سەمەيدە وتكەن «Zhas projekt» وبلىستىق فورۋمىنىڭ جوبا تانىستىرىلىمىنا قالا اكىمىنىڭ ورىنباسارى نادەجدا شاروۆا, ىشكى ساياسات ءبولىمىنىڭ باستىعى نۇرجان ەسەنجولوۆ, ۇيلەستىرۋ اگەنتتىگىنىڭ ايماقتىق ۇيلەستىرۋشىسى سەرىك ءجۇنىسوۆ جانە تاعى باسقالارى قاتىستى.
- «Zhas projekt» جوباسى سەمەي قالاسىندا ءوتىپ, وعان 14-تەن 29 جاسقا دەيىنگى جاستار قاتىسىپ وتىر. بۇل جوباعا جالپى ورتا ءبىلىم بەرۋ مەكتەبىنىڭ وقۋشىلارىنان باسقا, كوللەدج جاستارى دا ءوز ۇلەستەرىن قوسۋدا. جوبا ەڭ الدىمەن ءوز الەۋەتىن, ومىرلىك ماڭىزى بار داعدىلارى مەن كوشباسشىلىق قاسيەتتەرىن دامىتۋعا مۇددەلى جاستار ءۇشىن وتە قاجەتتى شارۋا,-دەدى سەمەي قالالىق جاستار رەسۋرستىق ورتالىعىنىڭ ديرەكتورى ولجاس سوعىمباي.
جوباداعى قاراجات نەگىزىندە تابىسى تومەن قاتىسۋشىلارعا بەرىلەدى. شىعىس جاستارىنىڭ سەمەيدە وتكىزىلگەن وسىناۋ وبلىستىق فورۋمى «Zhas project»-ءىڭ كوپتەگەن بيزنەس جوبالارى كوپشىلىكتى ەرەكشە تاڭ قالدىردى. ۇيىمداستىرۋشىلاردىڭ ايتۋىنشا وبلىستا 149 جوبا جۇزەگە اسقان.
ءوز ۇسىنىستارىن بىلدىرگەن 491 قاتىسۋشى 1 000 000 تەڭگە كولەمىندەگى شاكىرتاقىعا يە بولعان. فورۋم بارىسىندا ارنايى كورمە ۇيىمداستىرىلىپ, جاستار ءوز ونىمدەرىن تانىستىرۋعا مۇمكىندىك الدى. كەيبىر قاتىسۋشىلار قوناقتارعا تابيعي ءسۇت ونىمدەرىن ۇسىنسا, ەندى بىرەۋلەرى وزدەرىنىڭ كادەسىيلىق بۇيىمدارىمەن كوپشىلىك نازارىن اۋداردى.
مۇحتار اۋەزوۆ اتىنداعى پەدكوللەدج ستۋدەنتى نۇرلان تولەۋتاەۆ الدىن الا كورەرمەن رەتىندە كەلىپ قاتىسىپ, ءوزى اباي اۋدانى سارجال اۋىلىنىڭ تۋماسى رەتىندە ۇلتتىق اسپاپتار مەن ۇلتتىق ورنەكتەردى دايىنداپ, حالىققا ۇسىنۋدى جولعا قويماقپىن دەگەنويىمەن ءبولىستى.
سول سياقتى اباي اۋدانىنان كەلگەن سەرىكجان ساعىنبەكوۆ جوبا اياسىندا قۇس شارۋاشىلىعىنداعى جەتىستىكتەرىمەن ءبولىستى. سەرىكجان جوباسىنىڭ نەگىزگى ەرەكشەلىگى التىن تاۋىق جۇمىرتقاسى. جوبا اۆتورىنىڭ ايتۋىنشا ونىمگە دەگەن سۇرانىس جوعارى. جاس قاتىسۋشى تۇرمىس جاعدايى تومەن وتباسىلارعا ءوز ونىمدەرىن تەگىن تاراتادى.
سول سياقتى بالنۇر ەسبولاتوۆا جاستارعا ءتالىم-تاربيە بەرگەندىكتەرىن ايتىپ, بولاشاقتا وسى جوبا اياسىندا الەۋمەتتىك مەكتەپ اشىقىسى كەلەتىنىن, وندا جۋرناليستيكاعا, اعىلشىنعا, تاعى باسقا كەرەك ماماندىقتارعا تەگىن ۇيرەتسەم دەگەن ويىن ايتتى.
- مەن ەشكى ءسۇتىنىڭ پايداسى حالىققا كەرەك ەكەنىن كوردىم,-دەدى تارباعاتاي اۋدانىنان كەلگەن پسيحولوگ ايدانا سەرجانقىزى,-سوندىقتان وسىنى دامىتىپ, الداعى ۋاقىتتا ەشكى سۇتىنەن ىرىمشىك, قۇرت جانە تاعى باسقا ونىمدەردى ءوندىرىپ, مۇگەدەك جاندارعا, جاعدايى تومەندەرگە تەگىن تاراتسام دەگەن ويىم بار. ءبىز الدىن الا زەرتتەۋلەر جۇرگىزدىك. قانت ديابەتى, اسقازان-ىشەك اۋرۋلارى بار ناۋقاستار ون كۇن ەشكىنىڭ ءسۇتىن ىشكەن سوڭ, جاعدايلارى جاقساردى.
سەمەي قالاسى اكىمىنىڭ ورىنباسارى نادەجدا شاروۆا جاستار وزدەرىنە جۇكتەلگەن جاۋاپكەرشىلىكتى سەزىنە ءبىلىپ, سەنىمدى اقتاعاندارىن اتاپ ءوتتى. نادەجدا شاروۆانىڭ ايتۋىنشا فورۋم قاتىسۋشىلارىنىڭ بولاشاقتا بىلىكتى كاسىپكەر بولۋ ىقتيمالدىعى جوعارى. جوبانىڭ قاتىسۋشىلارىنا اي سايىن الەۋمەتتىك شاكىرتاقىلار تولەندى, ماسەلەن 60 000 تەڭگە – جوو-نىڭ تۇلەكتەرىنە, 40 000 تەڭگە – قالعان بارلىق قاتىسۋشىلارعا دەپ بەلگىلەنگەن.
جوبانى ىسكە اسىرۋدىڭ ماڭىزدى كەزەڭى قورىتىندىلارى بولىپ تابىلادى. ايماقتىق فورۋم اشىلىپ, وندا جوبالاردى ىسكە اسىرۋ كەزىندە دايىندالعان ونىمدەردىڭ كورمەسى وتكىزىلمەك. سەمەيدەگى فورۋمعا مەملەكەتتىك ورگاندار, «اتامەكەن» ۇكپ, «دامۋ» قق وكىلدەرىنىڭ, ءماسليحات دەپۋتاتتارى قاتىستى.
راۋشان قابجانقىزى,
«ەگەمەن قازاقستان»
سەمەي
