جەل ەلەكتر ستانتسياسىن تولىق پايدالانۋعا بەرگەندە اۋاعا پارنيكتى گازداردىڭ ءبولىنۋى جىلىنا 230 مىڭ تونناعا ازايادى. ستانتسيانىڭ ءوزى ون مىڭنان استام وتباسىنىڭ ەلەكتر قۋاتىنا دەگەن قاجەتىن وتەپ, ونى وندىرۋگە جۇمسالاتىن شىعىندى بىرنەشە ەسەلەپ ازايتۋعا مۇمكىندىك بەرەدى. قۇرىلىس بارىسىندا 300-گە دەيىن جۇمىس ورنى اشىلىپ, جەل ەلەكتر ستانتسياسى پايدالانۋعا بەرىلگەننەن كەيىن دە وعان قىزمەت كورسەتۋ ءۇشىن 20 تۇراقتى جۇمىس ورنى ساقتالادى. جەرگىلىكتى مامانداردىڭ بىلىكتىلىگىن كوتەرۋ شەت ەلدە ىسكە اسىرىلماقشى.
جەل پاركى بارلىعى 119 گەكتار جەر تەلىمىندە ورنالاساتىن بولادى. كۇن كوزىنەن قۋات الاتىن ەلەكتر ستانتسيالارىنان ءبىر ەرەكشەلىگى, بۇل الاڭدى تولىق قورشاۋدىڭ دا قاجەتى جوق. اشىق بولعاننان كەيىن وندا ادامداردىڭ ءجۇرۋى مەن مالدىڭ جايىلۋىنا ەشقانداي توسقاۋىل قويىلمايدى.
بايقال ءبايادىل,
«Egemen Qazaqstan»
ارشالى اۋدانى,
اقمولا وبلىسى.
