– ءسىز اۋەلى كلاسسيكالىق ۇلگىدە اڭگىمە جازدىڭىز. كەيىن, قولتاڭباڭىز مودەرنيستىك نۇسقادا ايقىندالدى. ءتىپتى, پوستمودەرن قالامگەر رەتىندە تانىلىپ ۇلگەردىڭىز. ادەتتە, جۇرت پوستمودەرن تاقىرىبىنا كوبىرەك كوڭىل ءبولىپ, ءسىزدىڭ اشقان جازۋ مانەرىڭىزدى نازاردان تىس قالدىرىپ جاتادى.
– قالام ادەتتە, جازعان شىعارمالار ارقىلى ەمەس, كوپ وقىعان كىتاپتار نەگىزىندە ۇشتالادى. وقۋدان جازۋ مادەنيەتى پايدا بولادى. مەنىڭ كىتابي رۋحاني ۇستازدارىم سابىرلى, بىرقالىپتى دەتالداردى بەينەلەگەندە انىق بولۋعا ۇيرەتتى. ۋاقيعانى قۇبىلىسى ارقىلى سۋرەتتەگەندە, قاھارماندى ارەكەتىنەن كورسەتكەندە, مانەردىڭ قيىندىعىنان ۇزاق جازا المايسىز. دەمەك, سوزدەن سالماق كەتكەندە, ويدان كۇردەلى پايىم جوعالعاندا, قالام دا وزا شاۋىپ, قايتا-قايتا مانەردىڭ الدىنا تۇسە بەرەدى. اقىرى مانەر بۇزىلىپ, ستيل جوعالادى. ستيل – جازعاندا, تەمىردەي ءتارتىپ, وقىعاندا, ارعىماقتاي ەركىن. ەكىنشى, مودەرن تۇسىنىگى جازۋ ۇلگىلەرىنەن قالىپتاسسا, سونىمەن قاتار قوس عاسىردىڭ توعىسىندا, پاريجدە, ەۋروپادا توپتاسقان اقىن-جازۋشىلار ۇزاق ىزدەنىستەن سوڭ ويلاپ تاپقان ناقتى ءادىس-ءتاسىل كورىنىسىنەن تۇرسا, پوستمودەرن – بۇل مانەردىڭ ءوزى ەمەس, ءماتىن ءومىر ءسۇرىپ وتىرعان مادەني سيتۋاتسيا. پوستمودەرنيزمدى بۇقارالىق اقپارات قۇرالدارىنسىز تۇسىنە المايسىز. باق-تىڭ قوعامعا اسەرى – پوستمودەرنيزم. اقپاراتتىق قوعام, پوستيندۋستريالدىق قوعام, وزىق تەحنولوگيالار زامانى – اتالمىش فيلوسوفيانىڭ جەتەكشى ۇعىمدارى. كارل ماركس پەن فريدريح ەنگەلس ەنگىزگەن قوعامدىق فورماتسيالار تۋرالى ىلىمدە قوعامنىڭ دەڭگەي-دارەجەسى ءوندىرىس قۇرال-جابدىقتارىنىڭ دامۋىنان بايقالسا (شاقپاق تاستار, قايراق تاستار, سويىلدار, اربالار, جەر وڭدەۋشى سوقالار, مانۋفاكتۋرالار), پوستمودەرنيزم داۋىرىندە اقپاراتتىق قۇرالداردىڭ دامۋىنان اڭعارامىز. پوستمودەرن – تاۋەكەل قوعامى. بۇل زاماندا ءبىرىنشى ورىنعا قوعامنىڭ, مەملەكەتتىڭ قاۋىپسىزدىگى شىعادى. سەبەبى, قاۋىپ-قاتەر كوبەيەدى. مودەرن كەزەڭىندە ءبىرىنشى ورىندا تۇراقتىلىق تۇرعان ەدى. بارشا كاپيتاليستىك ەل داعدارىستان قورقاتىن. سوسىن دە ءسوسسيۋردىڭ لينگۆيستيكالىق رەۆوليۋتسياسى, ياعني دىبىس پەن بەلگى اراقاتىناسىندا بەلگىنىڭ ۇستەمدىككە قول جەتكىزۋى بۇكىل الەمنەن ءماتىن جاسادى. ءتىل دىبىستىق قارىم-قاتىناس قۇرالىنان تاڭبالاردى وقي ءبىلۋ قابىلەتىنە اينالدى. دەمەك, تاڭبالار بەلگىلى ءبىر اقپارات ساقتاعان نە ارقالاعان ءتىل دارەجەسىنە جەتتى. ءسويتىپ ساندار جانە ساندار قۇرىلىمى ماتەماتيكالىق ءتىل, گوتيكا-باروككو-كلاسسيكا ارحيتەكتۋرالىق ءتىل, ەكراندار اقپاراتتىق-بۇقارالىق ءتىل بولدى. كومپيۋتەر, پرينتەر, كوشىرمە اپپارات, پروتسەسسور, سمارتفوندار, كلاۆياتۋرا, ۇيالى تەلەفوندار, ءبارىن ءبىر-بىرىمەن جالعاپ تۇرعان ينتەرنەت جەلىسى, ءبىزدىڭ بۇل قۇرالدارعا دەگەن تاۋەلدىلىگىمىز, ونىڭ سالدارى – بۇل پوستمودەرنيستىك قۇبىلىستار. سالدارى قانداي: ءبىلىم جويىلدى, اقپارات العا ۇمتىلدى, ەمتيحاندار قاراپايىم كروسسۆوردقا, ءان سالۋ فونوگرامماعا, ءاننىڭ ءوزى تۇپنۇسقاسىز ارانجيروۆكاعا, جازۋ-سىزۋ تەحنولوگياعا, حات-حابار سمايليكتەرگە اينالىپ بارا جاتىر.
