بەرەكە بەرىكتىرگەن بىرلىك
سارسەنبى, 25 ءساۋىر 2012 7:38
قازاقستاننىڭ وركەندەگەن ءومىرى, نىعايعان قۋاتى ەڭ الدىمەن ەلدەگى بارلىق ەتنوستاردىڭ تۋىسقاندىق پەن ىنتىماققا ۇمتىلىسىنىڭ ارقاسى دەسەك, وسىنىڭ دالەلىنە جارقىن مىسالدار جەتىپ ارتىلادى. ءبۇگىننەن ەرتەڭگە جالعاسقان جاسامپاز ىستەردى جاراستىرۋشى, جاڭعىرتۋشى قۇتتى ۇيا تۇرعىسىندا تۇعىرى بيىك قاراعاندى ءوڭىرى سونىڭ ۇلگىلى ورتاسى دەۋگە ابدەن لايىق. باسى بۇدان ءبىر عاسىردان استام بۇرىن تامىر تارتقان, ودان بەرىدە قوعام, ۋاقىت ءوزگەرىستەرى سان ەتنوستاردى توعىستىرىپ, تاعدىر تابىستىرۋى تۇرعىلىقتى جۇرتتىڭ باۋىرمالدىق قۇشاعى اسەرى ەكەنى ولار ۇمىتا قويماس ىستىق سەزىم. بارلىعى ءۇشىن قازاقتان ورتاق وتان, ونىڭ ءبىر بولشەگى – ارقا ءتورى مەرەيلى مەكەن.
سارسەنبى, 25 ءساۋىر 2012 7:38
قازاقستاننىڭ وركەندەگەن ءومىرى, نىعايعان قۋاتى ەڭ الدىمەن ەلدەگى بارلىق ەتنوستاردىڭ تۋىسقاندىق پەن ىنتىماققا ۇمتىلىسىنىڭ ارقاسى دەسەك, وسىنىڭ دالەلىنە جارقىن مىسالدار جەتىپ ارتىلادى. ءبۇگىننەن ەرتەڭگە جالعاسقان جاسامپاز ىستەردى جاراستىرۋشى, جاڭعىرتۋشى قۇتتى ۇيا تۇرعىسىندا تۇعىرى بيىك قاراعاندى ءوڭىرى سونىڭ ۇلگىلى ورتاسى دەۋگە ابدەن لايىق. باسى بۇدان ءبىر عاسىردان استام بۇرىن تامىر تارتقان, ودان بەرىدە قوعام, ۋاقىت ءوزگەرىستەرى سان ەتنوستاردى توعىستىرىپ, تاعدىر تابىستىرۋى تۇرعىلىقتى جۇرتتىڭ باۋىرمالدىق قۇشاعى اسەرى ەكەنى ولار ۇمىتا قويماس ىستىق سەزىم. بارلىعى ءۇشىن قازاقتان ورتاق وتان, ونىڭ ءبىر بولشەگى – ارقا ءتورى مەرەيلى مەكەن. ايماقتاعى 115-كە جۋىق ءتۇرلى ەتنوستاردىڭ اراسىندا قالىپتاسقان ءتۇسىنىستىك پەن كەلىسىم احۋالى ۇيىمشىلدىقتى ۇيىستىرىپ, الەۋمەتتىك-ەكونوميكالىق ورلەۋگە التىن ارقاۋ بولۋى كوپشىلىك كوڭىلىن كورىكتەندىرە تۇسكەن. كەز كەلگەن, ءتىپتى ەڭ از ۇلتتىق توپتىڭ مۇددەسىنە شىنايى قۇرمەت-سىيلاسىمدىقتىڭ نەگىزى. جالپى ءبىلىم بەرەتىن مەكتەپتەردە نەمىس, كورەي, تاتار, پولياك تىلدەرى وقىتىلادى. ەتنومادەني بىرلەستىكتەردىڭ ءبارىنىڭ جانىندا انا ءتىلدى وقىپ-ۇيرەتەتىن جەكسەنبىلىك مەكتەپتەر جۇمىس ىستەيدى. سوعان قوسا, مەملەكەتتىك ءتىل مەڭگەرىلەدى.
