تالعارداعى ءتالىم ورداسى
سەيسەنبى, 13 ناۋرىز 2012 8:22
ەكونوميكانى تۇراقتاندىرىپ, جاڭا تەحنولوگيانى وندىرىسكە ەنگىزۋ ساياساتىن قانشا جەردەن قولعا العانىمىزبەن, جۇمىسسىزدىق ماسەلەسى تۇبەگەيلى شەشىلمەي تۇرعان ماسەلەنىڭ ءبىرى ەكەنى راس. بۇل – بارلىق قوعامدا دا, كەز كەلگەن مەملەكەتتە دە كەزدەسەتىن كۇردەلى ءتۇيىن. ەلباسى حالىقتى جۇمىسپەن قامتاماسىز ەتۋدىڭ ستراتەگياسىن جاساپ, ءار جىلدا ءتۇرلى مەملەكەتتىك باعدارلامالار ارقىلى جۇمىسسىزدىقتىڭ الدىن الۋ شاراسىن نىعايتۋ كەرەكتىگىن ءوزىنىڭ جىل سايىنعى قازاقستان حالقىنا جولداۋىندا باسا نازارعا الىپ كەلەدى.
سەيسەنبى, 13 ناۋرىز 2012 8:22
ەكونوميكانى تۇراقتاندىرىپ, جاڭا تەحنولوگيانى وندىرىسكە ەنگىزۋ ساياساتىن قانشا جەردەن قولعا العانىمىزبەن, جۇمىسسىزدىق ماسەلەسى تۇبەگەيلى شەشىلمەي تۇرعان ماسەلەنىڭ ءبىرى ەكەنى راس. بۇل – بارلىق قوعامدا دا, كەز كەلگەن مەملەكەتتە دە كەزدەسەتىن كۇردەلى ءتۇيىن. ەلباسى حالىقتى جۇمىسپەن قامتاماسىز ەتۋدىڭ ستراتەگياسىن جاساپ, ءار جىلدا ءتۇرلى مەملەكەتتىك باعدارلامالار ارقىلى جۇمىسسىزدىقتىڭ الدىن الۋ شاراسىن نىعايتۋ كەرەكتىگىن ءوزىنىڭ جىل سايىنعى قازاقستان حالقىنا جولداۋىندا باسا نازارعا الىپ كەلەدى.
وسى رەتتە جۇمىسسىزدىققا قارسى شارا قولدانۋ ماقساتىمەن ەل ۇكىمەتى «جۇمىسپەن قامتۋ-2020» باعدارلاماسىن قابىلداعان ەدى. بۇل باعدارلامانىڭ ماقساتى جۇمىسپەن تۇراقتى تۇردە قامتاماسىز ەتە وتىرىپ, حالىقتىڭ تابىسىن ارتتىرۋ بولاتىن. ۇدەدەن شىعۋ ءۇشىن بۇگىنگى تاڭعا دەيىن ءبىرشاما ءىس اتقارىلىپ, كوڭىلگە قونارلىقتاي ناتيجەسى دە بايقالۋدا.
جۋىردا الماتى وبلىسىنا قاراستى تالعار قالاسىندا ورنالاسقان №4 كاسىپتىك ليتسەي ەلباسى ن.نازارباەۆتىڭ قازاقستان حالقىنا ارناعان بيىلعى «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋى اياسىندا وبلىس كولەمىندەگى كاسىپورىن باسشىلارىنىڭ باسىن قوسىپ, دوڭگەلەك ءۇستەل وتىرىسىن وتكىزدى. اتالمىش شاراعا رەسپۋبليكالىق دەڭگەيدە ءونىم ءوندىرىپ وتىرعان «سۇلتان», «بارون», «تۇلپار-ەكسپرەسس», «گلازمان», «بايسەركە-اگرو» جشس-لەرى, «ۆودوكانال» مكك, «الاتاۋ جارىق» كومپانياسى سەكىلدى كاسىپورىن وكىلدەرى قاتىستى. كوتەرىلگەن ماسەلە قاجەتتى ماماندىقتارعا بىلىكتى مامان ءتاربيەلەۋ جانە وڭىردەگى جۇمىسسىزدىق پروبلەماسىمەن جۇمىلا كۇرەسۋ شارالارىن جاڭا دەڭگەيگە كوتەرۋ جونىندە بولدى.
