بۇل باعىتتا وڭىردە ناقتىلى جۇمىس باستالىپ تا كەتتى. اسىرەسە, تاريحشىلار مەن عالىمدار ەل تاريحىنداعى اقتاڭداق بەتتەردى شىنايى تۇرعىدان جازىپ, ەسىمدەرى اتالماي كەتكەن, ۇلت زيالىلارىن تانىتۋ باعىتىندا كوپ ەڭبەكتەنۋدە. سونىمەن قاتار, شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى باۋىرلاس مەملەكەتتەردىڭ جوعارى وقۋ ورىندارىمەن ءوزارا ارىپتەستىك تۋرالى كەلىسىم-شارتتارعا قول قويۋدا.
مەريەم حاكىم تۇركيادا تۋعان قازاق. بۇگىندە انكارا ۋنيۆەرسيتەتىندەگى تۇرىك دۇنيەسىن زەرتتەۋ ينستيتۋتىنىڭ ديرەكتورى. سونىمەن قاتار مادەنيەت زەرتتەۋشىسى, عالىم. ەلباسىنىڭ « ۇلى دالانىڭ جەتى قىرى» اتتى ماقالاسىمەن تانىسقان ول, تۇركى حالىقتارىنىڭ كونە مادەنيەتىنىڭ كوپتەگەن وزگەشەلىكتەرىن زەرتتەپ, قايتادان الەم نازارىنا ۇسىنعان دۇرىس دەپ سانايدى.
–2018 جىلدىڭ سوڭعى ايلارىندا پرەزيدەنتتىڭ « ۇلى دالانىڭ جەتى قىرى» ماقالاسى شىققان كەزدە دەرەۋ وقىدىم. ءوزىم ۇزاق جىلدار بويى مادەنيەت تاريحى ءپانىن وقىتامىن. ەلباسى « ۇلى دالانىڭ جەتى قىرى» ماقالاسىندا كورسەتىپ وتىرعان قىرلارى, الەم وركەنيەتىنە ۇمتىلۋعا مەڭزەگەن يشاراسى دەپ تۇسىنەمىن. جالپى, ەۋرازيا كەڭىستىگىندەگى تۇركى حالىقتارىنىڭ كونە تاريحىنان, مادەنيەتىن كوپتەگەن وزگەشەلىكتەرىن زەرتتەۋ, قايتادان الەم نازارىنا ۇسىنۋ, بۇكىل الەم جۇرتشىلىعىنا جاريالاۋ,–دەيدى الەۋمەتتانۋ عىلىمدارىنىڭ دوكتورى مەريەم حاكىم.
قازاقستان تاريحىن زەرتتەۋ مەن ەلدىڭ مادەني مۇراسىن پاش ەتۋگە باعىتتالعان جاڭا, كۇردەلى جوبالاردى ساپالى ەتىپ ورىنداۋ – ۇلى دالا ەلدەرىنىڭ تاريحي ءرولىن تانۋعا جانە قازاقستاننىڭ رۋحاني-يدەولوگيالىق دامۋىنا سەپتىگىن تيگىزەرى ءسوزسىز.
بايقال ءبايادىل,
«Egemen Qazaqstan»
اقمولا وبلىسى