– قالالىق قازاق پروزاسى تۋرالى نە ايتار ەدىڭىز؟
– ادەتتە, قازاق ادەبيەتىندە, قالىپتاسقان جاڭساق پىكىر اياسىندا قالالىق پروزا دەپ قالادا جۇرگەن اۋىل پەرسوناجدارى تۋرالى حيكايالاردى ايتادى. بىراق بىزگە ارعى اتاسىنان بەرى شاھاردا تۇرىپ كەلە جاتقان نەمەسە قالادا تۋىپ-وسكەن قالالىق قازاقتار جايلى رومان-اڭگىمەلەر كەرەك. ياعني, كەيىپكەرلەر دە, كەسكىندەپ وتىرعان قالام دا, شىن مانىسىندەگى قالا مادەنيەتىن بويىنا سىڭىرگەن قۇبىلىس بولۋعا ءتيىستى. دەسەك تە, بۇل – ۋاقىتشا ماسەلە, بولاشاقتا اتالعان تاقىرىپ وزىنەن-ءوزى ايقىندالىپ, وزىنەن-ءوزى شەشىلەدى.
– قىسقا جازۋ مانەرى, اقىندىق پروزا تالاپتارى قازاققا تاڭسىق دۇنيە مە؟
– قازاق پروزاسىندا ىقشامدىلىق تا, اقىندىق سيپات تا بار, بىراق سيرەك. ول ءححى عاسىردىڭ تالاپتارى مودەرنيستىك ادەبيەت ەرەجەلەرىنە سايكەس كەلەدى مەن وسىعان وراي انىق (ناقتى) دەتال پروزاسى دەگەن تەرمين ويلاپ تاپتىم.
– «گۇلدەر مەن كىتاپتاردا» كەزدەسە بەرمەيتىن ەرەكشە فورمالار بار. «كىتاپتار», «قالامگەر», «گۇلدەر», ء«تىلدىڭ دەرتى», «ساعىنىش» تاراۋلارى سونىڭ ايعاعى ىسپەتتى. مۇنى قالاي تۇسىندىرەسىز؟
– قىپ-قىسقا روماندا, ىقشامدىلىعىنا قاراماستان, سان ءتۇرلى تاقىرىپ كوتەرىلىپ, سان ءتۇرلى ستيل ارالاستى. مەن كىتاپقا ءوزىمدى تولعاندىرىپ جۇرگەن, كۇن تارتىبىندە تۇرعان وتكىر ماسەلەلەردى ەنگىزدىم دەپ ويلايمىن.