سەكسەن جىلدىق تاريحى بار №4 كاسىپتىك ليتسەي – ىرگەتاسى قالانعالى بەرى اۋىل شارۋاشىلىعى مەن حالىققا قىزمەت كورسەتۋ مەكەمەلەرىنە مامان دايارلاۋ جانە جاستارعا كاسىپتىك-تەحنيكالىق ءبىلىم بەرۋ ءىسىن تۇراقتى دا تىڭعىلىقتى جۇرگىزىپ كەلە جاتقان ءبىلىم وشاعى. تاۋەلسىزدىك العان كەزدەگى ەلەڭ-الاڭ شاقتا دا, ەكونوميكالىق-قارجىلىق داعدارىس تىعىرىققا تىرەگەن ۋاقىتتا دا بۇل وقۋ ورداسى توقتاۋسىز جۇمىس ىستەپ تۇردى. ءتىپتى, مەملەكەت تاراپىنان قارجىلاي قولداۋ كورمەي, جەكەشەلەندىرۋدىڭ تۇزاعىنا ءتۇسۋدىڭ دە از-اق الدىنان ءوتتى. كوپتەگەن كاسىپورىندار داعدارىستى سىلتاۋ ەتىپ ليتسەي شاكىرتتەرىن جۇمىسقا قابىلداۋدان باس تارتقان, وقۋ ورداسىمەن جاساسقان ەكىجاقتى كەلىسىم-شارتتى بۇزۋعا دەيىن بارعان. تەك سوڭعى 3 جىل كولەمىندە عانا ليتسەيدىڭ ماتەريالدىق-تەحنيكالىق بازاسى جاڭارىپ, كەرەكتى وقۋ قۇرالدارى مەن جابدىقتار الىنا باستادى. اتاپ ايتساق, 2009-2010 جىلدارى 1,739 ميلليون تەڭگە, 2011 جىلى 15 ميلليون جانە وبلىس اكىمدىگى تاراپىنان 116 ميلليون تەڭگە قارجى ءبولىنىپ, ول اقشاعا ليتسەي عيماراتى كۇردەلى ءجوندەۋدەن وتكىزىلگەن, وقۋ كابينەتتەرى مەن شەبەرحانالارعا قاجەتتى جيھازدار, كومپيۋتەرلەر, ينتەراكتيۆتى تاقتا الىنعان.
قارجىلىق قولداۋدىڭ كومەگىمەن كاسىپتىك ليتسەي 2009 جىلى – 106, 2010 جىلى – 194, ال 2011 جىلى 162 جاس ماماندى دايارلاپ, قالا مەن وبلىس اۋماعىندا جۇمىس ىستەپ وتىرعان ءوندىرىس ورىندارىنا ورنالاسۋعا سەپتىگىن تيگىزگەن. سونىمەن قاتار, ۇكىمەتتىڭ «جول كارتاسى» باعدارلاماسىن جۇزەگە اسىرۋعا دا سۇبەلى ۇلەسىن قوسىپ, 2009 جىلى – 343, 2010 جىلى 79 جانە 2011 جىلى 85 ماماندى دايىنداۋ جانە قايتا دايارلاۋ كۋرسىنان وتكىزىپ, بىلىكتىلىكتى راستاۋ جانە بەرۋ ورتالىعىنىڭ ناتيجەسى بويىنشا 184 وقۋ ءبىتىرۋشىسىنىڭ 148-ءى بىلىكتىلىك تەستىن ناتيجەلى تاپسىرىپ شىققان. بۇل №4 كاسىپتىك ليتسەيدە تاجىريبەلى ۇستازدار ورتاسىنىڭ قالىپتاسقاندىعى مەن ماماندىققا دايارلاۋ ءتاسىلىنىڭ دۇرىس جولعا قويىلعاندىعىن كورسەتەدى.
بۇرىن «اۋىل شارۋاشىلىعىن سۋلاندىرۋ مەحانيزاتورى» دەيتىن ماماندىققا سۇرانىس مول بولسا, بۇگىنگى زامان تالابىنا ساي «اۆتوموبيل جوندەۋشى جانە تەحنيكالىق قىزمەت كورسەتۋ» ماماندىعىنا قىزىعۋشىلىق تانىتۋ جانە جەكە كاسىپكەرلەر تاراپىنان تەحنيكا مامانىنا سۇرانىستىڭ ارتۋىنا بايلانىستى ليتسەي زاماناۋي ماماندىقتاردى يگەرۋدى قولعا الىپ وتىر. رەسپۋبليكا كولەمىندەگى ءىرىلى-ۇساق قالالار مەن اۋدانداردى ايتپاعاننىڭ وزىندە, ءبىر عانا تالعار قالاسىندا ماشينا جوندەۋ ورتالىقتارى كوپتەپ اشىلا باستاعان. سول سەبەپتى دە «اۆتوموبيل جوندەۋشى جانە تەحنيكالىق قىزمەت كورسەتۋ» ماماندىعى بويىنشا جىلىنا 50 شاكىرت بىلىكتى دايىن مامان رەتىندە ومىردە ءوز ورنىن تاۋىپ, ەڭبەك جولىنا تۇسۋدە. تەوريالىق ساباق كەزىندە يا.ياگمۋروۆ, س.جاقاباەۆ, و.جۇكەلوۆ سەكىلدى 25-30 جىلدىق ەڭبەك ءوتىلى بار تاجىريبەلى وقىتۋشىلار جاس مامانداردى شەبەرلىككە باۋليدى.
قانات ەسكەندىر.
الماتى.
