«ەلباسىمىز «كينەماتوگرافيا تۋرالى» قازاقستان رەسپۋبليكاسى زاڭىنا قول قويعانى بارشامىزعا بەلگىلى. بۇل اۋقىمدى قۇجات كينەماتوگرافيا سالاسىندا قۇقىقتىق نەگىز ورناتۋعا باعىتتالعان. زاڭ جوباسى ءۇش جىل بويى دايىندالىپ, ەندى بەكىتىلدى. بۇل كينو سالاسى ءۇشىن ماڭىزدى, ياعني ۇلتتىق كينو ءوندىرۋشىنى قولداۋ, ۇلتتىق كينونى پروكاتتا شىعارۋ, قازاقستاندىق كينونى الەمدىك كينو نارىعىنا بەلسەندى تۇردە شىعارۋعا باعىتتالعان وسى سالا ءۇشىن وتە ماڭىزدى زاڭ. زاڭ تۋرالى كەڭىرەك ايتقىم كەلىپ وتىر», - دەپ جازدى ارىستانبەك مۇحامەدي ۇلى فەيسبۋك پاراقشاسىندا.
ءمينيستردىڭ ايتۋىنشا, ەلىمىزدىڭ كينوكورسەتىلىمىندەگى بارلىق فيلمدەردى قازاق تىلىنە دۋبلياج جاساۋ, سۋبتيتر بەرۋ, كادردان تىس اۋدارمانى قامتاماسىز ەتۋ - قازاقستاندىقتاردىڭ كوپتەن كۇتكەن نورماسى. اۋدارما كورسەتىلىم يەسىنىڭ, ديستريبيۋتور ەسەبىنەن جاسالاتىن بولادى جانە تۇساۋكەسەر مەرزىمىنە اسەر ەتپەۋى كەرەك. اۋدارما تۇپنۇسقادان نەمەسە رەسەيلىك نارىق ءۇشىن ورىس تىلىنە تارجىمالانعان نۇسقادان جاسالاتىن بولادى, مۇنى كورسەتىلىم يەسى ءوزى شەشەدى. كورسەتىلىمى شەكتەۋلى فيلمدەر عانا بۇل ەرەجەدەن تىس بولادى. ۇلتتىق فيلمدەردىڭ كورسەتىلىمىنە كەلسەك, ولار قازاق تىلىندە بولادى, باسقا تىلدە قاجەتتىلىك تۋىنداعان جاعدايدا عانا كورسەتىلەدى.
«قىتاي مەن اقش-تا كورسەتىلەتىن فيلمدەردىڭ ءبارى اۋديتوريا تىلىندەگى سۋبتيترلەرمەن قامتاماسىز ەتىلەدى. بۇل - ەڭ وڭتايلى جانە پارمەندى مەحانيزمدەردىڭ ءبىرى. قازاقستاعا جىلىنا 300-دەن استام فيلم اكەلىنەدى جانە ولار قازاق تىلىندەگى نۇسقاسىز كورسەتىلەتىن. مۇنىڭ ءارتۇرلى سەبەپتەرى بار, سونىڭ ءبىرى - قۇقىق يەلەنۋشى ءۇشىن كاسىبي دۋبلياج جاساۋعا جۇمسالعان قارجى ەلىمىزدەگى كورسەتىلىمنەن تۇسكەن پايدادان اسىپ كەتۋى مۇمكىن. سونىمەن قاتار زاڭدا فيلمدەردى جاسقا قاراي جىكتەپ, سوعان سايكەس كاتەگوريا بەرىلۋىن, فيلمدەردى جۇيەلەپ, ەسەپكە الىپ, مونيتورينگ جۇرگىزەتىن بىرىڭعاي اۆتوماتتىق اقپاراتتىق جۇيە قۇرۋ قاراستىرىلعان», - دەدى ا. مۇحامەدي ۇلى.
اتاپ ايتقاندا, كينو وندىرىسىمەن اينالىساتىن ەلدەردىڭ وزات تاجىريبەسىنە سۇيەنە وتىرىپ, ۇلتتىق كينونى قولداۋ مەملەكەتتىك ورتالىعىن قۇرۋ جۇيەسى قاراستىرىلدى. زاڭ كينەماتوگرافيانى مەملەكەت تاراپىنان قارجىلاي قولدايتىن وپەراتور بولىپ تابىلاتىن ۇلتتىق كينونى قولداۋ مەملەكەتتىك ورتالىعى جۇمىسىنىڭ قۇقىقتىق نەگىزىن ايقىندايدى. ۇلتتىق كينونى قارجىلاندىرۋدىڭ جاڭا مودەلى ىسكە اسادى. ءىرى كينووندىرۋشىلەردى قولداۋ جانە ينۆەستورلاردى تارتۋ ماقساتىندا سۋبسيديا تولەۋ, كينەماتوگرافيا سالاسىندا سالىق جەڭىلدىكتەرى, كينو قىزمەتىن ەسەپكە الۋ جانە مونيتورينگ جاساۋ اۆتوماتتىق اقپاراتتىق بىرىڭعاي جۇيە قۇرۋ, كينوكوللەكتسيالاردى تسيفرلاندىرۋ شارالارى قاراستىرىلعان.
«قازاقستان ۇكىمەتى جانىنان ۇلتتىق فيلمدەردى مەملەكەت تاراپىنان قارجىلاي قولداۋ تۋرالى ۇسىنىستار مەن ۇسىنىمدار ماسەلەسىمەن اينالىساتىن كونسۋلتاتيۆتىك-كەڭەسشى ورگان - ۇلتتىق فيلمدەردى مەملەكەت تاراپىنان قارجىلاي قولداۋ ماسەلەلەرى بويىنشا مەكەمەارالىق كوميسسيا قۇرىلادى. ەلباسىمىزدىڭ تاپسىرۋىمەن «استانافيلم» جانە «قازاقفيلم» تەرريتورياسىندا ەركىن ەكونوميكالىق ايماق قۇرۋ ماسەلەسى قاراستىرىلدى. جاڭالىقتار وسىنداي! ءبىز ءبارىمىز ەلباسىمىزدىڭ زاڭعا قول قويۋىن اسىعا كۇتتىك. كينەماتوگرافيامىزدىڭ دامۋىندا شەشۋشى كەزەڭ بولىپ تابىلاتىن تاۋەلسىز قازاقستان تاريحىنداعى «كينەماتوگرافيا تۋرالى» تۇڭعىش زاڭ قابىلدانۋىمەن بارشاڭىزدى قۇتتىقتايمىن!», - دەپ جازدى مينيستر.
ەسكە سالا كەتەيىك, بيىل قاڭتاردىڭ باسىندا مەملەكەت باسشىسى نۇرسۇلتان نازارباەۆ كينەماتوگرافيا سالاسىندا قۇقىقتىق نەگىزدەمەلەردى بەلگىلەۋگە باعىتتالعان «كينەماتوگرافيا تۋرالى» قازاقستان رەسپۋبليكاسىنىڭ زاڭىنا قول قويدى.
