بۇل بيلەر كەڭەسى تۋرالى ەرەجە جوباسىن قازاقستان سۋديالار وداعىنىڭ باتىس قازاقستان وبلىسى بويىنشا فيليالى دايىنداعان ەكەن. «تاتۋلاسۋ: سوتقا دەيىن, سوتتا» جوباسىن جۇزەگە اسىرۋ ماقساتىندا قۇرىلعان بيلەر كەڭەسى تۋرالى ەرەجەدە بيلەر كەڭەسىنىڭ نەگىزگى مىندەتتەرى, قۇرۋ ءتارتىبى, بيلەر كەڭەسىنىڭ قىزمەتىن ۇيىمداستىرۋ جانە قىزمەتىنىڭ توقتاتىلۋى تۋرالى ماسەلەلەر كورسەتىلگەن.
- بيلەر كەڭەسى – بۇل قازاق بيلەرىنىڭ ءداستۇرىن جاڭعىرتۋ, داۋلاسۋشىلىق دەڭگەيىن تومەندەتۋ, قۇقىق بۇزۋشىلىققا توزبەۋشىلىك پەن ونىڭ الدىن-الۋ ماسەلەلەرى بويىنشا, سالت, عۇرىپ, وزىق داستۇرلەردى ساقتاۋ جونىندە اۋىلدىق, اۋداندىق, قالالىق اكىم جانىنان قۇرىلاتىن كەڭەسشى ورگان, - دەيدى باتىس قازاقستان وبلىستىق سوتىنىڭ ءباسپاسوز قىزمەتى مامانى نۇرگۇل قاناتباەۆا.
قازىردىڭ وزىندە باتىس قازاقستان وبلىسىنىڭ 10 اۋدانىندا بيلەر كەڭەسى قۇرىلىپ, 95 اۋىلدىق وكرۋگتە جۇمىس باستاعان. بيلەر كەڭەسى العاش قاراعان 20-دان استام داۋ سول وتىرىستاردا شەشىلىپ, سوتقا جەتپەي قىسقارىپتى.
مىسالى, قازتالوۆ اۋىلدىق وكرۋگىندەگى 7 ادامنان قۇرالعان بيلەر كەڭەسى ەكولوگيالىق ماسەلەگە بايلانىستى داۋدى شەشتى. بۇل داۋ كولگە سۋ جەتكىزۋ ءۇشىن تارتىلعان ارنا شارۋا قوجالىقتارىنىڭ جەرىنەن ءوتىپ, اۋىل تۇرعىندارى مەن شارۋاشىلىق باسشىلارى اراسىندا پايدا بولعان تۇسىنىسپەۋشىلىكتەن تۋىنداعان. داۋ سوتقا جەتپەي رەتتەلدى.
جالپاقتال مەن كوكتەرەك اۋىلدىق وكرۋگتەرىنىڭ بيلەر كەڭەسى ءۇي جانۋارىن باسقا تۇلعانىڭ زاڭسىز يەلەنۋىنەن الدىرتۋ, بەرەشەكتى ءوندىرۋ جانە جەر ۋچاسكەسىن بولۋگە بايلانىستى 3 داۋلى رەتتەدى. تاراپتار جالپاقتال اۋىلدىق وكرۋگىنىڭ بيلەر كەڭەسىنە جۇگىنۋدىڭ ناتيجەسىندە داۋلار سوتقا جەتپەي شەشىمىن تاپتى.
بوكەيوردا اۋدانىنىڭ 7 اۋىلدىق وكرۋگىندە بيلەر كەڭەسى قۇرىلىپ, 8 داۋ قارالعان. ونىڭ ەكەۋى – قارىزدى قايتارۋ تۋرالى, بەسەۋى – جاقىن تۋىستار اراسىنداعى وتباسىلىق داۋ بولسا, بىرەۋى – كورشىلەردىڭ جەر داۋى ەكەن.
جاڭاقالا اۋدانىنىڭ بيلەر كەڭەسىندە دە 5 داۋلى ماسەلەنى رەتتەلگەن. داۋدىڭ ءبىرى شارۋا قوجالىعى مەن جەرگىلىكتى تۇرعىننىڭ اراسىندا بولىپتى. شارۋا قوجالىعىنىڭ يەسى ب.-دەگەن ازامات ءوز يەلىگىندەگى جايىلىم جەردەن جاۋاپكەردىڭ مالىن شىعارۋدى تالاپ ەتىپتى. سۋديا تاراپتارعا بيلەر كەڭەسىنە جۇگىنۋ ارقىلى داۋدى شەشۋ مۇمكىندىگىن تۇسىندىرگەن سوڭ تالاپكەردەن ارىزىن قايتارىپ العان.
- اۋداندىق سوتتاردا وتكەن قورىتىندى ماجىلىستەردە كەڭەس مۇشەلەرى بيلەك كەڭەسىنىڭ تيىمدىلىگىن, وسى ارقىلى تۇرعىندار اراسىندا ادامي قارىم-قاتىناستار ساقتالىپ, الەۋمەتتىك شيەلىنىستەردى بولدىرماۋعا سەپتىگىن تيىگىزەتىنىن اتاپ ءوتتى. ەرەجەنىڭ بەكىتىلۋى بيلەر كەڭەسىنىڭ جۇمىسىنا جاڭا سەرپىن بەرەدى دەپ ويلايمىز, دەيدى نۇرگۇل اسقارقىزى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
