ءفيلمدى رەجيسسەر, انتروپولوگ نايوبي تومپسون مەن قازاقستاندىق پروديۋسەر, زەرتتەۋشى نۇربول بايمۇحانوۆ جەتەكشىلىك ەتەتىن كانادالىق توپ ەلىمىزدىڭ اۋماعىندا تۇسىرگەن. بۇل فيلمگە قۇرامىنا وتاندىق سۋرەتشىلەر, ارتىستەر, كاسكادەرلەر, دۋبلەرلەر مەن بەزەندىرۋشىلەر ەنگىزىلگەن شىعارماشىلىق توپ تارتىلىپ, امەريكالىق كومپوزيتور داررەن فانگتىڭ مۋزىكاسى پايدالانىلدى.
دەرەكتى فيلمدە تىرشىلىگى جىلقىنىڭ قولعا ۇيرەتىلۋىنە بايلانىستى ورىستەگەن قازاقستان اۋماعىنداعى ەجەلگى مادەنيەتتەر كەزەڭدەرى عىلىمي-زەرتتەۋ جۇمىستارى مەن زاماناۋي اقپاراتتىق تەحنولوگيا نەگىزىندە قايتا جاڭعىرتىلعان. بۇل ۇدەرىس ادامزات كوممۋنيكاتسياسىنا قاتىستى جاڭا جۇيەنىڭ قالىپتاسۋىن ايقىنداپ, كوشى-قوننىڭ جاندانۋىنا جانە ەجەلگى مەملەكەتتەردىڭ پايدا بولۋىنا جول اشتى.
دەرەكتى تريلوگيا 2019 جىلعى ناۋرىزدا 50 ەلدىڭ, سونىڭ ىشىندە كانادانىڭ (CBC), اقش-تىڭ (PBS), گەرمانيانىڭ (ZDF), فرانتسيانىڭ (ARTE), دانيانىڭ (DR) جانە قازاقستانىڭ («Qazaqstan» رترك) ۇلتتىق تەلەارنالارىندا كورسەتىلەدى دەپ جوسپارلانىپ وتىر.
سونىمەن قاتار, نۇرسۇلتان نازارباەۆ اقپارات جانە كوممۋنيكاتسيالار مينيسترلىگىنىڭ جاڭعىرتىلعان ورتالىق كوممۋنيكاتسيالار قىزمەتى ءباسپاسوز ورتالىعىنىڭ جۇمىسىمەن تانىستى. بۇل ورتالىق «قازمەديا ورتالىعى» تەحنولوگيالىق كەشەنىمەن تولىقتاي بىرىكتىرىلگەن ءارى سوڭعى ۇلگىدەگى زاماناۋي قۇرالدارمەن جابدىقتالعان كوپفۋنكتسيالى مەديا الاڭ سانالادى.
