اقىننىڭ كوپتومدىعىنىڭ العاشقى ەكى تومىنا ولەڭدەرى, ءۇشىنشى تومىنا ءوزىنىڭ ءتۇرلى تاقىرىپتارعا, جەكە تۇلعالارعا ارنالعان ەسسەلەرى جيناقتالعان, ءتورتىنشى تومىنا ج.ەرمان تۋرالى جازىلعان ماقالالار توپتاستىرىلعان, ال بەسىنشى تومى اقىنمەن قۇرىلعان سۇحباتتارعا ارنالعان. جيناقتار مادەنيەت جانە سپورت مينيسترلىگىنىڭ قولداۋىمەن الماتىداعى «ساردار» باسپا ۇيىنەن جارىق كورىپ وتىر.
ادەبيەت كوشىنە قوسىلىپ وتىرعان كوپتومدىقتىڭ تۇساۋكەسەرى شارادان گورى شاعىن شىعارماشىلىق كەشى سەكىلدى ۇيىمداستىرىلۋى ونىڭ مازمۇنىن دا, ماڭىزىن دا ارتتىرا ءتۇستى. ادەبي كەشكە جينالعان قاۋىم الدىمەن اقىن تۋرالى, ونىڭ پوەزياعا قوسقان پاراساتتى ولەڭدەرىنىڭ قۋاتى, جالپى شىعارماشىلىق جولى مەن ءومىرى جايلى بەينەفيلم تاشالادى.
كەشتى اقىن, قازاقستاننىڭ ەڭبەك سىڭىرگەن قايراتكەرى جاناربەك ءاشىمجان جۇرگىزىپ وتىردى. ول كەشتىڭ مازمۇنىنا توقتالىپ, شايىر شىعارماشىلىعىنىڭ ەرەكشەلىگىنە, ادەبيەتكە اكەلگەن جاڭالىعىنا جان-جاقتى شولۋ جاسادى. بەتاشار ءسوزدى العان الماتى قالاسى اكىمىنىڭ ورىنباسارى ارمان قىرىقباەۆ جاڭا كىتاپتاردىڭ جارىققا شىعۋىمەن قۇتتىقتاپ, اقىننىڭ قازاقتىڭ ايتىس ونەرىنىڭ جاڭا مەكتەبىنىڭ قالىپتاسۋىنا قوسقان ۇلەسىن, جالپى ادەبيەتتەگى ورنىن سارالاپ, وقىرمانى رەتىندە وڭ باعاسىن بەردى.
قىزدار پەداگوگيكالىق ۋنيۆەرسيتەتى ستۋدەنتتەرىنىڭ اقىن ولەڭدەرىنەن قۇرالعان كومپوزيتسياسى اقىن تۋرالى جۇرەكجاردى لەبىزدەرگە, ونىڭ سوزىنە جازىلعان اندەرگە ۇلاستى. «سەيحۋن» توبى ءجۇرسىن ەرماننىڭ سوزىنە جازىلعان جارىلقاسىن داۋلەتوۆتىڭ «جالعىز ۇلىم», سۇلەيمەن يبراگيموۆتىڭ ورىنداۋىنداعى التىنبەك قورازباەۆتىڭ «باقاناس جەردىڭ – بايتاعى», «سىڭارىم» اتتى اندەر ادەبي كەشتىڭ اجارىن اشا ءتۇستى. كسرو حالىق ءارتىسى, ەڭبەك ەرى ءاسانالى ءاشىموۆ, اقىن, اۋدارماشى قۋانىشباي قۇرمانعاليەۆ, پالۋان, وليمپيادا جەڭىمپازى داۋلەت تۇرلىحانوۆتار اقىن تۋرالى قىزىقتى ەستەلىكتەرىمەن ءبولىستى.
اردا ونەردى ارداقتاپ, تالاي تالانتتى اقىننىڭ تۇساۋىن كەسكەن ج.ەرماننىڭ ادەبي كەشى ءبىر ۇزىك ايتىس ۇلگىسىن كورسەتپەي وتە الماسى انىق. تانىمال ايتىس اقىندارى بالعىنبەك يماشەۆ, رۇستەم قايىرتاي ۇلى, بولاتبەك ورازباەۆ, جانداربەك بۇلعاقوۆ, مۇحتار نيازوۆ سياقتى دۇلدۇلدەر ايتىس ونەرىنىڭ كوشىن ورگە سۇيرەپ كەلە جاتقان جاناشىر تۇلعاعا جىردان شاشۋ شاشىپ, كەشكە جينالعانداردى شابىتتى ولەڭ ورنەگىمەن ءبىر جەلپىندىرىپ تاستادى.
ەستەرىڭىزگە سالا كەتسەك, اقىننىڭ بۇعان دەيىن «جانارتاۋ», «ارايلى كۇن, ارمىسىڭ!», « ۇلىتاۋعا باردىڭ با...», «قۇدىرەتكە جۇگىنۋ», «ەكى تىزگىن, ءبىر شىلبىر», «قۇستىڭ كولەڭكەسى», «ىرعاي», «ارنادىم سىزگە», «كوكتوبەدەگى كەزدەسۋلەر», «الىستان جانە جاقىننان», «اسىل اجار», «ۇلارىڭ قايدا ۇلىتاۋ؟» اتتى كىتاپتارى جارىق كورگەن بولاتىن.
ايگۇل احانبايقىزى,
«ەگەمەن قازاقستان»
الماتى