– ءامىرحان بالقىبەكتىڭ «گۇلدەر مەن كىتاپتارداعى» گۇلدەر, قالامگەرلەر, كىتاپتار تىزبەگى تۋرالى پىكىرى وسى تاراۋلار جايلى ناقتى ايتىلعان جالعىز پىكىر. وسى پىكىرمەن قانشالىقتى كەلىسەسىز؟ ء«تىزىم» جاساۋىڭىزدىڭ تولىق ءمانىن اشىپ بەرە العان با؟
– بۇل ءتىزىم – تاعزىم ءتىزىمى. ءتىپتى الەم ادەبيەتىندەگى دانىشپاندار مەن ۇلى شىعارمالارعا بەرىلگەن لايىقتى باعا, كورسەتىلگەن قۇرمەت. قادىر تۇتقاندىق بەلگىسى. دالىرەك ايتقاندا – قۇرمەت تاقتاسى. كونە مىسىردا اتاق-ابىرويى اسقان ادامداردىڭ اتى-جوندەرىن مۇسىندەرگە جازىپ قوياتىن بولعان. ەگەر ول ادام كەيىن جاڭساق باسىپ, بەدەلىنەن ايرىلىپ جاتسا, اتىن مۇسىننەن ءوشىرىپ تاستايدى ەكەن.
– وسىدان بەس جىل بۇرىن باق بەتتەرىندە «گۇلدەر مەن كىتاپتاردىڭ» جالعاسى بولاتىندىعىن حابارلاپ ەدىڭىز..
– جالعاسى جازىلىپ جاتىر. مەنىڭ ءبىر قىزىق عادەتىم بار: بىرنەشە شىعارمانى قاتار جازا بەرەمىن. «گۇلدەر مەن كىتاپتاردىڭ» جالعاسى – ء«تاڭىردىڭ كىتابى» نەمەسە «پۇت-كىتاپ».
– شىعارماشىلىق شەبەرحاناڭىز جايلى سيرەك ايتاسىز.
– بەرتولد برەحتىڭ ايتاتىنى بار: «تەك جاڭا فورما عانا جاڭا ءماندى پاش ەتە الادى». ال ونەر-مادەنيەت دەگەنىمىز – جاڭا ماندەردى, مازمۇنداردى, قۇندىلىقتاردى تۋدىرۋ, قالىپتاستىرۋ, جاساۋ. فيلوسوفيا, ونەر فيلوسوفياسى ادامعا ەركىندىك, وي ەركىندىگىن, ارەكەت ەركىندىگىن بەرۋى ءتيىس. ستيلگە جەتۋ, جاڭا فورما تابۋ قيىن. ستيل دەگەنىمىز – فورما. ستيل اتموسفەرا تۋدىرادى. اتموسفەرا – ونەردىڭ مۇراتى, ءتىپتى, ءوزى. اتموسفەرانى فالش بۇزادى. فالشتىڭ شىققان تەگى – پافوس, كوپسوزدىلىك, جالعان وبراز, اقىلگويلىك, تاربيەشىلىك. ءستيلدىڭ فورماسى دا, فورمۋلاسى دا ۇشتاعان تالاپتان تۇرادى: ءسوز – ناق, سويلەم – ىقشام, ارەكەت – انىق. بوياۋدى جاعا بەرسەڭىز, ءتۇستىڭ اجارىنان ايىرىلاسىز. نە قويۋلانىپ كەتەدى, نە سۇيىلىپ كەتەدى. ىزدەگەن ءتۇسىڭىز جوعالادى, ەندى ونى جوندەي المايسىز, سىزگە باسقا پولوتنو كەرەك. ءماتىن اتموسفەراسى ۆيرتۋوز قالامنىڭ ءسوز ۇنەمدەگەن قارىم-قابىلەتىنىڭ پەرزەنتى. جازۋ ءۇشىن بىراق, وقۋ كەرەك.
– ەرتە تانىلدىڭىز. كىتاپتارىڭىز كوپتەگەن تىلگە ءتارجىمالاندى.
– ەرتە تانىلعاننىڭ بەينەتى دە كوپ. ءسىزدى قۇلاتقىسى كەلەتىندەر كوبەيەدى. سۇرىنگەنىڭىزگە قۋاناتىن, جىعىلعانىڭىزعا توي جاسايتىن قالامداستارىڭىز, ارىپتەستەرىڭىز ارتا تۇسەدى. تاپقان ابىرويدى جورىق تۋىنداي جىقپاي قولدا بەرىك ۇستاپ تۇرۋ دا وڭاي ەمەس. دەسەك تە, تاعدىرىما ريزامىن. جولىمنان تايعان جوقپىن, ۇلتتىق مۇراتىمنان اداسقان جوقپىن.
– ورىسشا دا جازاسىز. اعىلشىن تىلىنە كوشكەن دۇرىس ەمەس پە؟
– كەلەر ۇرپاق ءۇش تىلدە جازاتىن بولادى, ءبىزدىڭ تولقىن كەش قالدى, ءبىز ءۇش ءتىلدى وقىرمان رەتىندە قالىپتاسساق تا جەتەدى. قازىر قازاق, ورىس تىلدەرىمەن قاتار اعىلشىن تىلىندە دە جازا الاتىن ءبىر-اق ادام بار – ول زاۋرە باتاەۆا.
