«حوككەي وينايتىن ءار ەلدە قاھارمان بار. ال قازاقستان ءۇشىن ايدىنداعى جۇلدىزداردىڭ اراسىندا بوريس الەكساندروۆتىڭ شوقتىعى بيىك. 46 جاسىندا كولىك اپاتىنان قازا تاپقانىنا قاراماستان, ونىڭ ۇلتتىق كومانداعا باپكەر رەتىندە سىڭىرگەن ەڭبەگىن جوعارى باعالايمىز», دەلىنگەن حالىقارالىق فەدەراتسيانىڭ مالىمدەمەسىندە.
ب.الەكساندروۆ 1955 جىلى وسكەمەندە دۇنيەگە كەلگەن. ول 1970-ءشى جىلداردان باستاپ جەرگىلىكتى «تورپەدو» كلۋبىندا تەر توكتى. كەيىننەن تسسكا كلۋبىنا اۋىستى. جەرلەسىمىز 1976 جىلى ينسبرۋكتە وتكەن قىسقى وليمپيادا ويىندارىندا كسرو قۇراماسىنىڭ التىن مەدال يەلەنۋىنە زور ۇلەس قوستى.
قازاقستان تاۋەلسىزدىك العان سوڭ ب.الەكساندروۆ ەل بىرىنشىلىگىندە ونەر كورسەتتى. ال 1996 جىلى باپكەرلىك قىزمەتكە اۋىستى. سول كەزەڭدە حوككەيدەن قازاقستان قۇراماسى كوپتەگەن جەتىستىككە ەتىپ, 1998 جىلى جاپونيادا وتكەن قىسقى وليمپياداعا جولداما الدى.
وكىنىشكە قاراي, 2002 جىلى ب.الەكساندروۆ كولىك اپاتىنان قازا تاپتى. قازىرگى تاڭدا وسكەمەندەگى سپورت كەشەنى حوككەيشىنىڭ اتىمەن اتالادى.
«ول ومىرمەن ەرتە قوشتاستى. الايدا ءوز ەلىندە حوككەيدىڭ دامۋىنا ەرەكشە ۇلەس قوستى دەپ ايتا الامىز», دەلىنگەن IIHF مالىمدەمەسىندە.
«داڭق زالىنا» ەنگەن حوككەيشىلەردى تانىستىرۋ ءراسىمى 2019 جىلعى 26 مامىردا براتيسلاۆادا وتەدى.
جاڭا وزگەرتۋلەردى قوسقاندا قازىرگى تاڭدا IIHF «داڭق زالىندا» 224 مۇشە بار. ايتا كەتۋ كەرەك, بوريس الەكساندروم «داڭق زالىنا» ەنگەن تۇڭعىش قازاقستاندىق.
عالىم سۇلەيمەن,
«ەگەمەن قازاقستان»
