«مادەنيەت ارقىلى ۇنقاتىسۋ» حالىقارالىق جوباسى اياسىندا ەلباسى كىتاپحاناسى يران يسلام رەسپۋبليكاسى ەلشىلىگىمەن بىرلەسە ۇيىمداستىرعان ايتۋلى شارانىڭ تۇساۋكەسەرىنە يران يسلام رەسپۋبليكاسىنىڭ قازاقستانداعى ەلشىسى مادجيد سامادزادە سابەر, كورمە اۆتورى سايد حۋشمانەش جانە تاعى دا باسقا قۇرمەتتى قوناقتار مەن ونەرتانۋشى ماماندار قاتىستى.
– كالليگرامما ونەرىنىڭ 30-40 جىلدىق تاريحى بار. يراندىق ناققاشي-حاتتى تاريحي جازبالار مەن قاسيەتتى جەرلەردەن, مورلەر مەن ىدىستاردىڭ بەتىنەن كەزىكتىرۋگە بولادى. ونىڭ نەگىزىن قالاعان پيلارام, مافي, زەندەرۋدي, افدجەي, ەحساي سىندى تۇلعالاردىڭ جولىن بۇگىندە سايد حۋشمانەش جالعاستىرىپ, كالليگرامما ونەرىنىڭ كەڭ تارالۋىنا ۇلەس قوسىپ وتىر. ايتا كەتەر ماڭىزدى جايت, كالليگرامما كورمەسىندەگى سۋرەتشى جۇمىستارىنان ونىڭ وسى ونەر تاريحىنىڭ قىر-سىرىن مەڭگەرىپ جازۋدىڭ جانە ونىڭ وقىلۋىنىڭ قيىندىعىنان ەش تايسالماعاندىعىن, جاڭالىقتار ەنگىزۋ بارىسىندا كونە داۋىرلەرگە دە تيەسىلى ەلەمەنتتەردى شىنايىلىقپەن سۋرەتتەي بىلگەندىگىن بايقاۋعا بولادى, – دەدى ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا كورمەنىڭ سالتاناتتى اشىلۋ راسىمىندە.
ايتۋلى كورمەگە يراندىق سۋرەتشى سايد حۋشمانەشتىڭ 40-قا جۋىق جۇمىسى قويىلدى. ءوزىنىڭ بار كاسىبي جانە شىعارماشىلىق عۇمىرىن كالليگرافيا ونەرىنە ارناعان قىلقالام يەسى ەلوردا تورىندە وتكەن بۇگىنگى جاۋاپتى ساتكە 3 جىل بويى ۇزدىكسىز ءارى تىڭعىلىقتى دايىندالىپتى. بۇل جونىندە سايد حۋشمانەش بىلاي دەدى:
كالليگرافيا ونەرىنىڭ جاڭا اعىمىن قازاق حالقىنا كورسەتۋدى ۇيعاردىق. جالپى, ءوزىم كالليگرافيا ونەرىمەن 27 جىلدان بەرى اينالىسىپ ءجۇرمىن. ونىڭ 7 جىلىن وقۋعا ارناسام, قالعان 20 جىل بويى كالليگرافيا جانە گرافيكالاۋ ونەرى بويىنشا ءدارىس وقىپ كەلەمىن. وسى جىلداردا كالليگرامما ونەرى بويىنشا سۋرەت سالۋ تەحنيكامدى جەتىلدىردىم. العاشقى كەزدە سالىنعان تۋىندىلارىم مەن قازىرگى جۇمىستارىم ءبىر-بىرىنە مۇلدەم ۇقسامايدى. بۇگىنگى كورمەدەگى قازاقستاندىق ونەرسۇيەر قاۋىم نازارىنا ۇسىنىلىپ وتىرعان توپتاماعا تازحيبپەن بەزەندىرىلگەن ءارى يراندىق كلاسسيكالىق جانە ءداستۇرلى كالليگرافياعا جاتقىزىلاتىن «ناستاليك» جازۋى قولدانىلعان بىرنەشە تۋىندى, سونداي-اق زاماناۋي يراندىق گرافيكا جانە كالليگرافيا قالىبىنا كەلتىرىلگەن ءداستۇرلى ناستاليك, شەكاستە جازۋلارى قولدانىلعان بىرقاتار تۋىندىلار قويىلدى, دەپ سۋرەتشى ءىس-شارا باعدارلاماسىمەن جان-جاقتى تانىستىرىپ ءوتتى.
اتالعان كورمە ەلباسى كىتاپحاناسى مۋزەيىنىڭ عيماراتىندا 2019 جىلدىڭ 10 اقپانىنا دەيىن جالعاسادى.
نازەركە جۇماباي,
«Egemen Qazaqstan»
