مارتەبەلى باسقوسۋ بارىسىندا حالقىمىزدىڭ جىلقى مادەنيەتى, سونىڭ ىشىندە كونەدەن كەلە جاتقان «بيە بايلاۋ», «ايعىر قوسۋ» جانە «قىمىزمۇرىندىق» سياقتى ءداستۇرلى جورالعىلارى «قازاق جىلقىشىلارىنىڭ ءداستۇرلى كوكتەمگى ادەت-عۇرىپتارى» دەگەن اتپەن يۋنەسكو ماتەريالدىق ەمەس مادەني مۇراسى رەتىندە مويىندالىپ, مارتەبەلى تىزىمگە ەندى.
قازاقستان وكىلدەرى تولىققاندى مۇشە رەتىندە العاش رەت قاتىسقان كەزەكتى جيىننىڭ بەلدى مۇشەسى « ۇلىتاۋ» ۇلتتىق تاريحي, مادەني جانە تابيعي قورىق-مۋزەي ديرەكتورى باقتيار قوجاحمەتوۆتىڭ ايتۋىنشا, حالقىمىزدىڭ جىلقى مادەنيەتىن دامىتىپ, ساقتاپ وتىرعان ءوڭىردىڭ ءبىرى – ۇلىتاۋ بولسا, سونىڭ ىشىندە تەرىساققان بويىندا اتالمىش ءداستۇر ەجەلگى كەلبەتىنەن اجىراي قويماعان. وسىنداي ىرگەسى سوگىلمەگەن ءداستۇرلى مادەنيەتىمىزدى الەمگە تانىتۋ ءۇشىن قورىق-مۋزەي جۇيەلى جۇمىس جاساۋدا ەكەن.
اتاپ ايتار بولساق, سوڭعى جىلدارى «تەرىساققان كوكتەمى» اتتى حالىقارالىق فەستيۆال ۇيىمداستىرىپ, 20 مينۋتتىق اعىلشىن تىلىندە شاعىن فيلم تۇسىرگەن. وسى شاراعا قازاقستان رەسپۋبليكاسىنىڭ يۋنەسكو جونىندەگى ۇلتتىق كوميتەت توراعاسى حانزادا ەسەنوۆا جانە ۇيىم مۇشەلەرى ەمما ۋسمانوۆا, ەلەنا حوروش كەلىپ قاتىسقان.
وسى ادامداردىڭ ىقپالداستىق تانىتۋىنىڭ ارقاسىندا جوعارىداعى دەرەكتى فيلم «قازاق جىلقىشىلارىنىڭ ءداستۇرلى كوكتەمگى ادەت-عۇرىپتارى» دەگەن اتپەن يۋنەسكو-نىڭ رەسمي سايتىندا جاريالانۋ مۇمكىندىگىنە يە بولسا, مادەني شارا وتكەن جىلى دا جالعاسىپ «كوكمايسا» دەگەن اتپەن ۇلىتاۋدا وتكىزىلىپتى.
«فەستيۆلدىڭ اۋقىمى جىلدان-جىلعا كەڭەيىپ كەلەدى ءارى شەتەلدىك تۋريستەردىڭ دە قىزىعۋشىلىعى ارتۋدا. ونىڭ بەر جاعىندا يۋنەسكو-نىڭ ارنايى تىزىمىنە جىلقى جورالعىلارىنىڭ ەنۋى − ونىڭ حالىقارالىق قورعالۋىنا كەپىل. ياعني, اتا مۇرامىز كوزدىڭ قاراشىعىنداي ساقتالىپ, كەيىنگى ۇرپاققا مۇرا بولىپ قالادى دەگەن ءسوز», دەيدى قورىق-مۋزەي باسشىسى.
بەكەن قايرات ۇلى,
«Egemen Qazaqstan»
