كەزدەسۋ بارىسىندا شۆەيتساريالىق مينيستر قازاق-شۆەيتسار قاتىناستارىنىڭ دەڭگەيىن جانە ەكى ەل اراسىنداعى ەكونوميكالىق ىنتىماقتاستىق دامۋىن جوعارى باعالادى. شۆەيتساريا قازاقستان ەكونوميكاسىنىڭ ەڭ ءىرى ينۆەستورلارىنىڭ ءبىرى ەكەنى ءمالىم. 2018 جىل قورىتىندىلارى بويىنشا قازاق-شۆەيتسار تاۋار اينالىمىنىڭ كورسەتكىشى 2,5 ملرد. دوللاردان استى. وتاندىق نارىقتا 40-قا جۋىقتاعان شۆەيتساريالىق كومپانيالار, ونىڭ ىشىندە قارجى ينستيتۋتتارى, حيميا-فارماتسەۆتيكالىق جانە قۇرىلىس كونتسەرندەرى بار.
ءوز كەزەگىندە ە. دوساەۆ, «بەلدەۋ مەن جول» باستاماسى مەن «نۇرلى جول» مەملەكەتتىك باعدارلاماسى شەڭبەرىندەگى ينفراقۇرىلىمدىق جوبالاردىڭ جۇزەگە اسىرىلۋ بارىسىمەن جانە ماڭعىستاۋ وبلىسىنىڭ كولىكتىك-لوگيستيكالىق الەۋەتىمەن تانىستىرۋدى قامتىعان, 2018 جىلعى شىلدەدە شۆەيتساريالىق دەلەگاتسيانىڭ قازاقستانعا جاساعان ساپارى بارىسىندا قول جەتكىزىلگەن ۋاعدالاستىقتار اياسىندا ساۋدا-ەكونوميكالىق ارىپتەستىكتىڭ بەلسەندەۋىنە دەگەن ءۇمىتىن ءبىلدىردى. پرەمەر-ءمينيستردىڭ ورىنباسارى شۆەيتساريالىق كومپانيالاردى «نۇرلى جول» شەڭبەرىندەگى جوبالاردى ىسكە اسىرۋعا شاقىرىپ, قازاقستاندا ينۆەستورلار ءۇشىن ۇسىنىلاتىن سالىقتىق جەڭىلدىكتەردىڭ كەڭ جيىنتىعىن اتاپ ءوتتى.
گ. پارمەلەن شۆەيتساريا تاراپىنىڭ قازاق-شۆەيتسار ىنتىماقتاستىعىنىڭ, سونىڭ ىشىندە ەكىجاقتى كەلىسىمشارتتىق نەگىزدى كەڭەيتۋ ارقىلى نىعايۋىنا دەگەن جوعارى قىزىعۋشىلىعىن راستادى. مينيستر اسىل مەتاللداردان جاسالعان ونىمدەردەگى رەسمي تاڭبالاردى ءوزارا مويىنداۋ تۋرالى كەلىسىم مەن قىزمەتتەر ساۋداسى تۋرالى كەلىسىم جوبالارى جونىندەگى كەلىسسوزدەردەگى ەداۋىر پروگرەستى اتاي كەلە, اتالعان قۇجاتتارعا قول قويۋ ءوزارا ساۋدا اينالىمى مەن قازاقستاننىڭ قىزمەتتەر سەكتورىنا شۆەيتساريالىق كومپانيالار تاراپىنان ينۆەستيتسيالاردى ارتتىرۋعا مۇمكىندىك بەرەتىنىن ايتىپ ءوتتى.
وسى رەتتە, سۇحبات بارىسىندا تاراپتار 2019 جىلى جوسپارلانعان قازاق-شۆەيتسار ساۋدا-ەكونوميكالىق كوميسسياسىنىڭ كەزەكتى وتىرىسىنىڭ ماسەلەلەرىن تالقىلادى.
سونداي-اق, پرەمەر-ءمينيسترىنىڭ ورىنباسارى ە. دوساەۆ باستاعان قازاق دەلەگاتسياسىنىڭ 22-23 قاڭتاردا شۆەيتسارياعا جاساعان جۇمىس ساپارى شەڭبەرىندە دەف-تىڭ رەسمي, عىلىمي, قارجى جانە كوممەرتسيالىق ورتالارىنان بىرقاتار قاتىسۋشىلارىمەن كەزدەسۋلەر وتكىزدى.
