ىسكە بارعاندار 6 جىلعا دەيىن تەمىر تورعا توعىتىلۋى مۇمكىن.
ارمان وكتيابر,
«Egemen Qazaqstan»
الماتى
