جۇگەرىدەن سۋسىن دايىنداۋ قازاق ءۇشىن تاڭسىق ەمەس. بۇل اپتاپ ىستىقتا تاپتىرمايتىن سۋسىن. جۇرەگىڭ سازسا سۋسىن تۇبىندەگى ءدانى − تاعام. قالا, اۋدان بىتكەننىڭ كوپشىلىك كوپ جۇرەتىن ورىندارىندا جۇگەرى, تارى, كۇرىشتەن سۋسىن قايناتقاندار قىمىز ساپىرعانداي وجاۋمەن سۇيىق, قويۋىن ارالاستىرىپ ساتىپ وتىرادى.
ال قاسىم دايىنداعان سۋسىننىڭ ودان ءجونى بولەك. الا شاڭنىڭ ورتاسىندا انتيسانيتارلىق جاعدايدا وتىرعان ساۋداگەرلەردەي ەمەس, ءوز ونىمىنە ۇلكەن جاۋاپكەرشىلىكپەن قارايدى. پاتەنتى, سەرتيفيكاتى بار. قازاق تاعامتانۋ اكادەمياسىنىڭ ساپاسى جاقسى, تۇتىنۋشىلارعا ۇسىنۋعا بولادى دەگەن نەگىزدەمەسىن العان. ياعني, سانيتارلىق تالاپتارعا ساي ءونىم.
جۇگەرىدەن سۋسىن جاساپ شىعارسام دەگەن يدەيامەن ءىس بىتپەيدى. تالاپتان بولەك, تۇتىنۋشىلاردىڭ تالعامىنان شىعاتىنداي ەتىپ دايىنداۋ ادىستەرى بىلىكتىلىكتى قاجەت ەتەدى. كاسىپكەرلىكتى ورىستەتۋ ءۇشىن ءبىلىم كەرەك. وسىنىڭ ءبارىن وي-ەلەگىنەن وتكىزگەن قاسىم ءتۇرلى جوبالارعا قاتىسىپ ءجۇرىپ, يننوۆاتسيالىق جوبالارعا مەملەكەت تاراپىنان بولىنەتىن 3 ميلليون تەڭگە قارجىنى جەڭىپ الدى.
– جۇگەرىدە ا, ۆ, س, جانە D دارۋمەنى بار, − دەيدى قاسىم. – ادام اعزاسىنا كەرەكتى كالي, ماگني سياقتى ەلەمەنتتەر مول. ياعني, شولىركەسەڭىز كەپكەن ىندىنىڭىزدى باسىپ قانا قويمايدى, دەنساۋلىعىڭىزدى دا نىعايتادى.
جاڭاقورعاندىق كاسىپكەرلەر ءسوزىنىڭ جانى بار. بىردە الەۋمەتتىك جەلىدە كورشى ەلدەردىڭ بىرىندەگى شىرىن دايىندايتىن تسەحتا جۇمىس ىستەگەن قازاق جىگىتى ونداعى سۇمدىق بىلىقتىڭ بەتىن اشتى. جىلعا جۋىق جۇمىس ىستەپ ءجۇرىپ, تسەحقا اكەلىنگەن بىردە-ءبىر جەمىستى كورمەپتى. قاي جاقتا دايىندالعانى بەلگىسىز كونتسەنتراتتى قوسىپ, الۋان ءتۇرلى شىرىندار دايارلانادى ەكەن. حيميالىق قوسپا بولعاننان كەيىن ادام اعزاسىنا زيان ەكەندىگى بەلگىلى.
ال ەن دالادا جايقالىپ ءوسىپ تۇرعان جۇگەرىنىڭ ءجونى بولەك. تابيعي سۋسىن. وسىعان دەيىن پوپكورن دايىنداپ, تۇتىنۋشىلارىن تاپقان قاسىم ەندى قاربىز بەن قاۋىننان ءشاربات دايىنداماق. شيكىزات قايدا دەيتىندەي ەمەس, باۋ-باقشا ونىمدەرى اۋداندا ۇلكەن كولەمدە وسىرىلەدى. «الىستان اربالاعانشا, جاقىننان دوربالا» دەگەن وسى شىعار.
باقتيار تايجان,
«Egemen Qazaqstan»
قىزىلوردا وبلىسى