– كارل ياسپەرس ءوزىنىڭ «تاريحتىڭ ءمانى مەن مىندەتتەرىندە» فيلوسوفتاردى التى تيپكە بولەدى. ءوزىڭىزدى قاي تيپكە جاتقىزاسىز؟
– لەوپولد فون رانكە دەگەن ويشىل, تاريحشى: «دۇنيە ءجۇزى تاريحى, نەگىزى, باتىس تاريحى ەدى», دەگەن ەكەن. فيلوسوفيا تاريحى دا, تۇسىنىگى دە باتىستىق ولشەمدە دامىدى. كارل ياسپەرس فيلوسوفيالىق ويلاۋدى ءتۇپ تەگىمىزدىڭ, سويىمىزدىڭ ويانۋى, ءوز تاعدىر-تالايىمىزدى ءوز قولىمىزعا الۋىمىز دەگەن دەفينيتسيانى العا تارتتى. ول «وي-سانامىزدىڭ ءۇش قاينارى – تاڭعالىس پەن تانىم, كۇمان مەن انىقتىق (ناقتىلىق), اداسۋشىلىق پەن قالىپتاسۋشىلىق – قاشاندا فيلوسوفيانىڭ سارقىلۋىنا جول بەرمەيدى», دەپ جازدى. ەندى ءبىر سوزىندە «ادام بولمىسى ويشىلدىقتان باستالادى», دەدى. بار جۇمباقتىڭ شەشىمىن تابۋدى كوزدەگەن تۇلعا پالساپالىقتان, پالساپالىق ويلانۋدان قالادى, سونىمەن قاتار عىلىمنان حابارى بار ادام ونى بولمىستى تانۋ دەپ تۇسىنسە, ول عىلىم تۋرالى جاڭساق پىكىردىڭ قۇربانىنا اينالادى دەپ ەسكەرتتى. دەمەك, فيلوسوف – تاۋەلسىز, دەربەس تۇلعا. تۇرمىسقا, دۇنيە-بايلىققا كىرىپتار ەمەس.
– قازاقستاندا فيلوسوفيا بار ما؟
– جوقتىڭ قاسى. ينتەرپرەتاتورلار, فيلوسوفيا ءپانىن وقىتۋشىلار, فولكلورتانۋشىلار, فيلولوگتار, كافەدرا مەڭگەرۋشىلەرى, فاكۋلتەت دەكاندارى كوپ, جەتكىلىكتى.
– ۇستازدارىڭىز كىمدەر؟
– الەم ادەبيەتى. سوناۋ كونە شۋمەر-ۆاۆيلون, اككاد تىلىندەگى ادەبي مۇرالاردان باستاپ, بۇگىنگى زامانداستارىما دەيىنگى ارالىقتاعى ادەبي-كوركەم تۋىندىلار تەگىس نە ۇستازدارىم, نە ارىپتەستەرىم, نە سەرىكتەستەرىم. دەمەك, ءبىر-بىرىمىزدەن ۇيرەنگەن جاناشىر دوس-جاراندارىم. الەم ادەبيەتى ەجەلگى شۋمەر-ۆاۆيلون, كونە مىسىر, كونە پارسى-يران, كونە ياھۋدەي, كونە ءۇندىستان, كونە قىتاي, كونە گرەكيا, كونە رۇم, ورتا عاسىر (پاتريستيكا مەن سحولاستيكا كەزەڭى), رەنەسسانس, XVII عاسىر نەمەسە جاڭا ۋاقىت, XVIII عاسىر نەمەسە اعارتۋ زامانى, XIX عاسىر (رومانتيزم, ناتۋراليزم, رەاليزم), XX عاسىر (مودەرنيستىك اعىمدار, ەكزيستەنتسياليزم, جاڭا رومان, بيتنيكتەر), XXI عاسىر (پوستمودەرنيزم, كەمەلدەنگەن مودەرنيزم) شىعارمالارىنان تۇرادى.
