«الەۋمەتتىك زەرتتەۋلەردىڭ ناتيجەلەرى بويىنشا ەلىمىزدەگى جاستاردىڭ 40 %-عا جۋىعى تۇراقتى تۇردە جۇمىسقا ورنالاسۋ پروبلەمالارىن باستارىنان وتكىزەدى ەكەن. الايدا, قازىرگى ۋاقىتتا جاستاردىڭ اراسىنداعى جۇمىسسىزدىق بارلىق الەمدە وتكىر ماسەلەگە اينالىپ وتىر. سوڭعى دەرەكتەر بويىنشا جاستاردىڭ جۇمىسسىزدىق دەڭگەيى 13%-دى قۇرايدى, ال كەيبىر ەلدەردە 40%-عا جەتەدى. بۇۇ دەرەكتەرى بويىنشا الەمدەگى ءاربىر بەسىنشى جاس وقىمايدى جانە جۇمىس ىستەمەيدى», دەدى پارلامەنت سەناتىنىڭ توراعاسى.
ونىڭ ايتۋىنشا, جاستاردىڭ جۇمىسسىزدىعىن جويۋدىڭ باستى مۇمكىندىكتەرىن شاعىن جانە ورتا بيزنەس سالاسىنان تابۋعا بولادى.
ء«بىزدىڭ جاستارىمىزدىڭ بويىندا كاسىپكەرلىك باستامالاردى ىسكە اسىرا ءبىلۋ قابىلەتىن تاربيەلەۋ قاجەت. قازاقستانمەن سالىستىرعاندا ەكونوميكالىق جاعدايى اناعۇرلىم قيىن جاعدايداعى كورشى مەملەكەتتەردىڭ جاستارىنىڭ قانشالىقتى يكەمدى, ىسكەر ەكەنى, ءوز شاعىن بيزنەستەرىن جۇرگىزۋگە بەيىمدەلگەنى بايقالىپ وتىر. بۇل ەلدەردە جاستار جاڭا ماماندىقتاردى يگەرگەن, ءوز تۋىستارى مەن ءوز مەملەكەتىنە قولداۋ كورسەتۋ ماقساتىندا وزدىگىنەن جۇمىس تاۋىپ, شەتەلدەردە دە جۇمىس ىستەۋدە. وكىنىشكە وراي, كاسىپكەرلىك سالاسى قازاقستان جاستارىن ءالى دە قىزىقتىرماي وتىر. الەۋمەتتىك ساۋالداردىڭ دەرەكتەرى بويىنشا سۇرالعان جاستاردىڭ 51 %-ىنىڭ بيزنەسپەن اينالىسۋ تۋرالى وي جوسپارىندا جوق ەكەن. بۇل پروبلەماعا باسقا جاعىنان قاراعان دۇرىس. مۇمكىن, ءبىز بيزنەسپەن اينالىسۋ ءۇشىن ءوزىمىز ءتيىستى جاعداي جاساماي وتىرعان شىعارمىز؟», دەدى ق.توقاەۆ.
سونداي-اق ول «جاس مامان» باعدارلاماسى جاڭعىرتىلعان 200 وقۋ ورنىنىڭ نەگىزىندە يندۋستريالىق جانە سەرۆيستىك باعىتتاعى 100 اسا قاجەتتى ماماندىق بويىنشا مامانداردى دايارلاۋ كوزدەلگەنىن اتاپ ءوتتى.
«جاستاردىڭ كاسىپكەرلىگىن ىنتالاندىرۋ «بيزنەستىڭ جول كارتاسى-2020» باعدارلاماسى بويىنشا گرانتتاردىڭ كولەمىن ەكى ەسە ۇلعايتۋدى كوزدەيدى. جاستاردىڭ ستارتاپتارىن قولداۋ قورى قۇرىلىپ, جاستاردى بيزنەستىڭ نەگىزدەرىنە وقىتۋ جولعا قويىلادى, ءار وڭىردە سانى 100 مىڭعا دەيىنگى ءبىلىمدى جۇمىسسىز جاستار مەن ءوزىن-ءوزى جۇمىسپەن قامتىعان ادامدارعا ارنالعان «جاس كاسىپكەر» باعدارلاماسى دايىندالاتىن بولادى», دەدى ول.
