وسىدان سەگىز جىل بۇرىن العاشقى كىرپىشى قالانعان تاراز قالاسىنداعى «تاراز-ارەنا» سپورت سارايى دا ەلىمىزدەگى سپورتتى دامىتۋ ماقساتىنداعى يگى باستاماعا وزىندىك ۇلەس قوسۋدا. جالپى قۇنى 5 ميلليارد تەڭگەگە جۋىق قاراجات جۇمسالعان مەكەمە 2013 جىلى حالىق يگىلىگىنە بەرىلدى. سودان بەرگى ۋاقىتتا اتالعان سپورت سارايى ەل سپورتىنىڭ دامۋىنا ۇلەس قوسىپ, الەمدىك, حالىقارالىق دەڭگەيدە جەڭىمپازداردى دايىنداپ كەلەدى.
«تاراز-ارەنا» مەكەمەسىنىڭ ديرەكتورى نۇرلان ساۋرىقوۆتىڭ ايتۋىنشا, مۇندا سپورتشىلارعا امبەباپ زال, كىشى سپورت زال, اۋىر اتلەتيكا زالى, بوكس زالى, ءجۇزۋ باسسەينى سياقتى 12 سپورت زالى قىزمەت كورسەتەدى ەكەن. سونىمەن قاتار, مەكەمە ارنايى مەديتسينالىق قابينەتپەن جانە قاجەتتى زاماناۋي ستاندارتقا ساي سپورتتىق قۇرال-جابدىقتارمەن قامتىلعان. تاعى ءبىر ايتا كەتەرلىگى, سپورت كەشەنىنىڭ بەس اۋىسىمداعى وتكىزۋ قابىلەتتىلىگى جوعارى, سىرتقى الاڭداردى قوسقاندا 15 سپورت تۇرىمەن 2500-گە تارتا سپورتشى ءبىر كۇندە سپورتپەن شۇعىلدانۋعا مۇمكىندىك الادى.
ارينە, ءاربىر ازاماتتىڭ سالاماتتى ءومىر سالتىن ۇستانىپ, سپورتپەن شۇعىلدانۋى قۇپتارلىق ءىس. مەملەكەتتىڭ سپورت سالاسىنا ءتيىستى كوڭىل ءبولۋىنىڭ ناتيجەسىندە «تاراز-ارەنا» سپورت سارايىندا جاتتىعاتىن ءوڭىر سپورتشىلارى دا جوعارى جەتىستىكتەرگە قول جەتكىزۋدە. ريودا وتكەن پاراليمپيادا ويىندارىنىڭ جەڭىمپازى, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى ءزۇلفيا گابيدۋللينانىڭ جەتىستىگىنىڭ ءوزى ءبىر مارتەبە. جەرگىلىكتى بيلىكتىڭ باتىر قىزعا دەگەن قۇرمەتى رەتىندە جەكە ءۇي سالىپ بەرگەنى دە ەل ەسىندە. تالاي بيىكتى باعىندىرسا دا سول ءبىر قاراپايىم قالپىنان اينىماعان اسىل ادام جونىندە كوپ نارسە ايتۋعا بولادى. ول سپورتتا ءوزىنىڭ لايىقتى باعاسىن الدى. ەندىگى جەردە بۇگىنگى جاستارعا, بولاشاق جەڭىمپازدارعا ۇلگى رەتىندە ءزۇلفيا گابيدۋللينا ەسىمىن ەستە ۇستاۋ قاجەت.
