«10 جىل كولەمىندە كوپتەگەن جوبالاردى جۇزەگە اسىردىق. بۇگىندە مەملەكەتتىك قىزمەتكەرلەرگە مەملەكەتتىك تىلمەن قاتار اعىلشىن ءتىلىن دە ۇيرەتىپ جاتىرمىز. بىزدە ءبارى تەگىن. بۇل ماقساتتا جەرگىلىكتى بيۋجەتتەن جىل سايىن قارجى ءبولىنىپ وتىرادى. قازىر وبلىس اكىمى دانيال احمەتوۆتىڭ دارىگەرلەرگە اعىلشىن ءتىلىن وقىتۋ جونىندەگى تاپسىرماسىنا سايكەس 20-عا جۋىق مەديتسينا قىزمەتكەرىنە اعىلشىن ءتىلىن وقىتىپ جاتقان جايىمىز بار. ءبىز تەك ءتىل ۇيرەتۋمەن عانا شۇعىلدانبايمىز, ءارتۇرلى ءىس-شارالار وتكىزەمىز. شىعىس قازاقستان وبلىستىق لينگۆيستيكالىق ورتالىعىمەن بىرلەسە جۇمىس ىستەيمىز», دەيدى ورتالىق ديرەكتورى ايناش الىبەكقىزى.
جيىرما دارىگەردىڭ قاتارىندا وسى ورتالىقتا اعىلشىن ءتىلىن ۇيرەنىپ جاتقان بەسقاراعاي اۋداندىق ورتالىق اۋرۋحاناسىنىڭ فەلدشەرى ساۋلە كۋركۋمباەۆامەن سويلەسكەنىمىزدە ءتىل وقىتۋ كۋرسىنا ءۇش ايدان بەرى بارىپ جۇرگەنىن ايتتى. ء«وزىم ەڭبەك ەتەتىن اۋرۋحانادان ءبىر ەمەس, بىرنەشە كىسى اعىلشىن ءتىلىن ۇيرەنىپ جاتىرمىز. قازىر وبلىستىڭ دارىگەرلەرى بىلىكتىلىگىن ارتتىرۋ ءۇشىن شەتەلدەرگە جىبەرىلىپ جاتىر عوي. مەنى دە جىبەرگەن جاعدايدا دايىن بولايىن دەپ وسى كۋرسقا جازىلدىم. جالپى, ءتىل بىلگەننىڭ ارتىقتىعى جوق قوي», دەيدى دارىگەر.
ورتالىق جانىنان «English speaking club», «ادەمى سويلە» شەشەندىك شەبەرلىك كلۋبتارى مەن «TEDxBESK» دەگەن كونفەرەنتسيا-ستۋديا اشىلىپتى. ايناش الىبەكقىزى شەبەرلىك كلۋبى مەن ستۋديا وسىنداعى ءتىل ۇيرەنۋشىلەردىڭ ءوز ويىن قىسىلماي, اشىق ءارى ەركىن جەتكىزۋىنە, كوركەم دە كەستەلى سويلەۋىنە ماشىقتاندىرۋ ءھام لاتىن ءالىپبيىن وقىتۋ ماقساتىندا اشىلعانىن جەتكىزدى. «شەشەندىك شەبەرلىك كلۋبى بىلتىر تاۋەلسىزدىك كۇنى مەرەكەسىندە اشىلدى. بۇل ءبىزدىڭ بىلۋىمىزشە, تىلدەردى وقىتۋ ورتالىعى جانىنان اشىلىپ وتىرعان العاشقى كلۋب بولۋى كەرەك. الداعى ۋاقىتتا ءتىل ۇيرەنۋشىلەردىڭ شەشەندىك شەبەرلىگىن شىڭداۋ ءۇشىن تانىمال تۇلعالاردى شاقىرۋ جوسپارىمىزدا بار», دەيدى ورتالىق ديرەكتورى.
ازامات قاسىم,
«Egemen Qazaqstan»
شىعىس قازاقستان وبلىسى, بەسقاراعاي اۋدانى
