قازىر بۇل باعىتتا ايماقتا ناقتى شارالار قابىلدانىپ, ىسكە اسىپ جاتىر. ماسەلەن, الماتى وبلىسىنداعى 43 503 كاسىپورىنداعى 79,4 مىڭ جۇمىسشىنىڭ تومەن جالاقى الاتىنى انىقتالعان ەدى. بيىلدان باستاپ ولاردىڭ جالاقى مولشەرى كوبەيتىلدى. قازىر كاسىپورىندارداعى ەڭبەك وتەۋى ەداۋىر جوعارىلادى. ناقتى ەسەپ بويىنشا 14 مىڭ جۇمىس بەرۋشى 32 مىڭ جۇمىسكەردىڭ جالاقىسىن كوتەرگەن. سونداي-اق وبلىستا بيۋدجەتتىك ۇيىمداردا قىزمەت اتقاراتىن 41 مىڭ ادامنىڭ جالاقىسى ورتا ەسەپپەن 35 پايىزعا كوبەيدى. جالپى, وبلىس بويىنشا 2018 جىلى ورتاشا ايلىق جالاقى 5 پايىزعا ءوسىپ, تابىس مولشەرى 114 مىڭ تەڭگەنى قۇراپتى. مۇنان بولەك, سالىق جۇكتەمەسىن تومەندەتۋگە وراي 133,5 مىڭ ادامنىڭ جالاقىسى قايتا قارالعان ەكەن.
ەلباسىنىڭ تومەنگى جالاقىنى كوتەرۋ تۋرالى تاپسىرماسىنا سايكەس تالعار اۋدانىندا دا ناقتى شارالار قولعا الىنعان. اۋدان اكىمى رىسكەلدى ساتباەۆتىڭ ايتۋىنشا, وتكەن جىلدىڭ قورىتىندىسى بويىنشا ءوڭىردىڭ دامۋى وڭ كورسەتكىشتەرمەن تولىققان. اسىرەسە, «بيزنەستىڭ جول كارتاسى – 2020» باعدارلاماسى بويىنشا جالپى قۇنى 1,6 ملرد تەڭگە بولاتىن 24 جوبا قارجىلاي قولداۋ تاۋىپتى. بۇل ءوز كەزەگىندە اۋدانداعى 1716 كاسىپورىنداعى جۇمىستى جانداندىرىپ, 1405 نىسانداعى جۇمىسشىلاردىڭ جالاقىسىن وسىرۋگە مۇمكىندىك بەردى. ياعني, اۋدان بويىنشا بيىلعى 1 قاڭتاردان باستاپ 3903 جۇمىسشىنىڭ ايلىعى كوبەيىپ, جالاقى قورى 230 ملن تەڭگەگە ارتىپتى.
مۇنان بولەك, ايماقتاعى ءىرى كاسىپورىنداردا ەڭ تومەنگى جالاقى مولشەرىن كوتەرۋ جولعا قويىلدى. بۇل باستاماعا الدىمەن قوسىلعاندار ىشىندە «الماتى بوياۋلارى» جشس (ديرەكتورلار كەڭەسىنىڭ ءتورايىمى ريمما سالىقوۆا) بار. ال ىلە اۋدانىنداعى «ابدي يبراگيم گلوبال فارم» جشس باس ديرەكتورى زياتحان گاسانوۆتىڭ ايتۋىنشا, كاسىپورىنداعى ەڭ تومەنگى ەڭبەكاقى مولشەرى قازىر 120 000 تەڭگە بولسا, ورتاشا جالاقى 353 000 تەڭگەگە جەتكەن. وسى قاتاردا «جاركەنت كراحمال-سىرنە زاۋىتى» سەرىكتەستىگى دە بار. باسقارما توراعاسى زاكىرجان كۋزيەۆ وندىرىستە 1200 جۇمىسشى بار ەكەنىن, ولاردىڭ ورتاشا جالاقى مولشەرى وسكەنىن, قازىر 311 قىزمەتكەردىڭ ورتاشا ەڭبەكاقىسى 127 000 تەڭگەنى, ال تومەنگى ايلىق 80 000 تەڭگەنى قۇرايتىنىن ايتتى.
قالماحانبەت مۇقامەتقالي,
«Egemen Qazaqstan»
الماتى وبلىسى
