«تۋريزم جاستار اراسىنداعى كاسىپكەرلىكتى دامىتۋ باعىتىندا كەلەشەگى زور سالاعا اينالادى. ءبىزدىڭ ەلىمىزدە ەكولوگيالىق, سپورتتىق-ساۋىقتىرۋ جانە ەكسترەمالدى تۋريزم سالالارىن دامىتۋ ءۇشىن بارلىق مۇمكىندىكتەر بار. تۋريزم سالاسى بويىنشا بىلىكتى مامانداردىڭ جەتىسپەۋشىلىگىن ەسكەرە وتىرىپ, ەلىمىزدىڭ جوعارى وقۋ ورىندارىندا تۋريزم جانە قوناقۇي بيزنەسى فاكۋلتەتتەرىن كەڭىنەن اشۋ قاجەت», دەدى پارلامەنت سەناتىنىڭ توراعاسى.
سونداي-اق ول IT-كومپانيالاردا ۇلكەن جەتىستىكتەرگە جەتكەن جاس ماماندارعا قولداۋ كورسەتىلەتىنىن ايتتى.
«بولاشاعى زور ازاماتتار ەل يگىلىگى ءۇشىن, ەكونوميكامىزدى دامىتۋ جولىندا قىزمەت ەتۋى قاجەت. ارينە, ەڭ الدىمەن, ءبىز ولارعا قاجەتتى جاعداي جاساۋعا ءتيىسپىز. دارىندى جاستارعا جەتكىلىكتى دەڭگەيدە قولداۋ كورسەتپەي, «الدىڭعى قاتارلى زياتكەر مەملەكەت» قاتارىنا قوسىلۋ قيىن ەكەنىن مويىنداۋىمىز كەرەك», دەدى ول.
بۇدان سوڭ, ق.توقاەۆ «ۆولونتەرلىك قىزمەت تۋرالى» زاڭدى جەتىلدىرۋ, پىسىقتاۋ جۇمىستارىن جۇرگىزۋ مىندەتى تۇرعانىن اتاپ ءوتتى.
«قازىرگى الەمدە ۆولونتەرلىك ينستيتۋتىن دامىتۋعا ۇلكەن ءمان بەرىلۋدە. ۆولونتەرلەردىڭ ازاماتتىق قوعامدى قۇرۋ ىسىنە جانە ونى نىعايتۋعا قوسىپ وتىرعان ۇلەسىنىڭ ماڭىزى جوعارى. مەملەكەت باسشىسى ۆولونتەرلىك قىزمەتپەن بەلسەندى اينالىسىپ جۇرگەن ستۋدەنتتەردىڭ شاكىرتاقىلارىن كوبەيتۋ تۋرالى تاپسىرما بەردى. پارلامەنتتىڭ الدىندا «ۆولونتەرلىك قىزمەت تۋرالى» زاڭدى جەتىلدىرۋ, پىسىقتاۋ جۇمىستارىن جۇرگىزۋ مىندەتى تۇر. زاڭنىڭ قولدانىستاعى رەداكتسياسى ۆولونتەرلىك قىزمەتتى ىنتالاندىرۋ مەن كوتەرمەلەۋدىڭ ناقتى تاسىلدەرىن رەگلامەنتتەمەيدى», دەدى قاسىم-جومارت توقاەۆ.
