فوتونى تۇسىرگەن ەرلان ومار, «ەگەمەن قازاقستان»
بۇعان دەيىن اياڭ تۇرلەرى, جەلىس تۇرلەرى تۋرالى جاريالاعان ەدىك. بۇل جولى شابىس تۇرلەرى جونىندە اڭگىمەلەيمىز.
شابىس تۇرلەرى. شابىس – جىلقى مالىنىڭ ەڭ شاپشاڭ قوزعالىسى, ياعني, جىلقىنىڭ جەلىستەن دە تەز ءجۇرىسىن ايتادى. جىلقى شابىسپەن ۇزاق جولدى تەز الادى, بىراق تىم ۇزاققا شىدامايدى. شاپقان كەزدە اتتىڭ اياق تاستاۋى الىسقا كەتىپ, قوزعالىستىڭ قۋاتى ارتىپ, كۇشى قوسىلادى. شابىستىڭ جىلدامدىعى ارتقان سايىن اياق تاستاۋى جيىلەيدى.
● جاي شابىس – قىسىلماي ەركىمەن شابادى. باپتاعان جۇيرىك جىلقىلاردى جاباتتاپ تەر العاندا جاي شابىسپەن جۇرگىزەدى. جاي شابىسپەن جۇرگەن جىلقى اياعىن ەركىن تاستايدى.
● تەكىرەك – قوساياق شابىس دەپ تە ايتادى. جىلقى الدىڭعى جانە ارتقى ەكى اياعىن پارلاپ تەڭ تاستايدى. تەكىرەك شابىسقا ۇيرەنگەن جىلقى شالدىقپاي ءونىمدى ءجۇرىپ, بارار جەرگە جىلدام جەتكىزەدى.
● شاپقىن – ورتاشا شابىس ءتۇرى. جىلقى اياعىن شادىرلاي تاستاپ قوزعالادى. ياعني, وڭ جاق الدى جانە سول جاق ارتىن قايشىلاپ شابادى. جۇيرىك جىلقىلاردى تەر الىپ, بوي جازدىرۋ ءۇشىن شاپقىن جاسايدى.
● كوسىلە شابىس – ۇزاق قاشىقتىققا شاباتىن بايگە اتتارىنا ءتان قوزعالىس. الدىڭعى جانە ارتقى اياقتارىن كوسىلە تاستايدى دا, قايتا باۋىرىنا جيناپ شابادى. ارتقى اياقتىڭ ءىزى الدىڭعى اياق ىزىنەن اسىپ تۇسەدى.
● اعىندى شابىس – جىلقىنىڭ بار مۇمكىندىگىنشە قاتتى شابۋىن ايتادى. ياعني, قىسقا قاشىقتىققا شاباتىن بايگە اتتارىنا ءتان قوزعالىس. اعىنداپ شاپقان جىلقى اياعىن قايشىلاپ تاستاپ, قاتتى ەكپىنمەن ومىراۋلاپ جەل جارادى.
بەكەن قايرات ۇلى,
«ەگەمەن قازاقستان»
