باتىس قازاقستان وبلىسىنىڭ اكىمى التاي كولگىنوۆ مەملەكەتتىڭ باسىم باعىتتارىنىڭ ءبىرى – ينۆەستيتسيا تارتۋ ءۇشىن قولايلى ورتانى قالىپتاستىرۋ ەكەندىگىن, پرەزيدەنت ن.ءا.نازارباەۆ مەملەكەتتىك ورگان باسشىلارىنا ينۆەستيتسيالاردى تارتۋ بويىنشا جۇمىستى شيراتۋدى تاپسىرعانىن ايتا كەلىپ, ينۆەستيتسيالىق تارتىمدىلىق – ءوڭىر ەكونوميكاسى ءۇشىن نەگىزگى فاكتور بولاتىنىن اتاپ ءوتتى.
- ەل ەكونوميكاسىنا ينۆەستيتسيا تارتۋ – ءبىز ءۇشىن نەگىزگى باعىتتىڭ ءبىرى. مەملەكەتىمىزدە ىڭعايلى ينۆەستيتسيالىق ورتانى جاقسارتۋ مەن ينۆەستيتسيالىق تارتىمدىلىقتى ارتتىرۋ جۇمىسى قارقىندى جۇرۋدە. ينۆەستورلار ءۇشىن قولايلى جاعداي جاسالۋدا. ەكونوميكانى ءارتاراپتاندىرۋ بويىنشا جۇمىستى جالعاستىرامىز. ءبىزدىڭ ءوڭىر بۇل جوبالاردىڭ جۇزەگە اسۋىنا نيەتتى, - دەدى ءوڭىر باسشىسى.
ايماقتىق كەڭەستە اۋىل شارۋاشىلىق سالاسىندا ەكى جوبا تانىستىرىلدى. ماسەلەن, «اماNAT» شارۋا قوجالىعى ءبورلى اۋدانىندا 2,5 ميلليارد تەڭگەنى قۇرايتىن ءسۇت ءوندىرۋ كەشەنىن ءوز قاراجاتىنا سالۋدى جوسپارلاعان. 600 باس سيىرعا ارنالعان كەشەننىڭ جىلدىق ءسۇت ءوندىرىسى 1525 مىڭ تونناعا جەتپەك. كەشەننىڭ قۇرىلىسىنا 30 ادام تارتىلسا, زاۋىت ىسكە قوسىلعان سوڭ 10 ادام تۇراقتى جۇمىسپەن قامتىماق.
وسى وتىرىستا «Ringo-Milk» جشس تەرەكتى اۋدانىندا 1500 ساۋىن سيىرعا ەسەپتەلگەن, قۇنى 3,9 ميلليارد تەڭگەنى قۇرايتىن ءسۇت ءوندىرۋ كەشەنىن سالۋ جوباسىمەن تانىستىردى. يتالياندىق كومپانيامەن بىرلەسكەن كەشەن جىلىنا 7 مىڭ توننا ءسۇت جانە سۋارمالى جەردەن جىلىنا 8 مىڭ توننا قۇنارلى مال ازىعىن وندىرۋگە قاۋقارلى. ءسۇت زاۋىتى قۇرىلىسىنا 150 ادام, ال ىسكە قوسىلعان كەزدە 40 ادامدى تۇراقتى جۇمىسپەن قامتيدى.
«ورال ترانسفورماتور زاۋىتى» جشس ءونىم تۇرلەرى مەن كولەمىن كوبەيتە وتىرىپ, قۋاتتىلىعى 35-500 كۆ ترانسفورماتورلارعا ارنالعان پانەلدىك رادياتورلار ءوندىرىسىن ىسكە قوسۋدى جوسپارلاعان. جالپى قۇنى 3,9 ملرد تەڭگەدەن اساتىن جوبا ىسكە قوسىلعاندا 100-دەن استام جاڭا جۇمىس ورىنى اشىلماق. زاۋىت باسشىلارى قىزمەتكەرلەرىنە ىڭعايلى جاعداي جاساۋ ءۇشىن ءبىرىنشى قاباتى بالاباقشامەن, ساۋدا ورنىمەن, سپورت ورىندارىمەن قامتىلعان 9 قاباتتى تۇرعىن ءۇي سالۋدى جوسپارلاپ وتىر ەكەن.
سونىمەن قاتار,«K7 GROUP» قۇرىلىس كومپانياسى ورال قالاسى ماڭىنان كوپ قاباتتى تۇرعىن ۇيلەر سالۋعا نيەتىن ءبىلدىردى. ينۆەستور ءوز ەسەبىنەن بۇل جوباعا 20 ميلليارد تەڭگەدەن اساتىن قارجى جۇمساماق. قۇرىلىسقا جەرگىلىكتى ماتەريالدى پايدالانۋ جوسپارلانعان. بوي كوتەرەتىن ۇيلەر مەملەكەتتىك باعدارلامالارمەن جانە جەڭىلدەتىلگەن باعامەن ءوڭىر تۇرعىندارىنا ۇسىنىلماق. اقتاۋلىق «K7 GROUP» كومپانياسىنا ۇسىنىلعان ءۇش جەر تەلىمىنىڭ ءبىرى – ورال قالاسىنىڭ بۇرىنعى ەت كومبيناتى ايماعى ەكەن. وبلىس اكىمىنىڭ ايتۋىنشا, بۇل اۋماق اۋەلى جەرگىلىكتى قۇرىلىس كومپانيالارىنا ۇسىنىلعان, بىراق ولار باس تارتقان.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
