«قاراعاندى قالاسىنان 35 شاقىرىم جەردە ورنالاسقان, شاحتينسك قالالىق اكىمشىلىگىنە قاراستى, 118 كوپقاباتتى تۇرعىن ءۇيى بار قالا تيپتەس شاحان كەنتىندە قازىرگى تاڭدا 9 مىڭنان اسا حالىق تۇرادى. حالىقتىڭ 80%-دان استامىن شاحتەرلار وتباسى قۇرايدى. توقىراۋ جىلدارى – 1995 جىلى جىلۋ بەرەتىن ورتالىقتاندىرىلعان جالعىز قازاندىقتان ايىرىلىپ قالعان شاحان كەنتى, قازىرگى تاڭدا, تۇرعىنداردىڭ ەسەبىنەن سالىنعان شاعىن قازاندىقتاردىڭ كومەگىمەن نەمەسە «بۋرجۋيكا» دەپ اتالاتىن پەشتەردى پايدالانىپ, كوپقاباتتى ۇيلەردى جىلىتىپ, امالداپ وتىر. وسىعان بايلانىستى 2005 جىلدان باستاپ شاحان ەلدى مەكەنىنىڭ تۇرعىندارى ورتالىقتاندىرىلعان قازاندىق سالۋدى تالاپ ەتىپ, 2013 جىلى جوبالىق-سمەتالىق قۇجاتتاما ازىرلەنگەنىمەن, قارجىلاندىرۋ ماسەلەسى شەشىلمەگەن بولاتىن», دەدى دەپۋتات.
ونىڭ ايتۋىنشا, 2017 جىلدىڭ 1 قاڭتارىندا ەلدىڭ ەسىن العان كەنتتەگى كوپقاباتتى ۇيلەردىڭ بىرىندەگى جەرتولەدە ورنالاسقان اۆتونومدى جىلۋ قازاندىعى جارىلىپ, ءۇيدىڭ ءبىر بولىگى وپىرىلىپ قۇلاپ, 9 ادام قازا تاۋىپ, 2 تۇرعىن جاراقات العان. ەندى, بۇدان ءارى مۇنداي قايعىلى وقيعانى بولدىرماي, كەنت تۇرعىندارىن كەپىلدى جانە ارزان جىلۋمەن قامتاماسىز ەتۋ ءۇشىن ورتالىقتاندىرىلعان قازاندىق سالۋ قاجەتتىگى تۋىنداپ وتىر.
«وسى ماڭىزدى ماسەلەنى شەشۋ ماقساتىندا قازىرگى ۋاقىتتا شاحان كەنتىندەگى ورتالىق قازاندىق پەن جىلۋ جۇيەسىنىڭ قۇرىلىسىنا جوبالىق-سمەتالىق قۇجاتتاما قايتادان ازىرلەنىپ, مەملەكەتتىك ساراپتامادان ءوتتى. قۇرىلىس-مونتاجداۋ جۇمىستارىنىڭ سوماسى 2 ملرد. 232,0 ملن. تەڭگەنى قۇراپ وتىر. وسىعان وراي, جوبانى ىسكە اسىرۋ شاحان كەنتىنىڭ تۇرعىندارىن ورتالىق جىلۋ جۇيەسىمەن قامتاماسىز ەتۋگە جانە قاۋىپسىز ءومىر سۇرۋىنە مۇمكىندىك بەرەدى. سونداي-اق, قازاندىق قۇرىلىسى كەنتتەگى تۇرعىن ءۇي قورىن ساقتاپ, ونىڭ دامۋىنا ىقپال ەتىپ, ادامداردىڭ ءومىر ءسۇرۋ دەڭگەيىن جانە سانيتارلىق-ەكولوگيالىق جاعدايىن جاقسارتادى. وسى ايتىلعان ماسەلەنىڭ ەرەكشە ماڭىزدىلىعىن ەسكەرە وتىرىپ, شاحان كەنتىنە سالىناتىن ورتالىق قازاندىق قۇرىلىسىنا قاجەتتى قارجى بولۋگە ىقپال ەتۋىڭىزدى سۇرايمىز», دەدى ول.