ەلدىڭ اتىن قاشاندا ەر شىعارادى. بۇگىندە ەلىمىزدە گەننادي گولوۆكين, سەرىك ساپيەۆ, دميتري بالاندين سياقتى ايگىلى سپورتشىلاردىڭ اتىندا سپورت سارايلارى بار. ءبىر جاعىنان ەڭبەكتى ەسكەرۋ, ەكىنشى جاعىنان جاستارعا ۇلگى رەتىندە قولعا الىنعان بۇل باستامانىڭ ءالى تالاي سپورت ساڭلاقتارىنا قۋات بەرەتىنى ءسوزسىز. بۇدان كەيىن ءاربىر سپورتشىنىڭ كوكەيىندە وسى كۇنگە جەتسەم دەگەن ءۇمىت شىراعىنىڭ مازدايتىنى دا راس. بۇل رەتتە الەم رەكوردىن جاڭارتقان ءزۇلفيا گابيدۋللينانىڭ دا ەڭبەگىن اتاپ وتپەسكە بولمايدى. ءتىپتى «تاراز-ارەنا» سپورت سارايىنىڭ ىشىندەگى ءجۇزۋ باسسەينىن بولاشاقتا ءزۇلفيا گابيدۋللينانىڭ ەسىمىمەن اتاسا دا ارتىق بولماس ەدى. ءارى جەڭىمپازدىڭ ءوزى اتالعان مەكەمەنىڭ وسى ءجۇزۋ باسسەينىندە جاتتىعىپ, بيىك بەلەستى باعىندىرعانى دا بەلگىلى. قازىردىڭ وزىندە ءزۇلفيا باسسەينگە كەلگەندە تالاي سپورتشىنىڭ ونىڭ شەبەرلىگىنەن ءتالىم الاتىنى راس. بۇل تۋرالى قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ساتتار بەيسەمباەۆتىڭ دا ايتارى بار ەكەن.
«مەن ءزۇلفيانى 2007 جىلدان بەرى جاتتىقتىرىپ كەلەمىن. ول كەزدەردە قالادا «تاراز-ارەنا» سياقتى سپورت كەشەنى جوق بولاتىن. ءوزىم سول ۋاقىتتا وبلىستىق دەنە شىنىقتىرۋ جانە سپورت باسقارماسىندا قىزمەت اتقارا ءجۇرىپ, جۇمىستان تىس ۋاقىتتا ءزۇلفيا گابيدۋللينامەن جەكە جۇمىس ىستەدىم. اۋەلى «دەلفين» باسسەينىندە, م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ سپورت زالدارىندا جاتتىعۋ وتكىزىپ جۇردىك. كەيىننەن ءزۇلفيا «تاراز-ارەنا» كەشەنىندە شەبەرلىگىن شىڭدادى. ناتيجەسىندە تۇڭعىش پاراليمپيادا چەمپيونى اتاندى. بۇل جامبىلدىقتار ءۇشىن عانا ەمەس, بۇكىل قازاق حالقى ءۇشىن ۇلكەن جەتىستىك بولدى. سوندىقتان «تاراز-ارەنا» سپورت سارايىنىڭ ءجۇزۋ باسسەينىن ءزۇلفيا گابيدۋللينانىڭ ەسىمىمەن اتاۋ وتە ورىندى», دەيدى ول.
بۇگىندە ەلىمىزدە ءزۇلفيا گابيدۋللينانىڭ ءىزىن باسىپ كەلە جاتقان سپورتشىلار بارشىلىق. ءوز سوزىندە ەلىمىزدەگى پاراليمپيادا قۇراماسىنىڭ باس باپكەرى ساتتار بەيسەمباەۆ اتىراۋلىق ەرجان سالىمگەرەەۆ, پاۆلودارلىق دميتري لي جانە استانالىق سيازبەك دالەەۆ سياقتى ازاماتتاردىڭ بولاشاقتا دا پاراليمپيادا ويىندارىندا توپ جاراتىنىنا سەنىمدى ەكەنىن ايتتى. وسى ۋاقىتقا دەيىن بۇل ازاماتتار الەم چەمپيوناتىنا قاتىسىپ, ەكى دۇركىن جەڭىمپاز اتانعان ەكەن. بولاشاقتا دا بۇل ازاماتتاردىڭ ءزۇلفيا سىندى جارىق جۇلدىزدىڭ جولىن جالعاستىرىپ, قازاق حالقىنىڭ بەدەلىن الەمدىك دەڭگەيگە كوتەرەتىنىنە سەنىم مول.
