ونەر • 19 اقپان، 2019

كوزىن بايلاپ سۋرەت سالاتىن سۋرەتشى

268 رەتكورسەتىلدى

باتىس قازاقستان وبلىستىق تاريحي-ولكەتانۋ مۋزەيىندە استانالىق سۋرەتشى رەنات ەلۋباەۆ كوزىن جۇمىپ سۋرەت سالاتىن ەرەكشە ونەرىن ورتاعا سالدى. كەزدەسۋدى ۇيىمداستىرعان مۋزەي ديرەكتورى ميربولات ەرساەۆتىڭ ايتۋىنشا، تاڭعاجايىپ قابىلەتىمەن تانىلىپ جۇرگەن سۋرەتشىنىڭ مۇنداي شوۋ-قويىلىمى قازاقستاندا تۇڭعىش رەت ءوتىپ وتىر. 

قازاقستان سۋرەتشىلەر وداعىنىڭ مۇ­شەسى رەنات ەلۋباەۆ بۇعان دەيىن رەسەيدە وتكەن «ۋديۆيتەلنىە ليۋدي» تەلەشوۋىنا قاتىسىپ، كورەرمەندى تاڭعالدىرعان ەدى. سۋ­رەتشى 2015 جىلى نيۋ-يورك (اقش) قا­لا­­سىندا وتكەن «New York Realizm fine art» حالىقارالىق كورمەسىنىڭ التىن مەدالىن يەلەنىپ، بەلورۋسسيادا وتكەن «كۋرشي­نالە-2015» حالىقارالىق ونەر وليمپياداسىندا «سۋرەت ونەرى» اتالىمى بويىنشا باس جۇلدەگەر، يتاليا، ارمەنيا سەكىلدى مەم­لەكەتتەردە حالىقارالىق بايقاۋلاردا جۇلدەگەر اتانعان ەكەن. ءوزىنىڭ ايتۋىنشا، شەتەلدەرگە ءجيى شىعىپ، ونەرىن كورسەتۋگە قارجى تاپشىلىعى قولبايلاۋ بولىپ ءجۇر.

– بۇل مەنىڭ ورال وڭىرىنە العاش رەت اياق باسۋىم. شەتەلدەرگە تالاي مارتە شاقىرۋمەن بارىپ جۇرسەم دە، ءوز ەلىمىزدە تۇڭعىش رەت ەلەپ شاقىرعانى، كەزدەسۋ ۇيىمداستىرعانى ءۇشىن ورالدىقتارعا العىسىم شەكسىز. جالپى، بۇل ونەردى – كوز جۇمىپ سۋرەت سالۋدى اركىم ارقيلى قابىلدايدى. سەنىمسىزدىك تانىتاتىندار دا بار. بۇل ەرەكشە قابىلەت – ماعان اللا تاعالانىڭ بەرگەن ەرەكشە سىيى دەپ ەسەپتەيمىن. كوزىمدى بايلاپ قويىپ سۋرەت سالعاندا ونىڭ ءساتتى شىعۋى كوڭىل كۇيگە، اينالامداعى ادامداردىڭ قابىلداۋىنا دا بايلانىستى. بۇل قابىلەتىمنىڭ قاشانعا دەيىن ساقتالاتىنىن دا بىلمەيمىن. مۇمكىن ءبىر-ەكى جىلدان كەيىن، ءتىپتى ەرتەڭ دە سۋرەت سالا الماي قالۋىم دا عاجاپ ەمەس، – دەيدى رەنات قيلىباي ۇلى.

سۋرەتشىنىڭ ايتۋىنشا، ءتۇرلى تەلەشوۋ­لارعا شاقىرۋشىلار كوپ بولعانىمەن، ونىڭ ءبارىن قابىل الا بەرمەيدى. ويتكەنى كوزىن جۇمىپ سۋرەت سالۋ تىلسىممەن جالعاسىپ جات­قان جۇمباق قۇبىلىس. كوپشىلىك الدىندا كور­سەتكەن وسىنداي شوۋدا رەنات ءوزىنىڭ قات­تى قوبالجىپ، شارشاپ قالاتىنىن ايتادى. «بۇعان كوپ كۇش، كوپ ەنەرگيا كەتەدى» دەيدى سۋرەتشى. 

وسى كەزدەسۋدە رەنات ەلۋباەۆ ءوزىنىڭ باستى ونەرىن ورتاعا سالدى. كوزىنە ارنايى تاڭعىشىن كيگەن سوڭ جينالعان جۇرتتىڭ باسىم كوپشىلىك داۋسىمەن جىلقىنىڭ سۋرەتىن سالىپ شىقتى. ەكى قولىنا بىردەي قىلقالام ۇستاعان سۋرەتشى بىرەر مينۋت ىشىندە سالت اتتى ادامنىڭ نوبايىن شىعاردى. ونەر تۋىن­دىسى دەۋگە كەلمەسە دە، جىلقىنىڭ سۋرەتى ءساتتى شىقتى دەۋگە بولادى. مۋزەي ديرەك­تورى ميربولات ەرساەۆ بۇل جۇمىستىڭ مۇراجاي قورىنا الىناتىنىن ايتىپ، قىلقالام شەبەرىنىڭ اۆتورلىق قولتاڭباسىن جازدىرتىپ الدى. 

قازبەك قۇتتىمۇرات ۇلى،

«Egemen Qazaqstan»

باتىس قازاقستان وبلىسى

سوڭعى جاڭالىقتار

اقمولادا تاعى ءبىر ناۋقاس انىقتالدى

كوروناۆيرۋس • بۇگىن، 16:07

قارعىن سۋ بالكاشيندى باسىپ قالدى

ايماقتار • بۇگىن، 16:05

تاسقىننىڭ بۇگىنگى احۋالى

ايماقتار • بۇگىن، 15:42

سالەحاردتان كەلگەن تسيكلون

ايماقتار • بۇگىن، 15:30

ەلوردادا جالپى جاعداي تۇراقتى

كوروناۆيرۋس • بۇگىن، 14:50

فۋتبول ماۋسىمى جالعاسا ما؟

سپورت • بۇگىن، 14:48

الەمدەگى احۋال قانداي؟

كوروناۆيرۋس • بۇگىن، 10:57

ۇقساس جاڭالىقتار