وبلىستىق اكىمدىكتە وتكەن وڭىردەگى ەتنومادەني بىرلەستىكتەر جەتەكشىلەرىمەن كەزدەسۋدە ۇلتارالىق قاتىناستاردى ۋاقىت تالاپ-تالعامىنا ساي دامىتۋ ماسەلەسى العا تارتىلىپ, دوستىق پەن بىرلىكتى قادىرلەۋ, كوزدىڭ قاراشىعىنداي ساقتاۋ ماقساتىنداعى ءىس-ىزدەنىستەر جونىندە كەلەلى اڭگىمە قوزعالدى. قازاقستان حالقى اسسامبلەياسىنىڭ مۇشەسى, وبلىستىق فيليالى عىلىمي-ساراپتاۋ توبىنىڭ جەتەكشىسى ۆيلەن مولوتوۆ-لۋچانسكي, قازاقستان كورەيلەرى قاۋىمداستىعىنىڭ وڭىرلىك بولىمشەسىنىڭ ءتورايىمى ليليا كيم, تەمىرتاۋلىق گرەكتەردىڭ «پوتناس» ۇيىمىنىڭ باسشىسى دەسپينا كاساپيدي ءوز سوزدەرىندە قازاقستاندىقتاردىڭ وسىنداي بەيبىت جانە تاتۋ-ءتاتتى شاڭىراق استىندا تۇرىپ جاتۋى تاۋەلسىزدىك جىلدارىندا قول جەتكىزىلگەن باستى بايلىق بولىپ تابىلاتىندىعىن ايتتى. قاتارلارى تولىعۋ ۇستىندەگى, قازىر 70-كە جۋىقتاعان بۇل بىرلەستىكتەر تەك ەتنوستار ءۇشىن عانا ەمەس, سونداي-اق بۇكىل قوعامعا, مەملەكەتتىك مۇددەگە قاجەتتى ىستەردى بىرلەسىپ جۇرگىزۋگە بەلسەنە اتسالىسىپ كەلەدى. ءار ەتنوس تۇراقتى مەكەنىنە بالايتىن ەلدىڭ, جەردىڭ تاريحىن, ءتىلىن, ءدىلىن, ءدىنىن سىيلاپ, سونىمەن بىرگە, ءتول ۇلتىنىڭ قۇندىلىقتارىن دا قادىرلەۋدى كوتەرە الادى. وسى ورايدا قاي-قايسىسى قىزمەتىنە ەركىندىك كەڭ, جاڭارۋعا مۇمكىندىك مول. نەمىستەردىڭ «ۆيدەرگەبۋرت, ليتۆانداردىڭ «ليتۋانيك», گرەكتەردىڭ «اۆگي», ارميانداردىڭ «ەرەبۋني» سياقتى جەرگىلىكتى وشاقتارىنىڭ يگى ءىس-شارالارىنىڭ جاڭعىرىعى الىسقا اسىپ, تاريحي وتاندارىنا دا مالىمدىلەرى از ەمەس.
وسىنداي وبلىستىق ۇيىمدار جەتەكشىلەرىنىڭ بىرەۋى «قۇرمەت», تورتەۋى ءىى ءدارەجەلى «دوستىق» وردەنىمەن, بىرقاتارىنىڭ «قازاقستان رەسپۋبليكاسىنىڭ تاۋەلسىزدىگىنە – 20 جىل» مەرەيتويلىق مەدالىمەن ماراپاتتالۋى ەلدىڭ تۋىسقاندىق تامىرىن ءنارلەندىرۋشىلەرگە دەگەن جوعارى قۇرمەتتى كورسەتەدى.
كەزدەسۋدە وڭىردەگى ەتنوستار اراسىنداعى دوستىقتى نىعايتۋعا, ءمادەني بايلانىستاردى دامىتۋعا قوسقان ۇلەسى ءۇشىن 30 ەتنومادەني بىرلەستىككە وبلىس اكىمىنىڭ گرانتتارى تاپسىرىلدى. ونى الۋشىلاردىڭ ءبىرى «پولونيا» پولياك قوعامىنىڭ توراعاسى الەكساندر سۆاريچەۆسكي ايتقانداي, مۇنداي قولداۋ مەملەكەتتىك جانە انا ءتىلدى وقىپ-ۇيرەنۋگە, قازاقستاندىق وتانشىلدىق سەزىمگە تاربيەلەۋگە, ۇلتتىق-سالت داستۇرلەردى ءدارىپتەۋگە سەرپىن بەرەدى.
– ءبىز ەتنوستاردىڭ بارلىعىنا بىردەي ماقسات-مۇددەسىنە ساي جاسالىپ كەلە جاتقان جاعدايعا ءدان ريزامىز. مۇنىڭ ءبارى رەسپۋبليكامىزدىڭ تۇڭعىش پرەزيدەنتى نۇرسۇلتان نازارباەۆتىڭ كورەگەندىك ساياساتىنىڭ شاپاعاتى ەكەنىن تۇسىنەمىز. ءتىلەگىمىز قازاقتارمەن, بارشا قازاقستاندىقتارمەن ءبىر. ول – سۇيىكتى وتانىمىزدىڭ مەرەيى بيىكتەپ, ابىرويى اسقاقتاي بەرۋىنە ۇلەس قوسۋ. 17 جىلدا وڭىرىمىزدەگى ەتنوستىق بىرلەستىكتەر ەلەۋلى ازاماتتىق كۇشكە اينالدى, ولاردىڭ قاتىسۋىنسىز بىردە-ءبىر ماڭىزدى قوعامدىق-ساياسي شارالار وتپەيدى. مۇنداي سەنىم مەن جاۋاپكەرشىلىكتى اقتاۋدى پارىز سانايمىز, – دەدى بىزبەن تىلدەسكەندە ازەربايجاننىڭ «نومۋس» ەتنومادەني بىرلەستىگىنىڭ توراعاسى, قازاقستان حالقى اسسامبلەياسىنىڭ مۇشەسى اگيف گاميلوعلى مامەدوۆ.
جىلدار بويى كورشى-قولاڭ, دوس-جاران سىيلاس-سىرلاس بولىپ ءومىر ءسۇرىپ, سوعان ءۇيرەنگەن قاراعاندىلىقتار ىنتىماق پەن ءبىرلىكتىڭ قادىرىن جاقسى بىلەدى. سوندىقتان دا دوستىققا, باۋىرمالدىققا قاشاندا بەرىك.
ايقىن نەسىپباي.
قاراعاندى.
