وسىدان ەكى جىل بۇرىن ىسكە قوسىلعان جاڭا پليتا قويىلعان. تاماقتار جىلى كۇيدە ۇزاق ساقتالادى. سەمەي قالالىق ءبىلىم ءبولىمىنىڭ باسشىسى ناتاليا فەسەنكونىڭ ايتۋىنشا, الداعى ۋاقىتتا ءار مەكتەپتىڭ اسحاناسىن جالعا الاتىندار بەلگىلى ءبىر جىلعا مەرزىمدە ساپا بويىنشا جۇمىس ىستەۋى قاجەت. سوسىن 5-7 جىلعا دەيىن سوزىلۋى مۇمكىن. ال №49 مەكتەپتەگى جاڭا جابدىق بيۋدجەت قاراجاتىنا الىنعان. جالگەر «تايپوۆ» جك ءوز قاراجاتىنا باكتەريا ولتىرەتىن شام, كوكەنىس, كارتوپ تۋراعىش, سۋ ساقتايتىن ديسپەنسەر الىپتى. سەمەي قالالىق ءبىلىم باسقارماسىنىڭ باسشىسى ناتاليا فەسەنكونىڭ ايتۋىنشا:
- اس ءمازىرى ىشىندە نانى, ءبىرىنشى جانە ەكىنشى تاماعى, سالاتى, كومپوتى قاراستىرىلعان بالالار ءۇشىن تەگىن تاماق 303 تەڭگەنى قۇراۋدا. مەملەكەت تاراپىنان تەگىن تاماقتانۋ ءۇشىن جاعدايى تومەن وتباسىنان شىققان 112 بالاعا جاعداي جاسالىپ وتىر. ولارعا مىندەتتى تۇردە, ءسۇت, بال, جەمىستەر بەرىلەدى. ول باسقا دا اتا-انالار ءوز قالتالارىنان 220-250 تەڭگەگە بالالارىنا ىستىق تاماق اپەرە الادى. ءبىر سامسا پەن شىرىن 100-150 تەڭگە كولەمىندە. جالگەر اسپازشى اس ءمازىرىن جاساپ, ونى مەكتەپ باسشىلىعى بەكىتەدى. بارلىق سانيتارلىق تالاپتارعا ساي.
«نۇر وتان» پارتياسىنىڭ حاتشىسى قانىبەك جۇماشەۆ اسحاناداعى سورپانىڭ ءدامىن تاتىپ كورىپ, بىلاي دەدى:
- بالالار ءبىزدىڭ بولاشاعىمىز. ولاردىڭ دەنساۋلىعىن ويلاپ, مەكتەپتە ىستىق تاماقپەن قامتۋ, سول ارقىلى جەتكىنشەكتەردىڭ الاڭسىز ءبىلىم الىپ, جاقسى ءوسىپ-جەتىلۋىنە جاعداي جاساۋ – مەملەكەتتىك ماڭىزى بار ماسەلە. بۇعان «نۇر وتان» پارتياسى دا, مەملەكەت تە, قوعام دا, اتا-انا دا ءوز دەڭگەيىندە كوڭىل ءبولۋى ءتيىس. وقۋشىلارعا بەرىلەتىن اس ءمازىرى, دايىندالۋى كوڭىلىمنەن شىقتى. بارلىق جاعداي جاسالعاندىعى كورىنىپ تۇر. ەڭ باستىسى بالالاردىڭ دەنساۋلىعى. «اس ادامنىڭ ارقاۋى» دەمەكشى, 1-11 سىنىپ وقۋشىلارىن دۇرىس تاماقتاندىرۋىمىز اسا قاجەت.
№10 مەكتەپتە بورشش سورپاسى, كۇرىش تاعامدارى 130-150 تەڭگە كولەمىندە ەكەن. بارلىعى دا تالاپقا ساي بولىپ شىقتى. «نۇر وتان» پارتياسىنىڭ حاتشىسى قانىبەك جۇماشەۆ تاماقتىڭ ءدامىن تاتىپ كورگەن سوڭ, الەۋمەتتىك جاعدايى تومەن وتباسىدان قانشا بالا كەلەدى دەپ سۇرادى. بۇل 116 بالا تۇرمىسى تومەن جانۇيالاردان بولسا, قوسىمشا ون بالانى اسپاز قارلىعاش بەگەنباەۆا ءوز دەمەۋشىلىگىمەن تاماقتاندىرادى ەكەن. قانىبەك جۇماشەۆ تاعامداردا تۇزدىڭ ازدىلىعىن تىلگە تيەك ەتكەن كەزدە, وعان بالالار ءۇشىن قاتتى تۇزدالعان تاعامدار دايىندالمايتىندىعىن ءتۇسىندىردى. قالالىق ءبىلىم ءبولىمىنىڭ باستىعى ناتاليا فەسەنكونىڭ ايتۋىنشا, اتا-انالار, مەدبيكە, ۇستازدار بىرىگىپ, ارنايى مونيتورينگ توپ قۇرعان. بۇل مونيتورينگ توپ كەز كەلگەن ۋاقىتتا كىرىپ, بالالارعا تالاپقا ساي تاعام بەرىلىپ جاتا ما سونى تەكسەرە الادى.
راۋشان قابجانقىزى,
«ەگەمەن قازاقستان»
سەمەي
