ءبىلىمى مەن بىلىكتىلىگىنە سەنەتىن ول وقۋىن ءتامامداپ, ەلگە كەلگەن سوڭ ءتۇرلى كەدەرگىلەرگە تاپ كەلەدى. بىلىمىنە ساي جۇمىس تابىلماي, تاپقان كۇننىڭ وزىندە ماردىمسىز جالاقى الادى. كەيىن ءوز ەلىنەن جايلى ءومىر سۇرەتىن اقشا تاپپاسىنا كوزى جەتكەن قانات باسقا ەلدە جۇمىس ىستەۋگە بەل بۋادى. نەگىزگى جوسپارى وڭتۇستىك كورەياعا كەتۋ بولاتىن. ساپاردى ساۋىرگە جوسپارلاپ وتىرعان ەدى. بىراق تانىستارى قىستا كەتۋگە ۇگىتتەپ, وزدەرىمەن بىرگە الىپ كەتەدى. پحەنچحاندا ءوتىپ جاتقان وليمپيادا قارساڭىندا تۋريست رەتىندە شەكارا اسۋ قيىندىق تۋدىرمادى.
كورەياعا جەتكەن سوڭ, الگى تانىستارى ءوزىن الداپ الىپ كەلگەندەرىن, ەشقانداي جۇمىس تا, ءۇي دە جوعىن تۇسىنەدى. «بالەن جەردە التىن بار, بارساڭ, باقىر دا جوق» دەگەننىڭ كەرى كەلىپتى. ەكى اي بويى ەكى قولعا ءبىر كۇرەك تاپپاي قينالىپ, كوكتەم شىعا سالا ايتەۋىر ءبىر جۇمىس تابادى. جالپى, شەتەلدىكتەر ءۇشىن جۇمىس ناۋقانى كوكتەمنىڭ سوڭىندا, جازدا باستالادى ەكەن.
جۇمىس ىزدەۋ دە وڭاي شارۋا ەمەس. ويتكەنى الەۋمەتتىك جەلىدە جۇمىس تاۋىپ بەرەمىن دەگەندەرگە سەنىپ, باسقا قالاعا بارىپ, ول جاقتا ەشكىمدى تاپپاي الدانىپ قالعاندار كوپ. دەلدالداردىڭ قىزمەتتەرى ءۇشىن الاتىن ءوز كوميسسياسى دا بار ەكەن. ونىڭ قۇنى – 200 اقش دوللارىنىڭ شاماسىندا. سوندىقتان قانات جۇمىس تاۋىپ بەرۋشىمەن كوميسسياعا تولەنەتىن اقشانى العاشقى جالاقىدان بەرۋگە كەلىسىم جاساسقان دۇرىس ەكەنىن ايتادى.
ايتپاقشى, الگىندەي «دەلدالداردىڭ» اراسىندا ءوزىمىزدىڭ قازاقتار دا بار. وكىنىشكە قاراي, شەتەلدىكتەردەن بۇرىن ءوزىمىزدىڭ قانداستار جيى سان سوقتىرىپ كەتەدى ەكەن...
«30 كۇننەن كەيىن رۇقسات الۋ كەرەك. كوشى-قون پوليتسياسىنان تىعىلىپ, دۇكەنگە بارا الماعان كۇندەرىمىز دە بولدى, – دەپ ەسكە الادى قانات كورەياداعى كۇندەرىن. – سوڭعى كەزدەرى تەكسەرىس جيىلەپ كەتتى. ونداي كەزدەردە ۇيدەن شىقپايمىز. ال جۇمىس بەرۋشىنىڭ بۇدان حابارى بار».
قانات ۇلكەن كۆاندجۋ قالاسىنداعى ەت كومبيناتىنا جۇمىسقا ورنالاسادى. العاشىندا جۇمىسقا 13 قازاقستاندىق كىرىپتى, بىراق كەيىننەن ەكى-اق ادام قالعان. قالعاندارى ءتارتىپ بۇزىپ جۇمىستان شىعىپ كەتكەن.
«كورەيادا ەۋروپاعا قاراعاندا جالاقىنى جاقسىراق تولەيدى» كەيىپكەرىمىزدىڭ كورەيانى تاڭداعانى دا سوندىقتان ەكەن.
«ول ەلدە جىلىجايدا ىستەيتىندەر جۇمىستىڭ قولايسىزدىعىنان, اۋىرلىعىنان قازا تاۋىپ جاتادى. بيىل جازدا ەكى شەتەلدىكتىڭ قازا تاپقانىن ەستىدىم» دەيدى قانات احمەتوۆ.
جات جەردە جۇمىس ىستەۋگە كەلگەن شەتەلدىكتەر ءۇيدى بىرىگىپ جالدايدى. قاناتتىڭ ايتۋىنشا, جۇمىسشىلار اراسىندا ۋكراينا, رەسەي, وزبەكستان, تايلاند ازاماتتارى باسىم.
«مەنىڭ ويىمشا, شەتەلدە اقشا تابۋعا مۇمكىندىك كوپ. ويتكەنى ىستەگەن جۇمىسىڭا قاراي جالاقىڭ دا جاقسى. ال قازاقستاندا, ونىڭ ۇستىنە استانادا ءبىر ادامنىڭ جالاقىسىنا وتباسىڭدى اسىراۋ قيىن. سوندىقتان ماتەريالدىق جاعدايىمدى كوتەرۋ ءۇشىن وسى جولدى تاڭدادىم. نيەتى, ارمانى بار ادامعا دۇنيەنىڭ قاي جەرىندە بولسا دا شەكتەۋ جوق دەپ ويلايمىن» دەيدى ناپاقاسىن كورەي ەلىنەن تاۋىپ جۇرگەن جىگىت.
قوسىمشا قارجى تاپقان جاقسى ارينە. الايدا ءبىزدىڭ كەيىپكەرىمىز «وزگە ەلدە سۇلتان بولعانشا, ءوز ەلىندە ۇلتان بولۋدى» كوزدەيدى. سوندىقتان جاقىن ارادا ەلگە ورالماق ويى بار ەكەنىن ايتتى.
سۆەتلانا عالىمجانقىزى,
«Egemen Qazaqstan»
