رەسەي مەن ەۋروپا چەمپيوناتتارىندا ءۇش رەتتەن توپ جارىپ, بليتستەن الەم مەن قۇرلىق چەمپيونى جانە دۇنيەجۇزىلىك وليمپيادادا ءۇش مارتە جەڭىمپاز اتانعان ۆالەنتينا گۋنينا ايتۋلى جارىستا 7 ۇپاي جيدى. ەكىنشى ورىندى رەسەيدىڭ تاعى ءبىر اتاقتى شاحماتشىسى, الەمنىڭ ەكس-چەمپيونى, 34 جاستاعى الەكساندرا كوستەنيۋك يەلەندى. ول ءوزىنىڭ وتنداسىنان 0,5 ۇپاي كەم جيدى.
سەنت-لۋيستە جانسايا ابدىمالىك تە ونەر كورسەتىپ, 4,5 ۇپايدى يەمدەندى. ناتيجەسىندە 19 جاسار قازاق قىزى ۇندىستاندىق حاريكا درونوۆالليمەن بىرگە بەسىنشى جانە التىنشى ورىنداردى ءوزارا ءبولىستى.
ەستەرىڭىزگە سالا كەتەيىك, تۇساۋكەسەر كەزدەسۋىندە امەريكالىق اننا زاتونسكيحتى ۇتقان جانسايا ابدىمالىك كەلەسى ويىندا فرانتسيالىق ماري سەباگپەن تەڭ ءتۇستى. ءۇشىنشى كەزەڭدە ول رەسەيلىك الەكساندرا كوستەنيۋككە ەسە جىبەرسە, ءتورتىنشى تۋردا گرۋزيالىق بەلا حوتەناشۆيليدەن باسىم ءتۇستى. بەسىنشى جانە التىنشى اينالىمداردا ول اقش پەن ءۇندىستاننىڭ وكىلدەرى – يرينا كرۋش پەن حاريكا درونوۆالليدەن جەڭىلدى. جەتىنشى جانە سەگىزىنشى تۋرلاردا گرۋزيالىق نانا دزاگنيدزە جانە وسى جارىستىڭ بولاشاق جەڭىمپازى ۆالەنتينا گۋنينامەن ۇپاي ءبولىستى. ال توعىزىنشى كەزەڭدە جانسايا گەرمانيالىق ەليزابەت پەتتستى جەڭدى.
عالىم سۇلەيمەن,
«Egemen Qazaqstan»
