دەگەنمەن, اۋداننىڭ الەۋمەتتىك ومىرىندە ينفراقۇرىلىم ماڭىزى وزەكتى كۇيىنشە قالىپ وتىر. بۇل ورايدا سوڭعى جىلدارى اۋدان باسشىلىعى اۋىز سۋ ماسەلەسىنە بارىنشا كوڭىل بولگەن. اۋدانداعى بارلىق ەلدى مەكەننىڭ 9-ى ورتالىق اۋىز سۋ قۇبىرىمەن قامتاماسىز ەتىلگەن. اۋىز سۋ ماسەلەسىنىڭ شەشىمىن تابۋى ءۇشىن بىلتىر 4 جوبا بويىنشا جوبالىق-سمەتالىق قۇجاتتاما دايىندالدى. بيىل دوكۋچاەۆ, شوقاي, نوۆوالەكسەەۆكا, كراسنىي كاردون جانە ساتاي اۋىلدارىنا باستى سۋ قۇبىرى جانە سۋ تاراتۋ قۇبىرىنىڭ جەلىلەرى قۇرىلىسى باستالادى. وعان رەسپۋبليكالىق بيۋدجەتتەن 2 ميلليارد 284 ميلليون 397 مىڭ تەڭگە قارجى ءبولىندى.
«مۇنىڭ بارلىعى وبلىس اكىمى ارحيمەد مۇحامبەتوۆ جانە پارلامەنت ءماجىلىسىنىڭ دەپۋتاتى يرينا ارونوۆانىڭ ارقاسىندا مۇمكىن بولدى. ءبىز ولاردىڭ اۋىل تۇرعىندارىنىڭ جاعدايىنا بيىك ادامگەرشىلىك تۇرعىدان تۇسىنىستىكپەن قاراعانىنا العىسىمىزدى ايتامىز. اۋىلدى سۋمەن قامتاماسىز ەتۋ وسىلاي رەسپۋبليكالىق جانە وبلىستىق دارەجەدە جەدەل شەشىمىن تاپتى» دەدى اۋدان اكىمى ەرلان جامانوۆ.
سونىمەن قاتار, اۋداندى گازداندىرۋ جانە اۋدانداعى, اۋىلدارداعى جولداردى جوندەۋگە دە رەسپۋبليكالىق بيۋدجەتتەن قارجى ءبولىندى. بيىل اۋىلداردىڭ ەڭسەسىن كوتەرۋ ءۇشىن وسىلاي ينفراقۇرىلىمدىق جۇمىستار قارقىندى جۇرەتىن بولادى.
ءنازيرا جارىمبەت,
«Egemen Qazaqstan»
قوستاناي
