«وتكەن تۇندە جانىبەك اۋدانىندا قار قۇرساۋىنان 4 كولىك پەن 23 ادام قۇتقارىلدى» دەپ حابارلادى باتىس قازاقستان وبلىستىق توتەنشە جاعدايلار دەپارتامەنتى ءباسپاسوز قىزمەتى.
وسىنىڭ الدىندا عانا بقو تج دەپارتامەنتى ءوڭىر تۇرعىندارىنىڭ ۇيالى تەلەفونىنا قاۋىپتى اۋا-رايىنا بايلانىستى وبلىس اۋماعىنداعى بىرقاتار اۆتوجولداردا كولىك قوزعالىسى جابىلعانىن حابارلاعان بولاتىن. بۇل جىل باسىنان بەرى تج تاراتقان 56 سمس-حابارلاما ەكەن.
«وكىنىشكە قاراي اۆتوكولىك يەلەرى قۇتقارۋشىلاردىڭ ەسكەرتۋىنە قۇلاق اسپايدى. ءسويتىپ جول بويىندا ءتۇرلى قيىندىققا ۇشىرايدى» دەپ نارازى بولادى توتەنشەلىكتەر.
بىراق ومىردە نەشە ءتۇرلى وقيعا كەزدەسەدى. قىستىڭ كوزى قىراۋدا ادامدار ەرىككەننەن جولعا شىعىپ, تاۋەكەلگە باس تىكپەيدى عوي. كەيىنگە قالدىرۋعا, ۇيدە جاتۋعا كەلمەيتىن جايتتەر بولادى.
24 قاڭتار كۇنى 16.30 مەن 23.45 ارالىعىندا اقوبا-جانىبەك اۋىلدارى اراسىنان 2 جەڭىل اۆتوكولىك, 2 «ۋاز»-دى توتەنشەلىكتەر قۇتقاردى. ايتا كەتەيىك, بيىلعى قىستىڭ, قالىڭ قاردىڭ قيىندىعىن وسى جانىبەكتىكتەر كورىپ-اق جاتىر. ەكى كۇننىڭ بىرىندە سوققان بوران ەلدىمەكەندەر اراسىنداعى جولداردى ءجيى جاۋىپ, قارىم-قاتىناسقا كەدەرگى كەلۋدە. بۇل اۋدانعا جول تازالاۋعا كومەكتەسۋ ءۇشىن ورالدان بىرنەشە ارنايى تەحنيكا, قۋاتتى تراكتورلار جىبەرىلگەن.
25 قاڭتارعا قاراعان ءتۇن ورتاسىندا «جىمپيتى-اقساي» جولىنىڭ 10 شاقىرىمىندا كۇرە جولدان تايىپ, جيەكتەگى قارعا باتىپ قالعان كولىكتى دە سىرىم اۋدانىنداعى №12 ءورت ءسوندىرۋ ءبولىمى مەن توتەنشە جاعداي ءبولىمى قىزمەتكەرلەرى قۇتقارىپ العان. ءبىر ءتاۋىرى, قۇتقارىلعان ازاماتتاردىڭ ەشقايسىسى دا دارىگەرلىك كومەككە مۇقتاج ەمەس.
جىل باسىنان بەرى باتىس قازاقستان وبلىسىندا توتەنشەلىكتەر جول بويىندا 184 كولىك پەن 201 ادامدى قۇتقارعان.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