– قازىرگى الەم ادەبيەتىنەن كىمدى تانۋىمىز كەرەك؟
– وكىنىشكە قاراي, برۋنو شۋلتس, بوريس ۆيان, ەدگار لورەنس دوكتوروۋ, الەن روب-گريە, ميلوراد پاۆيچ, فيليپ روت, دجون بەنۆيلل, ماريو ۆارگاس لوسا, كاميلو حوسە سەلا, توماس پينچون, ميگەل انحەل استۋرياس, رەي برەدبەري, روجە كايۋا, جان-ماري لەكلەزيو, شامشاد ابدۋللاەۆ, لەوناردو پادۋرا, كادزۋو يسيگۋرو ءتارىزدى سوڭعى الپىس-جەتپىس جىلدىڭ ىشىندە الەم ادەبيەتىنىڭ كورنەكتى وكىلدەرىنە اينالعان قالامگەرلەردى تاني بەرمەيمىز.
– ورتالىق ازيا؟
– ءبىز قوڭسى وتىرعان كورشىلەرىمىزدىڭ ادەبيەتىن تۇگەل دەرلىك ەمەس, ەلارالىق ءىس-شارالارعا قاتىسقان ءبىردى-ەكىلى وكىلدەرى ارقىلى عانا بىلەمىز. سوندىقتان ورتا ازيالىق باسىلىمدار, ورتاق ءبىر قوعامدىق ۇيىمداستىرۋشى مەكەمەلەر كەرەك-اق.
– نوبەلدى الماعاندار ىشىندە لايىقتىلارى كىمدەر؟
– حورحە لۋيس بورحەس, ميلوراد پاۆيچ, مۇحتار اۋەزوۆ, شىڭعىس ايتماتوۆ, ۆلاديمير نابوكوۆ, ءابىش كەكىلباەۆ, ميحايل پريشۆين, الەن روب-گريە..
– شەتەل قازاقتارى اقىن-جازۋشىلارىنىڭ شىعارماشىلىقتارىمەن تانىسسىز با؟
– قازىر دەن قويىپ تانىسىپ جاتىرمىن. سۇڭعىلا, تالانتتىلارى بارشىلىق. اكبار ءماجيت, ەركەش قۇرمانبەكقىزى, مىسالى, ەكەۋى دە قىتايشا جازادى, ءداستۇرلى ءادىس-ءتاسىلدىڭ يەگەرلەرى, «قۇستار قايعىسى» پوەماسىنىڭ اۆتورى ومارعازى ايتان, تاڭجارىق جولدى, «اتامزامان سويلەيدى» تاقىرىبىنا قالام تارتقان ماعاز رازدان ۇلى, اتاقتى قاجىقۇمار شابدان, ادەبيەتتانۋشى سەرىك قاۋىمباي, پروزاشى سۇلتان جانبولات, قالا بەردى, ەرلان نۇردىحان ۇلى, وركەن سالۋباي, قاجىبەك ايدارحان, مادەتبەك بالعابەك شىعارمالارىن وقىعىم كەلەدى.
– پۋليتتسەر, استۋريسكي سىيلىعى, نوبەل ورتالىق ازيا ەلدەرىنىڭ قالامگەرلەرىنە بۇيىرا ما؟
– بۇل سىيلىقتار – ءبىر جاعىنان, اقىن-جازۋشى, ءتىپتى, ءپالساپاشى ەڭبەگىنە بەرىلگەن ءادىل باعا ءتارىزدى, ەكىنشى جاعىنان, شىعارماشىلىقتى ساۋدا-ساتتىق تۇرعىسىنان قولدايتىن جارنامالىق جاردەم سياقتى كورىنەدى, بارلىق ەلدە اۆتوردىڭ جولىن اشاتىن مەحانيزم.
– گرافومانيالىققا قالاي قارايسىز؟
– گرافومانيا – جالعان جازۋشىنىڭ قيساپسىز كوپ جازعانىنا وڭ سيپات بەرىپ, قالامىنان شىققان ءار تۋىندىسىن ءباسپاسوز بەتىندە جاريالاۋعا تالپىنعان ولەرمەندىگى. ونىمدىلىك پەن گرافوماندىقتىڭ ارا جىگى وسىندا. شىن قالامگەر جارىق كورمەگەن شىعارماسىن جاعدايى كەلمەسە, تارتپاسىندا ۇزاق ساقتاۋى دا مۇمكىن, سەبەبى, ونىڭ قۇندىلىعى ەشقاشان جوعالمايدى.
