«وتكەن اپتادا ۇلكەن جۇمىس اتقارىلدى. اقتوبە مەن وبلىس اۋداندارىنداعى قوعامدىق قابىلداۋلارعا 6 مىڭعا جۋىق ادام شامامەن 7 مىڭعا ءتۇرلى سۇراقپەن كەلدى. بارلىق سۇراقتار, سونىڭ ىشىندە بارلىق دەڭگەيدەگى اكىمدەردىڭ ەسەپتىك كەزدەسۋلەرىندە ايتىلعان سۇراقتار قاتاڭ باقىلاۋعا الىنىپ, ءتيىستى ورگاندار بەلگىلەنگەن تارتىپتە مۇقيات قاراۋلارى كەرەك. بىردە ءبىر سۇراق جاۋاپسىز قالماۋى قاجەت»,- دەدى بەردىبەك ساپارباەۆ.
نەگىزىنەن, اقتوبەلىكتەر تۇرعىن ءۇي ماسەلەسىن جاقسارتۋ, اتاۋلى الەۋمەتتىك جاردەماقى تاعايىنداۋ, جەكە تۇرعىن ءۇي قۇرىلىسى ءۇشىن جەر تەلىمىن الۋ, سونىمەن قاتار ءبىلىم, دەنساۋلىق ساقتاۋ, تۇرعىن ءۇي-كوممۋنالدىق شارۋاشىلىق سالالارىنا قاتىستى ماسەلەلەرىمەن جۇگىندى.
ماسەلەنىڭ دەنى شەشىلدى. مىسالى, دەمەۋشىلەردىڭ قولداۋىمەن جۇزدەگەن وتباسىعا كومىر, ازىق-ت ۇلىك جانە ت.ب. بەرىلدى. ەكى كوپبالالى جانۇيا باسپانالى بولدى, باسقاسىنا جەكە تۇرعىن ءۇي قۇرىلىسى ءۇشىن قۋرايلى اۋىلىنان جەر تەلىمى بەرىدى, دەمەۋشى ءۇيدى سالۋ ءۇشىن كومەك كورسەتەتىن بولادى. مەتسەناتتار كوللەدجدە وقيتىن ءبىر اقتوبەلىكتىڭ وقۋىن تولەۋگە كومەكتەسسە, مۇمكىندىگى شەكتەۋلى قالا تۇرعىنىنا «قولعانات» قوعامدىق قورى ارقىلى جەكە ءىسىن اشۋعا گرانت ءبولىندى. ەندى جەكە كاسىبىن اشقان ەر ادام جۇك تاسۋمەن اينالىسىپ وتباسىن اسىراي الادى. بۇل كومەككە مۇقتاج ازاماتتاردىڭ وتىنىشتەرىنە قايتارعان جاۋاپتاردىڭ از عانا بولىگى.
ايتا كەتەيىك, وبلىستا از قامتىلعان ازاماتتاردىڭ مەكەنجايلارىنا بارىپ, قولدان كەلگەن كومەكتەرىن كورسەتەتىن ءموبيلدى توپتار ءوز جۇمىستارىن جالعاستىرىپ جاتىر. اتالمىش جۇمىستىڭ ناتيجەسىندە ىقتيمال الەۋمەتتىك كومەكتەردى ءارى قاراي كورسەتۋ تەتىكتەرى قاراستىرىلۋدا.
«كومەك اسا مۇقتاج جاندار مەن وتباسىلارعا زاڭ شەڭبەرىندە كورسەتىلەتىن بولادى. ءبىز بۇعان كاسىپكەرلەردى, دەمەۋشىلەردى تارتاتىن بولامىز»,- دەدى وبلىس اكىمى. ول سونداي-اق, ازاماتتاردىڭ وتىنىشتەرى مەن اتقارىلعان جۇمىستاردىڭ ناتيجەسىن ساراپتاۋ قاجەتتىگىن دە اتاپ ءوتتى.
مەملەكەت باسشىسىنىڭ حالىقتىڭ ءال-اۋقاتىن كوتەرۋ تۋرالى تاپسىرماسىن ورىنداۋ اياسىندا اقتوبە وبلىسىندا 2019 جىلى كوپبالالى, تابىسى از وتباسىلاردى جانە از قامتىلعان ازاماتتاردى الەۋمەتتىك قولداۋدىڭ قوسىمشا شارالارى ەنگىزىلەتىن بولادى.
اتاپ ايتقاندا, كوپبالالى وتباسىلار تۇرعىن ءۇي ساتىپ الۋ ءۇشىن باستاپقى جارنانى سۋبسيديالاۋ مەحانيزمى ازىرلەنۋدە. از قامتىلعان وتباسىلارعا تولەنەتىن ءبىر جولعى الەۋمەتتىك جاردەماقى 70 مىڭنان 140 مىڭعا تەڭگەگە دەيىن وسپەك. از قامتىلعان وتباسىلاردىڭ بالالارى ءۇشىن مەكتەپكە دەيىنگى مەكەمەلەردەگى تاماقتانۋ تولەمى 70% -عا ازايادى. حالىقتىڭ الەۋمەتتىك جاعىنان از قامتىلعان بولىگىن وقىتۋعا, قايتا دايارلاۋعا قوسىمشا 200 ملن تەڭگە بولىنەدى, جالپى, حالىقتىڭ الەۋمەتتىك جاعىنان ءالجۋاز توپتارىنىڭ ىشىنەن 3 مىڭ اقتوبەلىك قايتا وقىتىلىپ, تاعى 5 مىڭ ادام تۇراقتى جۇمىس ورىندارىنا ورنالاسادى. اتالعان شارالاردى جۇزەگە اسىرۋ ءۇشىن 1 ملرد تەڭگە بولىنەدى.