جىل سايىن ەلىمىزدىڭ پاراليمپيادا بويىنشا چەمپيوناتى قاراعاندى قالاسىنداعى نۇركەن ءابدىروۆ اتىنداعى سپورت سارايىندا ءوتىپ كەلگەنى بەلگىلى. اتالعان سپورت كەشەنىندەگى ءجۇزۋ باسسەينىنىڭ ۇزىندىعى 25 مەتر. ال بيىلعى جىلعى ەل چەمپيوناتى تاراز قالاسىندا ۇيىمداستىرىلادى ەكەن. سەبەبى, ەلىمىزدىڭ وزگە قالالارىنا قاراعاندا «تاراز-ارەنا» سپورت سارايىنىڭ ءجۇزۋ باسسەينىنىڭ مۇمكىندىگى مول. وسى ۋاقىتقا دەيىن 50 مەترلىك ءجۇزۋ باسسەينىندە جۇزدەگەن ازامات شەبەرلىگىن شىڭداعان ەكەن. اتاپ ايتساق, مەملەكەت قامقورلىعى ەسەبىنەن ق.سارىمولداەۆ اتىنداعى بالالار ءۇيىنىڭ 25 تاربيەلەنۋشىسى, كوپبالالى وتباسىنان شىققان مەكتەپ جاسىنداعى 710 وقۋشى جانە ءبىرىنشى, ەكىنشى توپتاعى, سونىمەن قاتار بالا كەزدەن مۇمكىندىگى شەكتەۋلى 106 ادام باسسەيندى تەگىن پايدالانۋدا. بولاشاقتا بۇل ازاماتتاردىڭ اراسىنان دا پاراليمپيادا ويىندارىنىڭ شەبەرلەرى مەن جەڭىمپازدارىنىڭ شىعاتىنى انىق.
«تاراز-ارەنا» سپورت كەشەنىنىڭ بۇگىنگى تىنىس-تىرشىلىگىمەن تانىسۋ بارىسىندا سول جەردەگى جاتتىعۋ زالىنان قازاقستاندىق قول كۇرەس شەبەرى, ءۇش دۇركىن الەم چەمپيونى, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى دميتري ءترۋبيندى كەزدەستىردىك. ترۋبين ءوز سوزىندە «تاراز-ارەنا» سپورت سارايىندا ءزۇلفيا گابيدۋللينا سياقتى سپورت شەبەرىمەن بىرگە جاتتىعاتىنىن ماقتان تۇتاتىنىن, سونىمەن قاتار, وسىنداعى ءجۇزۋ باسسەينىن ونىڭ اتىنا بەرۋ كەرەكتىگىن جەتكىزدى. راسىندا دا, ءجۇزۋ باسسەينىنە جەڭىمپازدىڭ ەسىمى بەرىلسە يگى.
بۇل كۇندە ءزۇلفيا گابيدۋللينانىڭ ەسىمى ەلگە جاقسى تانىس. ريو تورىندە قازاقتىڭ تۋىن كوككە جەلبىرەتكەن ازاماتتىڭ جەتىستىگىنە قۋانباعان قازاق قالمادى. ەندىگى جەردە ءجۇزۋ باسسەينىن بۇدان بىلاي ءزۇلفيا گابيدۋللينا اتىمەن اتاساق, وڭدى ءىس بولار ەدى. ەلىمىزدىڭ ءار تۇكپىرىنەن سپورت ساڭلاقتارىنا ارنالىپ ءتۇرلى كەشەندەر اشىلىپ جاتقاندا, اۋليەاتا اتىن الەمگە تانىتقان جانعا ءجۇزۋ باسسەينىن سىيلاساق, بۇل دا ءبىر ەلدىكتىڭ كورىنىسى. جامبىل وڭىرىنەن شىعىپ, جاھانعا تانىلعان سپورتشىنىڭ بۇل دا ءبىر مەرەيى بولار ەدى. بۇگىندە تالاي سپورت ساڭلاقتارىن شىڭداپ, شارشى توپقا سالعان جانە ناتيجەسىن كورىپ كەلە جاتقان «تاراز-ارەنا» سپورت سارايى جامبىل وبلىستىق دەنە شىنىقتىرۋ جانە سپورت باسقارماسىنا قارايدى. الداعى ۋاقىتتاردا بۇل ۇسىنىس جامبىل وبلىستىق اكىمدىگى جانە اتالعان باسقارما تاراپىنان قولداۋ تاپسا, تۋعان جەر تۇلعالارىنا كورسەتىلگەن تاعى ءبىر لايىقتى قۇرمەت بولار ەدى دەگەن وي بار.
حاميت ەسامان,
«ەگەمەن قازاقستان»
جامبىل وبلىسى