– ادەبي ورتادا توقىراۋدا ءجۇرمىن دەگەن ءسوز اقىن-جازۋشىلار تاراپىنان ايتىلىپ قالىپ جاتادى. ءسىزدىڭ ويىڭىزشا, توقىراۋدىڭ تۇپكى سەبەبى نە؟
– توقىراۋ دا تاعدىر سياقتى, قايتالانبايدى, اركىمنىڭ ءوز توقىراۋى بار. بىرەۋ تاۋسىلعاندىقتان توقىرايدى, ەكىنشىسى جاقسىلىققا, ىزگىلىككە, كەلەشەككە دەگەن سەنىمىنەن ايىرىلعاندىقتان باز كەشەدى. كىتاپتىڭ بۇرىنعى ىقپالى, بەدەلى, كۇشى جويىلعاندىعىنان توقىراپ جۇرگەندەر دە كوبەيىپ جاتىر. توقىراماس ءۇشىن توقتاماي جازۋ كەرەك. قالام ءبىر توقتاسا, قايتا-قايتا دەمالعىسى كەلە بەرەدى. ءسويتىپ دەمالىسى بىرتە-بىرتە ۇزاق ايالداماعا اينالادى.
– ءدىن اتاۋلىعا كوزقاراسىڭىز قالاي؟
– ءدىن – ءار پەندەنىڭ جەكە شارۋاسى, ونى جاريا ەتۋدىڭ قاجەتى دە جوق. جالپى, ءدىن – قوعامدىق ينستيتۋت بولا تۇرا, تۇلعالىق ماسەلە. جەكە قۇپياسىن جۇمباقتاعان سايىن ءىشتىڭ شەشىمى دە كۇشەيەدى, الايدا نەعۇرلىم جاريا ەتكەن سايىن سوعۇرلىم سىرتتىڭ كۇمانى دە كوبەيەدى. جاريا ءدىن – ساياسات, قۇپيا سەنىمىڭىز – يمان. قازاقتىڭ ەرتەدەن دىنگە دەگەن قالىپتاسقان دۇنيەتانىمى, تۇراقتى كوزقاراسى بار: وسى باعىت, كەشەگىدەن قالعان ۇستانىم, سارا جول ءبىزدىڭ دۇرىس-بۇرىستىعىمىزدى ايقىندايتىن باعدارشام بولۋى ءتيىس.
– قازاقتىڭ كەيىنگى ينتەللەكتۋالدى تۇلعالارىمەن جاقىن ارالاستىڭىز. ولاردىڭ ادەبي پورترەتىن جاساۋ يا بولماسا مەمۋار جازۋ ويىڭىزدا بار ما؟
– ويىمدا بار. تالاسبەك اسەمقۇلوۆ پەن ءامىرحان بالقىبەك تۋرالى جازا الماي ءجۇرمىن. سۇڭعىلا, تەرەڭ جىگىتتەر ەدى. نەگىزى, كەيبىر تاراۋلارىن باستاپ قويدىم. جالپى, جوسپارىم كوپ. قۇداي قالاسا, جازامىن دەپ وتىرمىن.
– كوركەم ادەبيەتتىڭ تاعدىرى قانداي بولادى؟
– ادەبيەتتە تاعدىر جوق, تاۋسىلمايتىن ءومىر بار. تاعدىر – ۋاقىتتىڭ اقىرى. تاۋسىلمايتىن ءومىر – ماڭگىلىكتىڭ كورىنىسى. ول دا شارتتى نارسە. بەس ميلليارد جىلدان سوڭ, كۇن دە وزەگىنە قۇلايدى. بىراق, ول ءبىزدىڭ شارۋامىز ەمەس, قۇدايدىڭ ءىسى. سوندىقتان قۋانىپ ءومىر ءسۇرۋ كەرەك. ءتىپتى, قۋانىپ جازۋ قاجەت. ادەبيەت قۋانىشتىڭ كەڭىستىگىنە اينالۋى ءتيىس. ونى تەك جازۋ مانەرى عانا جاساي الادى.
– ويدان شىعارىلعان ۋاقيعالار مەن ومىردەن الىنعان جايتتاردىڭ ءبىر-بىرىنەن ايىرماشىلىعى بار ما؟
– بار دەسەك تە, قاعاز بەتىنە تۇسكەندە, ەكەۋى دە كوركەمدىك شىندىققا اينالىپ كەتەدى. مەن «جاقسى كورگەن اجاردىڭ ءسىز ۇناتقان كۇلكىسى» اتتى رومان جازىپ شىقتىم. رومان تاقاۋدا باسپاسوزدە جارىق كورەدى.
– وقيمىز.
– ءتاڭىرى توبەسىنە تۇتسىن!
– اڭگىمەڭىزگە راحمەت.
اڭگىمەلەسكەن ەدىلبەك دۇيسەن
